ଭୁବନେଶ୍ୱର, ୦୭/୦୮ : ‘ପ୍ରମେୟ’ ଏବଂ ‘ନ୍ୟୁଜ୍୭’ ପକ୍ଷରୁ ଆୟୋଜିତ "ମୋ କ୍ୟାମେରାରେ କାଳିଆ' ଶୀର୍ଷକ ଡିଜିଟାଲ୍ ପ୍ରତିଯୋଗିତାର ବିଜେତାଙ୍କୁ ପୁରସ୍କୃତ କରାଯାଇଛି। ଓଡ଼ିଶା ଗଣମାଧ୍ୟମ ଜଗତରେ ସ୍ୱତନ୍ତ୍ରତା ପାଇଁ ପାଠକଙ୍କ ଆଦୃତି ହାସଲ କରିଥିବା ଦୈନିକ ଖବରକାଗଜ ‘ପ୍ରମେୟ’, ଟେଲିଭିଜନ ଚ୍ୟାନେଲ ‘ନ୍ୟୁଜ୍-୭’ ଓ ଏହାର ପୋର୍ଟାଲ ୱିଙ୍ଗ୍ସ ଏହି ନିଆରା କାର୍ଯ୍ୟକ୍ରମ ଜରିଆରେ ପୁଣି ଥରେ ପାଠକୀୟ ଆଦୃତିକୁ ପ୍ରମାଣିତ କରିଛି ।
କୋଟି ଓଡ଼ିଆଙ୍କ ଆରାଧ୍ୟ ଜଗତରନାଥ ମହାପ୍ରଭୁ ଜଗନ୍ନାଥଙ୍କ ପ୍ରସିଦ୍ଧ ରଥଯାତ୍ରା ଅବସରରେ ସୁମା ରିୟଲ ମିଡିଆ ପରିଚାଳିତ ‘ପ୍ରମେୟ’, ‘ନ୍ୟୁଜ୍-୭’ର ଡିଜିଟାଲ ୱିଙ୍ଗସରେ "ମୋ କ୍ୟାମେରାରେ କାଳିଆ' ଶୀର୍ଷକ ପ୍ରତିଯୋଗିତା ଆୟୋଜନ କରାଯାଇଥିଲା । ଏହି ପ୍ରତିଯୋଗିତାରେ ଅଂଶଗ୍ରହଣକାରୀଙ୍କୁ ରଥ ସହ ଫଟୋଟିଏ ପଠାଇବାର ଆହ୍ୱାନ କରାଯାଇଥିଲା । ନିର୍ଦ୍ଦିଷ୍ଟ ନିୟମ ଭିତ୍ତିରେ ଅନୁଷ୍ଠିତ ଏହି ପ୍ରତିଯୋଗିତାରେ ରାଜ୍ୟ ତଥା ରାଜ୍ୟ ବାହାରୁ ଅନେକ ପ୍ରତିଯୋଗୀ ସାମିଲ ହୋଇଥିଲେ । ପ୍ରତିଯୋଗିତାର ଧାର୍ଯ୍ୟ ନିୟମାବଳୀ ତଥା ‘ପ୍ରମେୟ’,‘ନ୍ୟୁଜ୍-୭’ ସୋସିଆଲ ମିଡିଆରେ ଦର୍ଶକ ଆଦୃତି(ସଂଖ୍ୟା ଭିତ୍ତିରେ) ବିଜେତାଙ୍କୁ ଚୟନ କରାଯାଇଥିଲା । ଟେକ୍ନୋସପି ପ୍ରାୟୋଜିତ ଏହି ପ୍ରତିଯୋଗିତାରେ ପୁରସ୍କାର ପାଇଁ ୧୦ ଜଣ ପ୍ରତିଯୋଗୀଙ୍କୁ ବଛା ଯାଇଥିଲା ।
‘ନ୍ୟୁଜ୍-୭’ ପରିସରରେ ଅନୁଷ୍ଠିତ ପୁରସ୍କାର ବିତରଣ କାର୍ଯ୍ୟକ୍ରମରେ ସୁମା ରିୟଲ ମିଡିଆର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ସୁନୀଲ କୁମାର ଦାସ ପ୍ରତିଯୋଗୀଙ୍କୁ ଅଭିନନ୍ଦନ ଜଣାଇବା ସହ ସୁମା ରିୟଲ ମିଡିଆର ତିନି ଗଣମାଧ୍ୟମ ‘ପ୍ରମେୟ’, ‘ନ୍ୟୁଜ-୭’ ଏବଂ ଡିଜିଟାଲ୍ ୱିଙ୍ଗ୍ସ ସମ୍ପର୍କରେ ତଥ୍ୟ ରଖିଥିଲେ । ପାଠକୀୟ ଆଦର ଆମର ସବୁଠୁ ବଡ଼ ବଳ ବୋଲି କହିବା ସହ ରାଜ୍ୟରେ ଏକ ପ୍ରମୁଖ ତଥା ଦାୟିତ୍ୱବାନ ଗଣମାଧ୍ୟମ ଭାବେ ‘ପ୍ରମେୟ’, ‘ନ୍ୟୁଜ୍-୭’ ଏବଂ ଏହାର ଡିଜିଟାଲ୍ ବା ପୋର୍ଟାଲ ୱିଙ୍ଗ୍ସର ସଫଳତା ପାଇଁ ପାଠକଙ୍କୁ ଧନ୍ୟବାଦ ଦେଇଥିଲେ । ଏହି ଅବସରରେ ‘ପ୍ରମେୟ’, ‘ନ୍ୟୁଜ୍-୭’ର ଗ୍ରୁପ ସେଲ୍ସ ଡାଇରେକ୍ଟର ହିମାଂଶୁ ହୋତା ଖୁବ୍ କମ୍ ଦିନରେ ‘ପ୍ରମେୟ’ ଓ ‘ନ୍ୟୁଜ୍-୭’ ସଫଳତା ହାସଲ କରିବା ସମ୍ପର୍କରେ କହିବା ସହ ଏହା ପଛରେ ଏହାର ପ୍ରତିଷ୍ଠାତା ବିଶିଷ୍ଟ ଶିକ୍ଷାବିତ୍ ପ୍ରଫେସର ଡକ୍ଟର ମନୋଜରଞ୍ଜନ ନାୟକଙ୍କ ଦୂରଦୃଷ୍ଟି, ବଳିଷ୍ଠ ନେତୃତ୍ୱ ହିଁ ଚାବିକାଠି ବୋଲି ବର୍ଣ୍ଣନା କରିଥିଲେ । ପାଠକ ଏବଂ ଦର୍ଶକଙ୍କ ଆବଶ୍ୟକତା, ଆଗ୍ରହ, ପସନ୍ଦ ଓ ରୁଚିକୁ ‘ପ୍ରମେୟ’ ଏବଂ ‘ନ୍ୟୁଜ୍୭’ ଗୁରୁତ୍ୱ ଦେଇଥାନ୍ତି । ସେଥିଲାଗି ଛାତ୍ରଛାତ୍ରୀଙ୍କଠାରୁ ଆରମ୍ଭ କରି କୃଷକ, ଉଦ୍ୟୋଗୀ, ଗୃହିଣୀ ଏବଂ ସମାଜ ପାଇଁ କାର୍ଯ୍ୟ କରୁଥିବା ପ୍ରତ୍ୟେକ ବ୍ୟକ୍ତିଙ୍କ ଲାଗି ବିଭିନ୍ନ କାର୍ଯ୍ୟକ୍ରମ ଆୟୋଜନ କରିଥାନ୍ତି ‘ପ୍ରମେୟ’ ଓ ‘ନ୍ୟୁଜ୭’ । ଦାୟିତ୍ୱ ସମ୍ପନ୍ନ ଗଣମାଧ୍ୟମ ଭାବେ ‘ପ୍ରମେୟ’, ‘ନ୍ୟୁଜ-୭’ ଖବର ଜଗତରେ ନୂଆ ହେଲେ ବି ପାଠକଙ୍କ ଆବଶ୍ୟକତା ଓ ପସନ୍ଦକୁ ଧ୍ୟାନ ଦେଇ ଲୋକପ୍ରିୟତା ହାସଲ କରିଥିବା ଶ୍ରୀ ଦାସ ଏବଂ ଶ୍ରୀ ହୋତା ଉଲ୍ଲେଖ କରିଥିଲେ ।
କାର୍ଯ୍ୟକ୍ରମରେ ସାମିଲ ହୋଇଥିବା ‘ପ୍ରମେୟ’ ଓ ‘ନ୍ୟୁଜ୍-୭’ ଡିଜିଟାଲ ମୁଖ୍ୟ ଅମରେଶ ଦାସ ପାଠକଙ୍କ ପସନ୍ଦ ସହ ସମୟର ଆହ୍ୱାନକୁ ନଜରରେ ରଖି ପରିବର୍ତ୍ତନ ସହ ‘ପ୍ରମେୟ’ ଏବଂ ‘ନ୍ୟୁଜ-୭’ ତାଳ ଦେଇ ଚାଲିବାର ଆବଶ୍ୟକତା ଉଲ୍ଲେଖ କରିଥିଲେ । ଏହାସହ ଅତିଥିମାନେ କହିଲେ, ‘ମୋ କ୍ୟାମେରାରେ କାଳିଆ’ ଏପରି ଏକ ପ୍ରୟାସ, ଯାହାକି ଓଡ଼ିଆ ଅସ୍ମିତାକୁ ଗୁରୁତ୍ୱର ସହ ଅଧିକ ଶାଣିତ କରିବାର ପ୍ରତିଶ୍ରୁତି ରଖେ । ଏହା ଜରିଆରେ ପାଠକ ଏବଂ ଖବର ଆଗ୍ରହୀ ଦର୍ଶକଙ୍କ ସହ ସମ୍ପର୍କ ସହିତ ସୃଜନଶୀଳତାକୁ ସମ୍ମାନିତ କରିବାର ପରମ୍ପରା ଜାରି ରହିବ । କାର୍ଯ୍ୟକ୍ରମକୁ ‘ନ୍ୟୁଜ୭’ ଡିଜିଏମ ସେଲ୍ସ ସିଦ୍ଧାର୍ଥ ରୟ, ମାର୍କେଟିଂ ଆଣ୍ଡ ବିଜିନେସ୍ ଡେଭେଲପମେଣ୍ଟର ସଙ୍କେତ ହୋତା ଏବଂ ଟେକ୍ନୋସପିର କର୍ମକର୍ତ୍ତା ପରିଚାଳନା କରିଥିଲେ ।
