ଆନନ୍ଦପୁର,୨୦/୦୯: ସ୍କୁଲର ବିଭିନ୍ନ ଆର୍ଥିକ ଅନିୟମିତତାରେ ଲିପ୍ତ ରହିଥିବା ସହ ପ୍ରଧାନ ଶିକ୍ଷୟିତ୍ରୀଙ୍କ ବିରୋଧରେ ରହିଛି ମାଳମାଳ ଅଭିଯୋଗ । ତେଣୁ ପ୍ରଧାନ ଶିକ୍ଷୟିତ୍ରୀଙ୍କ ବଦଳି କରିବାକୁ ଦାବି କରିଛନ୍ତି ଛାତ୍ରଛାତ୍ରୀ, ଅବିଭାବକ,ପୂର୍ବତନ ଶିକ୍ଷକ, ସ୍କୁଲ କମିଟି ସଦସ୍ୟ ଏବଂ ଗ୍ରାମବାସୀ । ଏଭଳି ଦାବି ନେଇ ସ୍କୁଲରେ ତାଲା ପକାଇ ଧାରଣାରେ ବସିଛନ୍ତି ଛାତ୍ରଛାତ୍ରୀଙ୍କ ସହ ଗ୍ରାମବାସୀ । କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ଘଷିପୁରା ବ୍ଲକ୍ ପୁରୁଣାବାନ୍ଦୋଗଡା ହାଇସ୍କୁଲରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ପ୍ରଧାନ ଶିକ୍ଷୟିତ୍ରୀ ଜୋତ୍ସାରାଣୀ ବଳ ସ୍କୁଲର ବିଭିନ୍ନ ଆର୍ଥିକ ଅନିୟମିତତାରେ ଲିପ୍ତ ରହିଥିବା ଅଭିଯୋଗ କରିଛନ୍ତି ଗ୍ରାମବାସୀ । କେବଳ ସେତିକି ନୁହେଁ ମଧ୍ୟାହ୍ନ ଭୋଜନ ଅତି ନିମ୍ନମାନର ହେଉଥିବାବେଳେ ଜୋତ୍ସ୍ନାରାଣୀ ପ୍ରଧାନ ଶିକ୍ଷୟିତ୍ରୀ ଭାବେ ଯୋଗ ଦେବା ଦିନଠାରୁ ଗୁରୁ ଦିବସ ଓ ଗଣେଶପୂଜା ପ୍ରଭୃତି ପାଳନ ହେଉନଥିବା ଅଭିଯୋଗ କରିଛନ୍ତି ଛାତ୍ରଛାତ୍ରୀ । ସେହିପରି ବିଭିନ୍ନ ବିଲ୍ରେ ହିସାବ ନଦେଇ କମିଟି ସଦସ୍ୟଙ୍କୁ ଯୋର ଜବରଦସ୍ତ ଦସ୍ତଖତ କରାଇନେଉଛନ୍ତି ପ୍ରଧାନ ଶିକ୍ଷୟିତ୍ରୀ । ପ୍ରଧାନ ଶିକ୍ଷୟିତ୍ରୀଙ୍କ ସ୍ୱାମୀ ସ୍କୁଲ କର୍ମଚାରୀ ହୋଇନଥିଲେ ହେଁ ପ୍ରତ୍ୟେକ ଦିନ ସ୍କୁଲକୁ ଆସି ବିଭିନ୍ନ କାମରେ ହସ୍ତକ୍ଷେପ କରୁଥିବାର ସଙ୍ଗୀନ୍ ଅଭିଯୋଗ ମଧ୍ୟ ହୋଇଛି ।
ତେବେ ଏନେଇ ସ୍କୁଲ କମିଟି ଓ ଗ୍ରାମବାସୀ ମିଳିତ ହୋଇ ଜିଲ୍ଲାପାଳଙ୍କୁ ଅଭିଯୋଗ କରିଥିଲେ । ଜିଲ୍ଲାପାଳ ଘଷିପୁରା ତହସିଲଦାରଙ୍କୁ ଘଟଣାର ତଦନ୍ତକରି ରିପୋର୍ଟ କରିବାକୁ ନିର୍ଦ୍ଦେଶ ଦେଇଥିଲେ । ହେଲେ ଏପର୍ଯନ୍ତ କୌଣସି ତଦନ୍ତ ନହେବାରୁ ଗ୍ରାମବାସୀମାନେ ଏଭଳି ପଦକ୍ଷପ ନେଇଛନ୍ତି । ସ୍କୁଲରେ ତାଲା ଲଗାଇ ବିଦ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି ଛାତ୍ରଛାତ୍ରୀ ଏବଂ ଗ୍ରାମବାସୀ ।
