ବେଙ୍ଗାଲୁରୁ: ବେଙ୍ଗାଲୁରୁର ରମେଶ୍ୱରମ୍ କାଫେରେ ହୋଇଥିବା ବିସ୍ଫୋରଣରେ ସମ୍ପୃକ୍ତ ଅଭିଯୁକ୍ତଙ୍କ ପ୍ରକୃତ ଫଟୋ ସାମ୍ନାକୁ ଆସିଛି । ଖବର ଅନୁଯାୟୀ ଏହି ମାମଲାରେ ଦୁଇ ଅଭିଯୁକ୍ତଙ୍କୁ ଚିହ୍ନଟ କରାଯାଇଛି । ଉଭୟ ଅଭିଯୁକ୍ତ ଶିବାମୋଗାର ଆଇଏସ୍ଆଇଏସ୍ ମଡ୍ୟୁଲ୍ ସହିତ ଜଡିତ ଥିବା ବେଳେ ପୂର୍ବରୁ ଅନ୍ୟ ଏକ ମାମଲାରେ ସଂପୃକ୍ତ ଥିଲେ । ମୁଖ୍ୟ ଅଭିଯୁକ୍ତ ମୁସାବିର ହୁସେନ୍ ଶାଜିବ କର୍ଣ୍ଣାଟକର ଶିବାମୋଗା ଜିଲ୍ଲା ଅନ୍ତର୍ଗତ ତିର୍ଥହାଲୀର ବାସିନ୍ଦା ।
ଦ୍ୱିତୀୟ ଅଭିଯୁକ୍ତ ଅବଦୁଲ ମାଥେରାନ୍ ତାହା ମଧ୍ୟ ତିର୍ଥହାଲୀରେ ରହେ । ଏନଆଇଏ ସୂତ୍ରରୁ ଜଣାପଡିଛି ଯେ ବିସ୍ଫୋରଣ ପୂର୍ବରୁ ଉଭୟ ଚେନ୍ନାଇର ତ୍ରିପ୍ଲିକାନରେ ଥିବା ଏକ ଲଜରେ ଥିଲେ । ବିସ୍ଫୋରଣ ପରେ ସେମାନେ ପୁଣି ଚେନ୍ନାଇକୁ ଫେରି ଯାଇଥିଲେ । ଶେଷ ଥର ପାଇଁ ତାମିଲନାଡୁର ସୀମାକୁ ଲାଗି ଆନ୍ଧ୍ରପ୍ରଦେଶର ନେଲ୍ଲୋର୍ରେ ଅଭିଯୁକ୍ତଙ୍କ ଠିକଣାର ସନ୍ଧାନ ମିଳିଛି । ଏନଆଇଏ ସନ୍ଦିଗ୍ଧ ବିସ୍ଫୋରଣକାରୀଙ୍କ ଚିତ୍ର ସୋସିଆଲ ମିଡିଆ ହ୍ୟାଣ୍ଡେଲ ଏକ୍ସରେ ପୋଷ୍ଟ କରିଥିଲା ।
ଏହା ସହ ଏନଆଇଏ ରାମେଶ୍ୱରମ କାଫେ ବିସ୍ଫୋରଣ ମାମଲାରେ ମୁଖ୍ୟ ଅଭିଯୁକ୍ତ ବିରୋଧରେ ପୁରସ୍କାର ରାଶି ଘୋଷଣା କରିଥିଲା । ସନ୍ଦିଗ୍ଧ ବିସ୍ଫୋରଣକାରୀଙ୍କ ବିଷୟରେ ସୂଚନା ପ୍ରଦାନ କଲେ ୧୦ ଲକ୍ଷ ଟଙ୍କା ପୁରସ୍କାର ଦିଆଯିବ ବୋଲି ଏନ୍ଆଇଏ ଘୋଷଣା କରିଛି । ମାର୍ଚ୍ଚ ୧ ତାରିଖରେ ବେଙ୍ଗାଲୁରୁର ବ୍ରୁକଫିଲ୍ଡରେ ଥିବା ରାମେଶ୍ୱରମ କାଫେ ଭିତରେ ଭୟଙ୍କର ବିସ୍ଫୋରଣ ଘଟିଥିଲା । ଏଥିରେ ୧୦ ଜଣ ଆହତ ହୋଇଥିଲେ । ଆଇଇଡି ଲଗାଇ ଏଠାରେ ବିସ୍ଫୋରଣ କରାଯାଇଥିବା ସନ୍ଦେହ କରାଯାଉଛି ।
ସେପଟେ ବିସ୍ଫୋରଣ ହେବାର ସପ୍ତାହ ପରେ ରାମେଶ୍ୱରମ କାଫେକୁ କଡା ସୁରକ୍ଷା ଭିତରେ ପୁଣି ଖୋଲା ଯାଇଥିଲା। କାଫେକୁ ଫୁଲରେ ସଜାଇବା ସହ ପୂଜାପାଠ ମଧ୍ୟ କରାଯାଇଥିଲା । ରାମେଶ୍ୱରମ କ୍ୟାଫେର ସୁରକ୍ଷା ଉପରେ ଗୁରୁତ୍ବ ଦିଆଯାଇଥିବା ବେଳେ ମେଟାଲ ଡିଟେକ୍ଟର ଲଗାଯାଇଛି ।