ଭୁବନେଶ୍ୱର,୨୪/୦୩: ମାତ୍ର ୨ହଜାର ଟଙ୍କା ଲାଞ୍ଚ ନେବା ଏସ୍ଆଇଙ୍କୁ ପଡିଲା ମହଙ୍ଗା। ସହିଦନଗର ଥାନାର ଏସ୍ଆଇ ପ୍ରିୟବ୍ରତ ପ୍ରଧାନଙ୍କୁ ନିଲମ୍ବିତ କଲେ ପୋଲିସ କମିଶନର ସଞ୍ଜୀବ ପଣ୍ଡା । ଶନିବାର ଜଣେ ବ୍ୟକ୍ତିଙ୍କ ଡ୍ରାଇଭିଂ ଲାଇସେନ୍ସ (ଡିଏଲ୍) ଫେରସ୍ତ କରିବାକୁ ଲାଞ୍ଚ ନେଉଥିବା ସମୟରେ ଧରିଥିଲା ଭିଜିଲାନ୍ସ ଟିମ୍। ତାଙ୍କ ଠାରୁ ଲାଞ୍ଚ ଟଙ୍କା ଜବତ କରିଛି ଭିଜିଲାନ୍ସ । ଏହି ଘଟଣା ପ୍ରିୟବ୍ରତ ପ୍ରଧାନଙ୍କୁ ସସ୍ପେଣ୍ଡ ହୋଇଛନ୍ତି।
ସୂଚନା ମୁତାବକ, କିଛି ଦିନ ତଳେ ଥାନା ଅଞ୍ଚଳରେ ସହିଦନଗର ପୁଲିସ୍ ବ୍ଲକିଂ କରି ଚେକିଂ କରୁଥିଲା । ଏହି ସମୟରେ ମଦ୍ୟପାନ କରି ଯେଉଁମାନେ ଗାଡ଼ି ଚଳାଉଥିଲେ ସେମାନଙ୍କ ଗାଡ଼ି ଓ ଡିଏଲ୍ ଜବତ କରୁଥିଲା । ମଦ୍ୟପ ଗାଡ଼ି ଚାଳକଙ୍କ ବିରୋଧରେ ମାମଲା ମଧ୍ୟ ରୁଜୁ କରୁଥିଲା ପୁଲିସ୍ । ଜଣେ ଗାଡ଼ି ଚାଳକ ଜଣଙ୍କ କୋର୍ଟଙ୍କ ଦ୍ୱାରସ୍ଥ ହୋଇ ଗାଡ଼ି ରିଜିଲ୍ କରାଇଥିଲେ । ହେଲେ ଡିଏଲ୍ ଫେରାଇ ନଥିଲେ ଏସ୍ଆଇ ପ୍ରିୟବ୍ରତ । ସେଥିପାଇଁ ୫ ହଜାର ଟଙ୍କା ମାଗିଥିଲେ । ଗତ ୨୧ ତାରିଖ ଦିନ ୩ ହଜାର ଟଙ୍କା ନେଇଥିଲେ । ହେଲେ ଡିଏଲ୍ ଫେରସ୍ତ କରି ନଥିଲେ । ବାକି ୨ହଜାର ଟଙ୍କା ଦେଲେ ଡିଏଲ୍ ମିଳିବ ବୋଲି କହିଥିଲେ ଏସ୍ଆଇ ।
ଏହା ପରେ ସଂପୃକ୍ତ ବ୍ୟକ୍ତି ଶୁକ୍ରବାର ଏ ବିଷୟରେ ଭିଜିଲାନ୍ସ ଏସ୍ପି ଅନୁପମା ଜେମ୍ସଙ୍କୁ ଜଣାଇଥିଲେ । ତା’ପରେ ଏସ୍ଆଇଙ୍କୁ ଧରିବାକୁ ଯୋଜନା କରିଥିଲେ ଭିଜିଲାନ୍ସ । ଶନିବାର ସନ୍ଧ୍ୟା ବେଳେ ଥାନା କ୍ୟାମ୍ପସ୍ ଭିତରେ ବାକି ୨ ହଜାର ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ତାଙ୍କୁ ଗିରଫ କରିଥିଲା । ଏହାପରେ ତାଙ୍କ ଥାନା ଦପ୍ତର ଓ ଘରେ ଭିଜିଲାନ୍ସ ଚଢ଼ଉ କରିଥିଲା । ଏହି ଘଟଣା ଆକ୍ସନ୍ ମୋଡ୍ ଆସିଥିଲା ପୋଲିସ କମିଶନର। ସହିଦନଗର ଥାନାର ଏସ୍ଆଇ ପ୍ରିୟବ୍ରତ ପ୍ରଧାନଙ୍କୁ ସସ୍ପେଣ୍ଡ କରିଛନ୍ତି ସଞ୍ଜୀବ ପଣ୍ଡା।
ଉଲ୍ଲେଖଯୋଗ୍ୟ ଯେ, ସହିଦନଗର ଥାନା ପୁଲିସ୍ ଲାଞ୍ଚ ନେଇ ଧରାପଡ଼ିବା ୮ ମାସ ଭିତରେ ଏହା ଦ୍ୱିତୀୟ ଘଟଣା । ଗତ ଜୁଲାଇ ମାସରେ ଉକ୍ତ ଥାନାର ଏଏସ୍ଆଇ ମମତା ବସ୍ତିଆ ଜଣେ ବରିଷ୍ଠ ନାଗରିକଙ୍କୁ ଗିରଫ କରି ଜେଲ୍ ପଠାଇ ଦେବାକୁ ଧମକ ଦେଇ ତାଙ୍କ ଠାରୁ ୧୫ ହଜାର ଟଙ୍କା ଲାଞ୍ଚ ମାଗୁଥିଲେ । ବଡ଼କଥା ହେଲା ସଂପୃକ୍ତ ଏଏସ୍ଆଇ ବରିଷ୍ଠ ନାଗରିକଙ୍କ ଘରକୁ ଯାଇ ଲାଞ୍ଚ ଟଙ୍କା ନେଉଥିଲେ । ୧୫ ହଜାର ଟଙ୍କା ଗଣୁଥିବା ସମୟରେ ଭିଜିଲାନ୍ସ ତାଙ୍କୁ ଗିରଫ କରିଥିଲା ।
ନିୟମ କହୁଛି, ଲାଞ୍ଚ ନେଇ ଯେଉଁମାନେ ଗିରଫ ହୁଅନ୍ତି ସେମାନଙ୍କୁ ଥାନ, ଫାଣ୍ଡିରେ ଡ୍ୟୁଟି ଦେବା ଅନୁଚିତ । ହେଲେ କମିଶନରେଟ୍ ପୁଲିସ୍ରେ ଅନେକ ଲାଞ୍ଚୁଆ ଅଫିସର ଥାନାଫାଣ୍ଡିରେ କାର୍ଯ୍ୟ କରୁଛନ୍ତି । ତା’ଛଡା ନିର୍ବାଚନ କମିଶନରଙ୍କ ଗାଇଡ୍ ଲାଇନ୍ରେ ମଧ୍ୟ ରହିଛି ଲାଞ୍ଚୁଆ ଅଫିସର ଥାନା ଫାଣ୍ଡିରେ ରହି ଫିଲ୍ଡ ଡ୍ୟୁଟି କରିପାରିବେ ନାହିଁ । ହେଲେ କମିଶନରେଟ୍ ପୁଲିସ୍ରେ ବରିଷ୍ଠ ଅଧିକାରୀମାନେ ସବୁ ନିୟମକୁ ଦଳିମକଚି ଚାଲିଛନ୍ତି । ବର୍ତ୍ତମାନ ୨୦ରୁ ଅଧିକ ଏଭଳି ଅଧିକାରୀ ଓ କର୍ମଚାରୀ କମିଶନରେଟ୍ ପୁଲିସ୍ରେ ଅଛନ୍ତି ।
