କଟକ,୦୪/୦୪: ଦୀର୍ଘ ୧୧ ବର୍ଷ ଲମ୍ବା ପ୍ରତୀକ୍ଷାର ଅବସାନ ଘଟିଛି । ଏସ୍ସିବି ମେଡିକାଲ୍ କଲେଜରେ ବୁଧବାର ପ୍ରଥମ ଥର ପାଇଁ ହୋଇଛି ଲିଭର୍ ବା ଯକୃତ ପ୍ରତିରୋପଣ । ସଫଳତାର ସହ ଲିଭର ପ୍ରତିରୋପଣ କରି ଏସ୍ସିବି ଏକ ନୂଆ ଇତିହାସ ସୃଷ୍ଟି କରିଛି । ପତ୍ନୀଙ୍କ ଲିଭର୍ ପ୍ରତିରୋପଣ ହୋଇଛି ସ୍ୱାମୀଙ୍କ ଶରୀରରେ । ହାଇଦ୍ରାବାଦସ୍ଥିତ ଏସିଆନ୍ ଇନଷ୍ଟିଚ୍ୟୁଟ୍ ଅଫ୍ ଗ୍ୟାଷ୍ଟ୍ରୋଏଣ୍ଟେରୋଲୋଜି (ଏଆଇଜି)ର ଖ୍ୟାତନାମା ବିଶେଷଜ୍ଞଙ୍କ ତତ୍ତ୍ୱାବଧାନରେ ଲିଭର ପ୍ରତିରୋପଣ ସଂକ୍ରାନ୍ତ ଅସ୍ତ୍ରୋପଚାର ସଫଳତାର ସହ ଶେଷ ହୋଇଛି ବୋଲି ଏସ୍ସିବି ଅଧୀକ୍ଷକ ପ୍ରଫେସର ସୁଧାଂଶୁ ଶେଖର ମିଶ୍ର କହିଛନ୍ତି ।
ଉଲ୍ଲେଖଯୋଗ୍ୟ, ରାଜ୍ୟରେ ପ୍ରଥମ ଲିଭର ପ୍ରତିରୋପଣ ଭୁବନେଶ୍ୱରର ସମ୍ ହସ୍ପିଟାଲରେ ୨୦୨୦ ମାର୍ଚ୍ଚ ୫ ରେ ସଫଳତାର ସହ ସମ୍ପନ୍ନ ହୋଇଥିଲା । ଏହାର କିଛି ମାସ ପରେ ସମ୍ରେ ଦ୍ୱିତୀୟ ଥର ମଧ୍ୟ ଲିଭର ପ୍ରତିରୋପଣରେ ସଫଳତା ମିଳିଥିଲା ।
ବୁଧବାର ଏସ୍ସିବିରେ ଲିଭର ପ୍ରତିରୋପଣ ହୋଇଥିବା ରୋଗୀ ଜଣକ କଟକ ଜିଲ୍ଲା ତିଗିରିଆ ଅନ୍ତର୍ଗତ ଗଦାଧରପୁର ଅଞ୍ଚଳରେ ବୋଲି ସୂଚନା ମିଳିଛି । ରୋଗୀଙ୍କ ନାମ ଗୋପନ ରଖଯାଇଥିଲେ ହେଁ ତାଙ୍କ ବୟସ ୪୫ବର୍ଷ ହେବ ବୋଲି ସୂଚନା ମିଳିଛି । ସେହିପରି ଲିଭରଦାତା ଜଣକ ହେଲେ ସଂପୃକ୍ତ ରୋଗୀଙ୍କ ପତ୍ନୀ । ତାଙ୍କ ବୟସ ୩୫ବର୍ଷ ବୟସ । ରୋଗୀ ଜଣକ ୩ ବର୍ଷରୁ ଅଧିକ ସମୟ ହେବ ଲିଭର୍ ସିରୋସିସ୍ରେ ଆକ୍ରାନ୍ତ ହୋଇଥିଲେ । ତାଙ୍କ ଲିଭର ନଷ୍ଟ ହୋଇଯାଇଥିବାରୁ ଜୀବନ ପ୍ରତି ବିପଦ ସୃଷ୍ଟି ହୋଇଥିଲା ।
ସଂପୃକ୍ତ ରୋଗୀଙ୍କ ଜୀବନ ରକ୍ଷା ପାଇଁ ଏସ୍ସିବିରେ ଲିଭର ପ୍ରତିରୋପଣ ପାଇଁ ନିଷ୍ପତ୍ତି ହୋଇଥିଲା । ତାଙ୍କ ପତ୍ନୀ ଲିଭର ଦାନ କରିବେ ସ୍ୱୀକୃତି ପ୍ରଦାନ କରିଥିଲେ । ଏଥିଲାଗି ପ୍ରାୟ ୬ମାସ ହେଲା ସରକାରୀ ସ୍ତରରେ କାଗଜପତ୍ର ପ୍ରସ୍ତୁତି ଚାଲିଥିଲା । ଲିଭର ପ୍ରତିରୋପଣ ପାଇଁ ଅଥରାଇଜେସନ୍ କମିଟି ଅନୁମୋଦନ ଦେବା ପରେ ଗତ ମାସରୁ ରୋଗୀଜଣକ ଏସ୍ସିବି ହେପାଟୋଲୋଜି ବିଭାଗରେ ଭର୍ତ୍ତି ହୋଇଥିଲେ । ସେବେଠାରୁ ସେ ଡାକ୍ତରୀ ଟିମ୍ ତତ୍ତ୍ୱାବଧାନରେ ରହିଥିଲେ । ଏଆଇଜି ଟିମ୍ ମଧ୍ୟ ଦୁଇ ଥର ଆସି ସଂପୃକ୍ତ ରୋଗୀଙ୍କର ସମସ୍ତ ସ୍ୱାସ୍ଥ୍ୟ ପରୀକ୍ଷା ନିରୀକ୍ଷା କରାଇଥିଲେ । ଫିଟ୍ ଘୋଷିତ ହେବା ପରେ ଲିଭର ପ୍ରତିରୋପଣ ପାଇଁ ନିଷ୍ପତ୍ତି ନିଆଯାଇଥିଲା ।
ବୁଧବାର ସକାଳ ୭ଟାରୁ ଅସ୍ତ୍ରୋପଚାର ଆରମ୍ଭ ହୋଇଥିଲା । ଓଟିକୁ ପ୍ରଥମେ ଲିଭରଦାତା ତଥା ରୋଗୀଙ୍କ ପତ୍ନୀଙ୍କୁ ନିଆଯାଇଥିଲା । ପତ୍ନୀଙ୍କ ଲିଭରରୁ ୭୦ ଭାଗ କାଟି କଢ଼ାଯାଇଥିଲା । ଉକ୍ତ ଲିଭରକୁ ନେଇ ସ୍ୱାମୀଙ୍କ ଶରୀରରେ ପ୍ରତିରୋପଣ କରାଯାଇଥିଲା । ରୋଗୀଙ୍କର ନଷ୍ଟ ହୋଇଥିବା ଲିଭରକୁ ସମ୍ପୂର୍ଣ୍ଣ ବାହାର କରାଯିବା ପରେ ପତ୍ନୀଙ୍କ ଲିଭରରୁ ଆସିଥିବା ୭୦ ଭାଗ ଅଂଶକୁ ପ୍ରତିରୋପଣ କରାଯାଇଥିଲା । ପତ୍ନୀଙ୍କ ଲିଭରରୁ ୭୦ ଭାଗ କାଢ଼ି ନିଆଯାଇଥିଲେ ମଧ୍ୟ ତାହା ୬ ମାସ ମଧ୍ୟରେ କଟାଯାଇଥିବା ଅଂଶ ଭରଣା ହୋଇଯିବ ବୋଲି ବିଭାଗୀୟ ବିଶେଷଜ୍ଞ କହିଛନ୍ତି । ସେହିପରି ରୋଗୀଙ୍କ ଦେହରେ ପ୍ରତିରୋପଣ ହୋଇଥିବା ଲିଭର ଧିରେ ଧିରେ ଗ୍ରହଣ ହେବ । ଏଥିଲାଗି ପ୍ରାୟ ୬ମାସ ସମୟ ଲାଗିବା କଥା ବୋଲି ବିଶେଷଜ୍ଞମାନେ କହିଛନ୍ତି । ଏହା ସମ୍ପୃକ୍ତ ରୋଗୀଙ୍କ ରୋଗ ପ୍ରତିରୋଧକ ଶକ୍ତି ଉପରେ ନିର୍ଭର କରିବ ବୋଲି ଡାକ୍ତର କହିଛନ୍ତି । ପ୍ରତିରୋପଣ ପରେ ଉଭୟ ପତି-ପତ୍ନୀ ଆଇସିୟୁରେ ଥିଲେ ମଧ୍ୟ ସେମାନେ ବିପଦମୁକ୍ତ ଅଛନ୍ତି ବୋଲି ମେଡିକାଲ୍ ପକ୍ଷରୁ ସୂଚନା ଦିଆଯାଇଛି । କିଛି ଦିନ ଉଭୟ ଡାକ୍ତରୀ ଟିମ୍ ତତ୍ତ୍ୱାବଧାନରେ ରହିବେ ବୋଲି କୁହାଯାଉଛି ।
ସୂଚନାଥାଉକି, ଏସ୍ସିବିରେ ଲିଭର ପ୍ରତିରୋପଣ ପାଇଁ ୨୦୧୩ ରେ ରାଜ୍ୟ ସରକାର ନିଷ୍ପତ୍ତି ନେଇଥିଲେ । ଏଥିଲାଗି ଆନୁଷଙ୍ଗିକ ଭିତ୍ତିଭୂମି ପ୍ରସ୍ତୁତ କରାଯାଇଥିଲା । ଡାକ୍ତର ଓ ସ୍ୱାସ୍ଥ୍ୟକର୍ମୀଙ୍କୁ ବିଭିନ୍ନ ପର୍ଯ୍ୟାୟରେ ରାଜ୍ୟ ବାହାରକୁ ତାଲିମ ପାଇଁ ପଠାଯାଇଥିଲା । ଏହା ସତ୍ତେ୍ୱ ବିଭିନ୍ନ କାରଣରୁ ଏହା ବିଳମ୍ବିତ ହୋଇଚାଲିଥିଲା । ଏପରିକି ଦୁଇ ବର୍ଷ ତଳେ ଲିଭର ପ୍ରତିରୋପଣ ପାଇଁ ରୋଗୀ ଓ ଲିଭରଦାତାଙ୍କ ନାମ ପଞ୍ଜୀକରଣ କରାଯାଇଥିଲା । ଏଆଇଜି ଟିମ୍ ମଧ୍ୟ ଏକାଧିକବାର ଏସ୍ସିବି ଆସି ସ୍ଥିତି ଅନୁଧ୍ୟାନ କରିଥିଲେ । ବିଳମ୍ବରେ ହେଲେ ମଧ୍ୟ ଆଜି ଲିଭର ପ୍ରତିରୋପଣ ହୋଇଥିବାରୁ ଆନନ୍ଦ ପ୍ରକାଶ ପାଇଛି
