ନୂଆଦିଲ୍ଳୀ: ଭାରତର ପଡ଼ୋଶୀ ଦେଶ ବାଂଲାଦେଶରେ ଏବେ ସ୍ଥିତି ଅଣାୟତ୍ତ । ପ୍ରଧାନମନ୍ତ୍ରୀ ଶେଖ ହସିନା ଇସ୍ତଫା ଦେବା ପରେ ଭାରତରେ ଶରଣ ନେଇଛନ୍ତି । ବାଂଲାଦେଶର ସ୍ଥିତି ସଂପର୍କରେ ମଙ୍ଗଳବାର ବୈଦେଶିକ ମନ୍ତ୍ରୀ ଏସ ଜୟଶଙ୍କର ରାଜ୍ୟସଭାରେ କହିଛନ୍ତି ଯେ, ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା ବହୁତ କମ୍‌ ସମୟ ମଧ୍ୟରେ ଭାରତ ଆସିବାକୁ ମଞ୍ଜୁରି ମାଗିଥିଲେ । ଏହା ପରେ ସେ ଗତାକାଲି (ସୋମବାର) ସଂଧ୍ୟା ୫ରେ ଦିଲ୍ଲୀ ପହଞ୍ଚିଥିଲେ । 

 ଏସ ଜୟଶଙ୍କର ରାଜ୍ୟସଭାରେ କହିଛନ୍ତି, ବାଂଲାଦେଶର ପରିସ୍ଥିତି ଉପରେ ଭାରତ ସରକାର ନଜର ରଖିଛନ୍ତି । କମ୍‌ ସମୟ ମଧ୍ୟରେ ଶେଖ ହସିନା ଭାରତକୁ ଆସିବାକୁ ଅନୁମତି ମାଗିଥିଲେ । କିଛି ସମୟ ଭାରତରେ ରହିବାକୁ ତାଙ୍କ ଅନୁରୋଧକୁ ଭାରତ ସରକାର ସ୍ବୀକାର କରିଥିଲେ । ଏହା ସହ ଭାରତ ସରକାର ବାଂଲାଦେଶର ଅଧିକାରୀଙ୍କ ସହ ସଂପର୍କରେ ରହିଛନ୍ତି । ସେ ଆହୁରି କହିଛନ୍ତି ଯେ, ‘ଗତ ୨୪ ଘଣ୍ଟା ହେଲା ଆମେ ଢ଼ାକାର ଅଧିକାରୀଙ୍କ ସହ ଯୋଗାଯୋଗରେ ରହିଛୁ । ମହତ୍ବପୂର୍ଣ୍ଣ ପଡ଼ୋଶୀ ଦେଶର ସମ୍ବେଦନଶୀଳ ପରିସ୍ଥିତି ସମୟରେ ରାଜ୍ୟସଭାରେ ମୁଁ ସମର୍ଥନ ମାଗୁଛି । ଏହା ଉପରେ ସର୍ବଦା ଏକ ମଜଭୁତ ରାଷ୍ଟ୍ରୀୟ ସହମତି ରହିଆସିଛି ।’ 

ଏହା ସହ ଜୟଶଙ୍କର କହିଛନ୍ତି, ବଂଲାଦେଶରେ ସଂଖ୍ୟାଲଘୁଙ୍କ ଉପରେ ଭାରତ ସରକାର ନଜର ରଖିଛନ୍ତି । ସ୍ଥାନୀୟ ଗଣମାଧ୍ୟମ ଅନୁସାରେ, ଶେଖ ହସିନା ଦେଶ ଛାଡ଼ିବା ପରେ ସେଠାରେ ହିନ୍ଦୁ ମନ୍ଦିର ଉପରେ ଆକ୍ରମଣ ହୋଇଛି । ସେପଟେ ଦେଶର ସୁରକ୍ଷାକୁ ନେଇ ଜୟଶଙ୍କର କହିଛନ୍ତି, କିଛି ଗ୍ରୁପ୍‌ ଏବଂ ସଂଗଠନ ସୁରକ୍ଷା ସୁନିଶ୍ଚିତ କରିବାକୁ ଚେଷ୍ଟା କରୁଛନ୍ତି । ଏହା ସହ ସୀମା ସୁରକ୍ଷା ବଳ (ବିଏସଏଫ୍‌)କୁ ଆଲର୍ଟରେ ରହିବାକୁ ନିର୍ଦ୍ଦେଶ ଦିଆଯାଇଛି । ରାଜ୍ୟସଭାକୁ ସମ୍ବୋଧିତ କରି ବୈଦେଶିକ ମନ୍ତ୍ରୀ କହିଛନ୍ତି, ‘୧୯ ହଜାର ଭାରତୀୟ ନାଗରିକ ବାଂଲାଦେଶରେ ଫସି ରହିଛନ୍ତି । ସେମାନଙ୍କ ମଧ୍ୟରେ ପ୍ରାୟ ୯୦୦୦ ଭାରତୀୟ ଛାତ୍ର ଅଛନ୍ତି । କେତେକ ଛାତ୍ର ଜୁଲାଇରେ ଭାରତ ଫେରିଆସିଥିଲେ ।’