ଟୋକିଓ: ଜାପାନରେ ଏବେ ନାଁକୁ ନେଇ ଚିନ୍ତା ବୃଦ୍ଧି ପାଇଛି । ଆଉ ୫୦୦ ବର୍ଷ ମଧ୍ୟରେ ଜାପାନରେ ପ୍ରତିଟି ବ୍ୟକ୍ତିଙ୍କ ସାଙ୍ଗିଆ ସମାନ ହେବାକୁ ଯାଉଛି । ଟୋହୋକୁ ବିଶ୍ବବିଦ୍ୟାଳୟ ପ୍ରଫେସର ହିରୋଶି ୟୋଶିଦାଙ୍କ ନେତୃତ୍ବରେ ହୋଇଥିବା ଗବେଷଣାରୁ ଏହା ଜଣାପଡ଼ିଛି । ଗବେଷଣାର ତଥ୍ୟ ଅନୁସାରେ, ୨୫୩୧ ବେଳକୁ ଜାପାନର ସସମ୍ତ ଲୋକଙ୍କ ଶେଷ ନାମ ବା ସାଙ୍ଗିଆ ସମାନ ହୋଇଯିବ । ଜାପାନରେ ପ୍ରଚଳିତ ପ୍ରଥା, ଆନୁମାନିକ ତଥ୍ୟ ଏବଂ ବର୍ତ୍ତମାନର ଲୋକଙ୍କ ଚାଲିଚଳନକୁ ନେଇ ଏହି ଗବେଷଣାତ୍ମକ ରିପୋର୍ଟ ପ୍ରକାଶ ପାଇଛି ।
୫୦୦ ବର୍ଷ ପରେ ଜାପାନର ପ୍ରତିଟି ନାଗରିକଙ୍କ ସାଙ୍ଗିଆ ‘ସାତୋ-ସାନ’ ହୋଇଯାଇଥିବ ବୋଲି ହିରୋଶି ୟୋଶିଦା କହିଛନ୍ତି । ହୁଏତ ସେତେବେଳକୁ ସାଙ୍ଗିଆ ବ୍ୟବହାର କରି ବ୍ୟକ୍ତିଙ୍କୁ ଡାକିବା ସହଜ ହେବ ନାହିଁ । ଫଳରେ ମୂଳ ନାମରେ ଲୋକଙ୍କୁ ଚିହ୍ନିବାକୁ ହେବ ବୋଲି ସେ ଦାବି କରିଛନ୍ତି । ବର୍ତ୍ତମାନ ପରିସ୍ଥିତିରେ ସାତୋ-ସାନ୍ ସାଙ୍ଗିଆ ଖୁବ ଅଧିକ ବ୍ୟବହାର ହେଉଛି । ୧୨୫ ମିଲିୟନ୍ ଜନସଂଖ୍ୟାରୁ ଦେଢ଼ ପ୍ରତିଶତ ଲୋକଙ୍କ ସାଙ୍ଗିଆ ଏବେ ସାତୋ-ସାନ୍ ରହିଛି । ଏହା ପରେ ଦ୍ବିତୀୟ ସ୍ଥାନରେ ରହିଛି ‘ସୁଜୁକି’ । ଏପ୍ରିଲ ୧ରେ ଯେତେବେଳେ ଏହି ରିପୋର୍ଟ ପ୍ରକାଶ ପାଇଥିଲା ସେବେ ଏହାକୁ ଏକ ପ୍ରାଙ୍କ ବୋଲି ଲୋକେ ଭାବୁଥିଲେ । ହେଲେ ଏହି ପରିସ୍ଥିତିକୁ ଗୁରୁତର ସହ ନେବାକୁ ଅପିଲ କରିଛନ୍ତି ହିରୋଶି ୟୋଶିଦା ।
ହିରୋଶି ୟୋଶିଦାଙ୍କ ଅନୁସାରେ ସରନେମ୍(ସାଙ୍ଗିଆ) ସମାନ ହୋଇଗଲେ, ପ୍ରତିଟି ବ୍ୟକ୍ତିଙ୍କ ସାମାଜିକ ସ୍ଥିତି ବିଗିଡ଼ିଯିବ । ଏହା ଦ୍ବାରା ସାଂସ୍କୃତିକ, ଆଞ୍ଚଳିକ ଏବଂ ପାରିବାରିକ ବିବିଧତା ସମାପ୍ତ ହୋଇଯିବ । ତେବେ ସାତୋ-ସାନ୍ ସାଙ୍ଗିଆ ୨୦୨୨ ଏବଂ ୨୦୨୩ ଏକ ହଜାର ଗୁଣରୁ ଅଧିକ ବୃଦ୍ଧି ପାଇଛି । ୨୪୪୬ ମସିହା ବେଳକୁ ଅଧାରୁ ଅଧିକ ଜାପାନ ନାଗରିକଙ୍କ ସାଙ୍ଗିଆ ସାତୋ-ସାନ ହୋଇସାରିଥିବ ବୋଲି ରିପୋର୍ଟରେ ଦର୍ଶାଯାଇଛି । ଏହି ହାରରେ ସାତୋ-ସାନ ସାଙ୍ଗିଆର ବ୍ୟବହାର ବୃଦ୍ଧି ପାଇଲେ ୨୫୩୧ ବେଳକୁ ସବୁ ଲୋକଙ୍କ ସାଙ୍ଗିଆ ସମାନ ହୋଇଯିବ ବୋଲି ଦାବି ହୋଇଛି ।
ଏଭଳି ଅସୁବିଧା ପାଇଁ ଜାପାନର ସାମାଜିକ ନିୟମ ଦାୟୀ । କାରଣ ଏଠାରେ ବିବାହ କରିବା ପରେ ମହିଳାଙ୍କ ସାଙ୍ଗିଆ ପରିବର୍ତ୍ତନ ହେବାର ନିୟମ ରହିଛି । ଦେଶର ୯୫ ପ୍ରତିଶତ ବିବାହିତ ମହିଳାଙ୍କ ସାଙ୍ଗିଆ ପରିବର୍ତ୍ତନ ହୋଇଥାଏ । କିନ୍ତୁ ଏବେ ଏହି ଟ୍ରେଣ୍ଡ ବଦଳିଛି ଏବଂ ବିବାହ ପରେ ମଧ୍ୟ ଦମ୍ପତିଙ୍କ ଭିନ୍ନ ଭିନ୍ନ ସାଙ୍ଗିଆ ରଖିବା ଉପରେ ଲୋକଙ୍କ ସମର୍ଥନ ମିଳୁଛି । ସେପଟେ ଜାପାନ ରାଜନୀତିରେ ମଧ୍ୟ ସାଙ୍ଗିଆ ବିବାଦ ମୁଖ୍ୟ ପ୍ରସଙ୍ଗ ପାଲଟିଛି ।
