ଭୁବନେଶ୍ୱର, ୨୮/୦୮ : ଏଣିକି ଓଡ଼ିଶାରେ ବନ୍ୟଜନ୍ତୁ ଶିକାରୀଙ୍କୁ ତ୍ରାହି ମିଳିବନି । ଏନଫୋର୍ସମେଣ୍ଟ ସ୍କ୍ୱାଡ୍ ନଜରରୁ ଖସିଗଲେ ବି ସେମାନଙ୍କ ପାଦଚିହ୍ନକୁ ଶୁଙ୍ଘି ଘଞ୍ଚ ଜଙ୍ଗଲରୁ କାବୁ କରିବେ ସନ୍ଧାନୀ କୁକୁର । ଖାଲି ସେତିକି ନୁହେଁ, ଏହି ତାଲିମ୍ପ୍ରାପ୍ତ କୁକୁରଗୁଡି଼କ ଜଙ୍ଗଲରେ ଲୁଚାଯାଇଥିବା ବିସ୍ଫୋରକ ସାମଗ୍ରୀ ସହ ବାଘଛାଲ, ହାତୀ ଦାନ୍ତ, ଜଙ୍ଗଲୀ ମାଂସକୁ ଠାବ କରିବେ । ଜଙ୍ଗଲରେ ଫସି ଯାଇଥିବା ଆଘାତପ୍ରାପ୍ତ ବନ୍ୟଜନ୍ତୁଙ୍କୁ ଉଦ୍ଧାର କାମରେ ଲାଗିବେ । ଏହି ଉଦ୍ଦେଶ୍ୟରେ ବନ ବିଭାଗ ପ୍ରଥମେ ୧୦ଟି ଉଚ୍ଚ ତାଲିମ୍ପ୍ରାପ୍ତ କୁକୁର ଆଣିବାକୁ ଯୋଜନା କରିଛି । ପ୍ରଥମ ଦଫାରେ ବାରିପଦା, ବାଲେଶ୍ୱର, ଅନୁଗୁଳ, ଢ଼େଙ୍କାନାଳ, ହୀରାକୁଦ ଭଳି ୭ଟି ବନଖଣ୍ଡରେ ସନ୍ଧାନୀ କୁକୁର ନିୟୋଜିତ ହେବେ । ଏ ବାବଦରେ ଟେଣ୍ଡର ଡକାଯାଇଛି । ଆସନ୍ତା ଶୀତଋତୁ ବେଳକୁ ଜଙ୍ଗଲରେ ଶିକାରୀ ଖୋଜିବେ ସନ୍ଧାନୀ କୁକୁର ।
ମୁଖ୍ୟ ବନ ସଂରକ୍ଷକ (ବନ୍ୟଜନ୍ତୁ) ସୁଶାନ୍ତ ନନ୍ଦ କହିଛନ୍ତି, ବନ୍ୟଜନ୍ତୁ ତସ୍କରମାନେ ବିସ୍ଫୋରକ ସାମଗ୍ରୀ ଖଞ୍ଜୁଛନ୍ତି, ଯାହାକୁ ଖାଇଦେବାରୁ ବିଗତ ଦିନରେ ୩ଟି ହାତୀଙ୍କ ଅକାଳ ମୃତ୍ୟୁ ଘଟିଛି । ତେବେ ସନ୍ଧାନୀ କୁକୁର ସହଜରେ ଏହି ବିସ୍ଫୋରକ ଚିହ୍ନଟ କରିପାରିବେ । ଚୟନ ବେଳେ ‘ବେଲଜିଆନ୍ ମାଲିନୋସ୍’ କୁକୁରଙ୍କୁ ହିଁ ପ୍ରଧାନ୍ୟ ଦିଆଯିବ । ଯୋଗ୍ୟ ବିବେଚିତ କୁକୁରଙ୍କୁ ପ୍ରଥମେ ଦେଢ଼ ମାସ ତାଲିମ୍ ଦିଆଯିବ । ପରେ ସେମାନଙ୍କୁ ଅଭୟାରଣ୍ୟରେ ଛଡ଼ାଯିବ । ୬ ମାସ ଯାଏଁ କୁକୁରଗୁଡି଼କର ଶିକାର କରିବାର ଯୋଗ୍ୟତା ମପାଯିବ । ଏଭଳି ସନ୍ଧାନୀ କୁକୁର ନିୟୋଜନ କରିବାରେ ଓଡି଼ଶା ପ୍ରଥମ ରାଜ୍ୟ ହେବ । ପ୍ରତିଟି କୁକୁର କେନେଲ୍ କ୍ଲବ ଅଫ୍ ଇଣ୍ଡିଆ (କେସିଆଇ) ଦ୍ୱାରା ପଞ୍ଜିକୃତ ହୋଇଥିବେ । କୁକୁର ବୟସ ବର୍ଷେରୁ ଦେଢ଼ ବର୍ଷ ଭିତରେ ହୋଇଥିବ। କୁକୁର ଦେହରେ ଗୋଟିଏ ମାଇକ୍ରୋଚିପ୍ ଲାଗିବ, ଏହା ଦ୍ୱାରା ଘଞ୍ଚ ଜଙ୍ଗଲରୁ କୁକୁରକୁ ସହଜରେ ଖୋଜାଯାଇ ପାରିବ।
ଯୋଗାଣକାରୀ ସଂସ୍ଥାର ଅତିକମ୍ରେ ୧୦ ବର୍ଷ ଧରି ତାଲିମ୍ପ୍ରାପ୍ତ କୁକୁର ଯୋଗାଇବାର ଅଭିଜ୍ଞତା ରହିବା ଦରକାର । ଉକ୍ତ ସଂସ୍ଥା କୁକୁରକୁ ତାଲିମ୍ ଦେଉଥିବା ନେଇ ଭାରତୀୟ କିମ୍ବା ବିଦେଶୀ ସରକାରୀ ସଂସ୍ଥାନରୁ ଅନୁମତି ପାଇଥିବ । ସଂସ୍ଥାଟି ପୂର୍ବରୁ କେନ୍ଦ୍ର ଓ ରାଜ୍ୟ ସରକାରଙ୍କ ସେନା, ପୁଲିସ, ଅବକାରୀ ଓ ଜଙ୍ଗଲ ବିଭାଗକୁ ତାଲିମ୍ପ୍ରାପ୍ତ କୁକୁର ଯୋଗାଇଥିବ । ୩ ବର୍ଷ ଧରି ଉକ୍ତ ସଂସ୍ଥାର ବାର୍ଷିକ ଆର୍ଥିକ କାରବାର କୋଟିଏ ଟଙ୍କା ଉପରକୁ ହୋଇଥିବ । ଶିମିଳିପାଳ ଅଭୟାରଣ୍ୟରେ ୨ଟା ‘ଜର୍ମାନ୍ ସେଫର୍ଡ’ କୁକୁର ମୁତୟନ କରାଯାଇଛି । ଏମାନଙ୍କୁ ‘ଟ୍ରାଫିକ୍ ଇଣ୍ଡିଆ’ ସଂସ୍ଥା ଯୋଗାଇଥିଲା । ବର୍ଷେ ଧରି ୨ଟି କୁକୁର ଶିକାରୀଙ୍କୁ ଖୋଜି ବାହାର କରୁଛନ୍ତି ।
