ନୂଆଦିଲ୍ଲୀ, ୨୬।୧୧: ସାଧାରଣତଃ ଶୀତଦିନେ ଆମ ଶରୀରରେ ବିଭିନ୍ନ ଅଂଶରେ ଶୁଷ୍କତା ଅନୁଭବ ହୋଇଥାଏ । ବିଶେଷ କରି ଗୋଇଠି ଅଧିକ ଶୁଷ୍କ ଦେଖାଯାଏ । ଅନେକକଙ୍କର ଏତେ ମାତ୍ରାରେ ଫାଟିଯାଏ ଯେ, ଛିଡ଼ା ହେଲେ କିମ୍ୱା ଚାଲିଲେ ରକ୍ତ ମଧ୍ୟ ବାହାରିଥାଏ । ବଜାରରେ ଅନେକ ସ୍କିନ୍ ପ୍ରଡକ୍ଟ ମିଳୁଥିବା ବେଳେ ଏଥିପାଇଁ ରହିଛି କିଛି ଘରୋଇ ଉପାୟ । ଯାହାକୁ ଆପଣେଇ ଆମେ ଆମ ଶରୀରକୁ କୋମଳ କରିପାରିବା । ଆସନ୍ତୁ ପ୍ରଥମେ ଜାଣିବା ଗୋଇଠି ଫାଟିବାର କାରଣ କ’ଣ ?
ତ୍ୱଚାରେ ଶୁଷ୍କତା: ପାଦରେ ସବୁବେଳେ ତେଲ ଲଗାଇବା ଉଚିତ୍ । ଏଭଳି ନ କଲେ ପାଦ ଶୁଷ୍କ ହୋଇଯାଏ । ଶୁଷ୍କତା କାରଣରୁ ଗୋଇଠି ଫାଟିବା ଆରମ୍ଭ କରେ ।
ଅଧିକ ସମୟ ଧରି ଛିଡ଼ା ହେବା କିମ୍ୱା ଚାଲିବା: ଅଧିକ ସମୟ ଧରି ଛିଡ଼ା ହେବା କିମ୍ୱା ଚାଲିବା ଫଳରେ ଗୋଇଠି ଉପରେ ଚାପ ପଡ଼େ । ଫଳରେ ଗୋଇଠି ଫାଟିବାକୁ ଲାଗେ ।
ସଠିକ୍ ଜୋତା ନ ପିନ୍ଧିବା: ଅଧିକ ଟାଣ ଜୋତା ଗୋଇଠି ଉପରେ ଚାପ ପକାଇପାରେ । ଯାହା ଫଳରେ ଗୋଇଠି ଶୁଷ୍କ ପଡ଼ିଯାଏ । ପରେ ଫାଟିବା ଆରମ୍ଭ କରେ ।
ଭିଟାମିନ୍ ଓ ମିନେରାଲ୍ସର ଅଭାବ: ଭିଟାମିନ୍ ଏ, ଇ, ସି ଓ ଜିଙ୍କ୍ର ଅଭାବ ଫଳରେ ତ୍ୱଚାରେ ଶୁଷ୍କତା ଦେଖାଯାଏ । ଫଳରେ ଗୋଇଠି ଫାଟିବାର ସମ୍ଭାବନା ଥାଏ ।
ପାଦରେ ମଇଳା ଜମିଲେ ଗୋଇଠି ଫାଟିବା ଆରମ୍ଭ ହୋଇଥାଏ । ତେଣୁ କିଛି ସମୟ ବ୍ୟବଧାନରେ ଗୋଇଠିକୁ ସଫା କରନ୍ତୁ । ଏହା ଦ୍ୱାରା ମଇଳା ସଫା ହୋଇଯିବ ଏବଂ ଗୋଇଠିକୁ ଫାଟିବାରୁ ରକ୍ଷା କରିବ । ଗୋଇଠିରେ ଏଲୋବେରା ଜେଲ୍ ଲଗାନ୍ତୁ । ଏହା ନାଚୁରାଲ୍ ମସଚରାଇଜର୍ ଭଳି କାମ କରେ । ଫଟା ଗୋଇଠି ଠିକ୍ କରିବାରେ ଏହା ସହା ହୁଏ । ଗୋଇଠିରେ ପେଟ୍ରୋଲିୟମ୍ ଜେଲି ଲଗାଇବା ପରେ ମଉଜା ପିନ୍ଧନ୍ତୁ । ଫଳରେ ଗୋଇଠି ଫାଟିନଥାଏ । ରାତିରେ ଶୋଇବା ପୂର୍ବରୁ ନଡ଼ିଆ ତେଲ କିମ୍ୱା ସୋରିଷ ତେଲ ଲଗାଇ ଶୋଇବା ଫଳରେ ଗୋଇଠି ଫାଟିବା କମ୍ ହୁଏ । ସକାଳେ ୨ ଥର ନଡ଼ିଆ କ୍ଷୀର ଲଗାନ୍ତୁ । ଦୈନିକ ରାତିରେ ଫୁଟ୍ କ୍ରିମ୍ ଲଗାଇ ଶୁଅନ୍ତୁ । ଏହାଦ୍ୱାରା ପାଦ କୋମଳ ରହିବ । ପାଦକୁ ସଫା କରିବା ଲାଗି ଗରମ ପାଣିର ବ୍ୟବହାର କରନ୍ତୁ ନାହିଁ । ନଚେତ୍ ଗୋଡ଼ ଫାଟିବାର ସମ୍ଭାବନା ବଢ଼ିଯିବ । ଏହା ବଦଳରେ ଉଷୁମ ପାଣିରେ ଗୋଡ଼ ସଫା କରନ୍ତୁ । ଗାଧୋଇବା ସମୟରେ ପାଦ ଦୁଇଟିକୁ ଭଲଭାବେ ସ୍କ୍ରବ୍ କରନ୍ତୁ । ଏହାସହ ଗୋଇଠିକୁ ରଗଡ଼ିକି ସଫା କରନ୍ତୁ ।