କଟକ,୦୫/୧୧: ଐତିହାସିକ କଟକ ବାଲିଯାତ୍ରାକୁ ପ୍ରଥମଥର ପାଇଁ ଆସୁଛି ଅଣ୍ଡର ୱାଟର୍ ଟର୍ନେଲ୍ ଆକ୍ୱାରିୟମ୍ । ବାଲିଯାତ୍ରା ବୁଲିଯାଇ ଲୋକେ ଏହାର ମଜ୍ଜା ନେଇପାରିବେ। ଲାଗିବ ଯେମିତି ସମୁଦ୍ର ଭିତରେ ଚାଲି ଚାଲି ଯାଉଛନ୍ତି ଏବଂ ଦୁଇ ପାଶ୍ୱର୍, ମୁଣ୍ଡ ଉପରେ ମାଛମାନେ ପାଣିରେ ପହଁରୁଛନ୍ତି। ଚଳିତ ବର୍ଷ ବାଲିଯାତ୍ରାର ଏହା ପ୍ରମୁଖ ଆକର୍ଷଣ ହେବ ବୋଲି କୁହାଯାଉଛି । ଲୋକେ ଟିକଟ୍ ମୂଲ୍ୟ ୧୦୦ରୁ ୧୫୦ ଟଙ୍କା ଦେଇ ଏହି ଟର୍ନେଲ୍ ଆକ୍ୱାରିୟମ୍ର ମଜ୍ଜା ଉଠାଇପାରିବେ ।
କିଣାବିକାର ଯାତ୍ରା ବାଲିଯାତ୍ରା ଏହାର ଆକର୍ଷଣୀୟ ବିଭବ ପାଇଁ ପରିଚିତ । ଗତ କିଛି ବର୍ଷ ଧରି ବାଲିଯାତ୍ରା କେବଳ ମେଳାରେ ସୀମିତ ରହିନାହିଁ । ବିଭିନ୍ନ ନୂଆ ନୂଆ ଉପାଦାନ ଯୋଡ଼ି ବାଲିଯାତ୍ରାକୁ ସଫଳତାର ଶୀର୍ଷକୁ ନେବାରେ ପ୍ରଶାସନିକ ଉଦ୍ୟମ ଜାରି ରହିଛି । ଚଳିତ ବର୍ଷ ମଧ୍ୟ ପ୍ରଥମଥର ପାଇଁ ଅଣ୍ଡର ୱାଟର୍ ଟନେଲ୍ ଆକ୍ୱାରିୟମ୍ ବାଲିଯାତ୍ରାର ଆକର୍ଷଣ ପାଲଟିବ । ତଳ ବାଲିଯାତ୍ରା ପଡିଆର ଅକ୍ଷୟ ମହାନ୍ତି ମଞ୍ଚ ପାଶ୍ୱର୍ରେ ଏହି ଆକ୍ୱାରିୟମ୍ ତିଆରି କରାଯିବ । ଆସନ୍ତା ସପ୍ତାହରୁ ଏହାର କାମ ଆରମ୍ଭ ହେବାକୁ ଥିବାବେଳେ ପୂର୍ଣ୍ଣାଙ୍ଗ ରୂପ ନେବାକୁ ୨୦ ଦିନ ଭଳି ସମୟ ଲାଗିଯିବ । ୨ ଶହ ଫୁଟ୍ର ଟର୍ନେଲ୍ ଭିତରେ ସବୁଆଡେ କାଚର ବ୍ୟବସ୍ଥା ରହିବ ।
୧୬ ଏମ୍ଏମ୍ କାଚରେ ଫିଟିଂ ହେବାକୁ ଥିବା ଏହି ଆକ୍ୱାରିୟମ୍ ଭିତରେ ବିଦେଶୀ ରଙ୍ଗୀନ ମାଛମାନେ ଖେଳିବେ । ଏଥିରେ ଛୋଟ ସାର୍କ, ତିମି, ଅକ୍ଟୋପସ୍ ସମେତ ବିଭିନ୍ନ ପ୍ରକାରର ରଙ୍ଗୀନ ମାଛ ରହିବେ । ତାମିଲନାଡୁର ଏକ ଘରୋଇ ସଂସ୍ଥା ସହିତ ଯୋଗାଯୋଗ କରି ବାଲିଯାତ୍ରାକୁ ଟର୍ନେଲ୍ ଆକ୍ୱାରିୟମ୍ ଆଣୁଛି ସିରିଡ଼ି ସାଇବାବା ଏଣ୍ଟରପ୍ରାଇଜର୍ସ । ୨୮ଟି ଟ୍ରକ୍ରେ ଆକ୍ୱାରିୟମ୍ ଉପକରଣ ଏବଂ ମାଛମାନେ ତାମିଲନାଡୁରୁ ଆସିବେ । ଏହି ଆକ୍ୱାରିୟମ୍ ଭିତରେ ୫୦ ହଜାର ଲିଟର ପାଣି ଧରିବ । ପ୍ରାୟ ୧୨ ଲକ୍ଷ ଟଙ୍କାର ମାଛ ଆକ୍ୱାରିୟମ୍ ଭିତରେ ଖେଳିବେ । ମାଛମାନଙ୍କ ପାଇଁ ସ୍ୱତନ୍ତ୍ର ଭାବେ ମିନେରାଲ୍ ୱାଟର୍ ଆସିବ ବୋଲି ଏଜେନ୍ସି ସିରିଡ଼ି ସାଇବାବା ଏଣ୍ଟରପ୍ରାଇଜର୍ସ ତରଫରୁ କୁହାଯାଇଛି ।
ସୂଚନାଯୋଗ୍ୟ, ବ୍ୟାଙ୍କ୍କ୍ରେ ଏଭଳି ଏକ ସ୍ଥାୟୀ ଅଣ୍ଡର ୱାଟର୍ ଟନେଲ୍ ଆକ୍ୱାରିୟମ୍ ରହିଛି । ତାମିଲନାଡୁର ଘରୋଇ ସଂସ୍ଥା ଏହାର ପୋଟେବୁଲ୍ ତଥା ଭ୍ରାମ୍ୟମାଣ ଟନେଲ୍ ବାଲିଯାତ୍ରାକୁ ଆଣିବ ।