ନୂଆଦିଲ୍ଲୀ, ୧୯।୫: ସଣ୍ଡେ ଟାଇମ୍ସ ପକ୍ଷରୁ ନୂଆ ଧନୀ ତାଲିକା ଜାରି ହୋଇଛି । ଏହି ତାଲିକା ଅନୁସାରେ ବ୍ରିଟେନ୍‌ ପ୍ରଧାନମନ୍ତ୍ରୀ ଋଶି ସୁନକ ଏବଂ ତାଙ୍କ ପତ୍ନୀ ଅକ୍ଷତା ମୂର୍ତ୍ତିଙ୍କ ସମ୍ପତ୍ତି ଗତବର୍ଷ ୧୨ କୋଟି ପାଉଣ୍ଡ୍‌ ବା ପ୍ରାୟ ୧୨୮୭ କୋଟି ଟଙ୍କା ବୃଦ୍ଧି ପାଇଛି । ଫଳରେ ସଂଶୋଧିତ ତାଲିକାରେ ଉଭୟଙ୍କ ଆନୁମାନିକ ମୋଟ ସମ୍ପତ୍ତି ୨୦୨୩ର ୫୨.୯ କୋଟି ପାଉଣ୍ଡରୁ ବଢ଼ି ୬୫.୧ କୋଟି ପାଉଣ୍ଡ୍‌ ବା ୬୮୬୭ କୋଟି ଟଙ୍କା ହୋଇଛି । ସମ୍ପତ୍ତିରେ ଏତେ ମାତ୍ରାରେ ବୃଦ୍ଧି ସହିତ ଋଶି ସୁନକ କିଙ୍ଗ୍‌ ଚାର୍ଲସ-୩ଙ୍କଠାରୁ ବି ଅଧିକ ଧନୀ ପାଲଟିଛନ୍ତି । 

ବ୍ରିଟେନ୍‌ର ବାର୍ଷିକ ଧନୀ ତାଲିକା ଅନୁସାରେ, ଚାର୍ଲସ-୩ ଗତବର୍ଷର ତାଲିକାରେ ସୁନକ ପରିବାରଠାରୁ ଆଗରେ ଥିଲେ । କିନ୍ତୁ ତାଙ୍କ ବ୍ୟକ୍ତିଗତ ସମ୍ପତ୍ତିରେ ଗତବର୍ଷ ସାମାନ୍ୟ ବୃଦ୍ଧି ଦେଖିବାକୁ ମିଳିଛି । ତାଙ୍କ ସମ୍ପତ୍ତି ଏବେ ୬୧ କୋଟି ପାଉଣ୍ଡ । ୨୦୨୨ରେ ଋଷି ସୁନକ ଏବଂ ତାଙ୍କ ପତ୍ନୀ ଅକ୍ଷତା ମୂର୍ତ୍ତିଙ୍କ ସମ୍ପତ୍ତି ଦିବଙ୍ଗତ ବ୍ରିଟେନ ମହାରାଣୀଙ୍କଠାରୁ ଅଧିକ ହୋଇଯାଇଥିଲା । ଉକ୍ତ ବର୍ଷ ଏଲିଜାବେଥ ଦ୍ୱିତୀୟଙ୍କ ସମ୍ପତ୍ତି ମୂଲ୍ୟ ୩୭ କୋଟି ପାଉଣ୍ଡ୍‌ ଥିଲା । ସୁନକ ସଣ୍ଡେ ଟାଇମ୍ସର ୩୫ ବର୍ଷ ଇତିହାସରେ ବାର୍ଷିକ ସମ୍ପତ୍ତି ସୂଚୀରେ ସାମିଲ ହୋଇ ଆସୁଥିବା ପ୍ରଥମ ଆଗଧାଡ଼ିର ରାଜନେତା ।