ନୂଆଦିଲ୍ଲୀ: ଉତ୍ତରପ୍ରଦେଶର ହାଥରସ୍‌ରେ ଏକ ଭୟଙ୍କର ଦୁର୍ଘଟଣା ଘଟିଛି। ରୋଡ୍ ଓ୍ବେଜ୍ ବସ୍ ଏବଂ ଏକ ମ୍ୟାକ୍ସ ମଧ୍ୟରେ ଜୋରଦାର୍ ଧକ୍କା ହୋଇଛି । ଏହି ଭୟଙ୍କର ଦୁର୍ଘଟଣାରେ ବର୍ତ୍ତମାନ ପର୍ଯ୍ୟନ୍ତ ୧୨ ଜଣଙ୍କର ମୃତ୍ୟୁ ହୋଇଥିବା ବେଳେ ୧୦ ରୁ ଅଧିକ ଲୋକ ଆହତ ହୋଇଥିବା ସୂଚନା ମିଳିଛି । ମୃତ୍ୟୁ ସଂଖ୍ୟା ଆହୁରି ବୃଦ୍ଧି ପାଇବ ବୋଲି ଆଶଙ୍କା କରାଯାଉଛି । କୁହାଯାଉଛି ଯେ, ତ୍ରୟୋଦଶ ଦିନର ଭୋଜି ଖାଇ ଫେରିବା ବାଟରେ ମ୍ୟାକ୍ସ ଲୋଡରକୁ ଏକ ରୋଡୱେ ବସ୍ ଧକ୍କା ଦେଇଛି । 

ଏହି ଦୁର୍ଘଟଣା ଚାନ୍ଦପା ଥାନା ଅଂଚଳର ଆଗ୍ରା-ଆଲିଗଡ ବାଇପାସ୍ ଅବସ୍ଥିତ ମେଟାଇ ଗ୍ରାମ ନିକଟରେ ହୋଇଥିବା ସୂଚନା ରହିଛି । ଏହି ଦୁର୍ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ଡିଏମ୍ ଏବଂ ଏସପି ଜିଲ୍ଲା ଡାକ୍ତରଖାନାରେ ପହଞ୍ଚିଛନ୍ତି । ଦୁର୍ଘଟଣାକୁ ସମ୍ପର୍କରେ ଡିଏମ ଆଶିଷ କୁମାର କହିଛନ୍ତି ଯେ, ମ୍ୟାକ୍ସ କାରରେ ଯାତ୍ରା କରୁଥିବା ଚାରି ପିଲାଙ୍କ ସମେତ ୧୨ ଜଣଙ୍କର ଦୁଃଖଦ ମୃତ୍ୟୁ ଘଟିଛି ଏବଂ ୧୬ ଜଣ ଆହତ ହୋଇଛନ୍ତି । ଏହି ଚାରିଜଣ ଆହତଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ଜିଲ୍ଲା ଡାକ୍ତରଖାନାରୁ ଆଲିଗଡକୁ ପଠାଯାଇଛି । ଅବଶିଷ୍ଟ ଆହତମାନେ ଜିଲ୍ଲା ଡାକ୍ତରଖାନାରେ ଚିକିତ୍ସିତ ହେଉଛନ୍ତି ।

ଦୁର୍ଘଟଣାରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ଦୁଃଖ ପ୍ରକାଶ କରିଛନ୍ତି । ଯୋଗୀ X ରେ ପୋଷ୍ଟ କରି ଲେଖିଛନ୍ତି ଯେ "ହାଥରସ୍ ଜିଲ୍ଲାରେ ଘଟିଥିବା ସଡ଼କ ଦୁର୍ଘଟଣା ଅତ୍ୟନ୍ତ ଦୁଃଖଦାୟକ । ମୃତକଙ୍କ ଶୋକସନ୍ତପ୍ତ ପରିବାରବର୍ଗଙ୍କୁ ମୋର ସମବେଦନା । ଉପଯୁକ୍ତ ଚିକିତ୍ସା ପାଇଁ ଜିଲ୍ଲା ପ୍ରଶାସନିକ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି । ଆହତମାନେ ଶୀଘ୍ର ସୁସ୍ଥ ହେବା ପାଇଁ କାମନା କରୁଛି ।