ଭୁବନେଶ୍ୱର,୧୫/୦୯: ଉତ୍କଳ ବିଶ୍ୱବିଦ୍ୟାଳୟର ଜଣେ ଅଧ୍ୟାପକଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ହୋଇଛି । ଅର୍ଥନୀତି ବିଭାଗର ଜଣେ ଛାତ୍ରୀ ଏପରି ଅଭିଯୋଗ ଆଣିଛନ୍ତି । ଯୌନ ନିର୍ଯାତନା ସେଲ୍କୁ ଏନେଇ ଲିଖିତ ଅଭିଯୋଗ କରିଛନ୍ତି । ଏହା ଅଗଷ୍ଟ ୧୬ ତାରିଖର ଘଟଣା । ହେଲେ ପୀଡ଼ିତାଙ୍କୁ ଏଯାଏଁ ନ୍ୟାୟ ମିଳିନାହିଁ । କର୍ତ୍ତୃପକ୍ଷ କହୁଛନ୍ତି ତଦନ୍ତ ଚାଲିଛି, ଖୁବ ଶୀଘ୍ର ରିପୋର୍ଟ ଦିଆଯିବ ।
ଛାତ୍ରୀ ଜଣଙ୍କ ଯୌନ ନିର୍ଯାତନା ସେଲ୍ରେ ଦାଖଲ କରିଥିବା ଲିଖିତ ଅଭିଯୋଗରେ ଉଲ୍ଲେଖ କରିଛନ୍ତି, ଗତ ଅଗଷ୍ଟ ୧୬ ତାରିଖ ଅପରାହ୍ନରେ ବିଭାଗରେ ଥିବା ଅଧ୍ୟାପକଙ୍କ ଚାମ୍ବରକୁ ଅପରାହ୍ନ ୨ଟାରେ ପାଠ୍ୟପୁସ୍ତକ ଆଣିବା ପାଇଁ ଯାଇଥିଲେ । ଅଧ୍ୟାପକ ଜଣକ ତାଙ୍କୁ ବସିବା ପାଇଁ କହିଥିଲେ । ଏହାପରେ ତାଙ୍କ ପାଖକୁ ଆସି ଅସଦାଚାରଣ କରିଥିଲେ । ଏଥିସହ କହିଥିଲେ ତୁମେ ଯଦି ମୋତେ ପସନ୍ଦ କରୁଛ ତେବେ ମୋ ପାଖକୁ ଆସ । ମୁଁ ତୁମର ପାଠପଢ଼ାରେ ସବୁ ପ୍ରକାରର ସାହାଯ୍ୟ କରିବି । ଯଦି ପସନ୍ଦ କରୁନ ତେବେ ଏ ବିଷୟରେ କାହାକୁ ଜଣାଇବ ନାହିଁ ବୋଲି ଅଧ୍ୟାପକ କହିଥିବା ନେଇ ଛାତ୍ରୀ ଅଭିଯୋଗ ପତ୍ରରେ ଜଣାଇଛନ୍ତି ।
ଛାତ୍ରୀ ଜଣକ ଉଲ୍ଲେଖ କରିଛନ୍ତି, ଏହି ଘଟଣା ପରେ ସେ ମାନସିକ ଭାବେ ଭାଙ୍ଗି ପଡ଼ିଛନ୍ତି । ମା’ ମୋର ବ୍ରେନ୍ ଟ୍ୟୁମରରେ ପୀଡ଼ିତ ଥିବା ବେଳେ ଏବେ ସୁସ୍ଥ ହେଉଛନ୍ତି । ତେଣୁ ଏ ଘଟଣା ବାବଦରେ ଜଣାଇବା ସମ୍ଭବ ନୁହେଁ । ତେଣୁ ସେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କୁ ତାଙ୍କର ଶାରୀରିକ ସୁରକ୍ଷା ଏବଂ ପାଠ୍ୟକ୍ରମଜନିତ ସୁରକ୍ଷା ଯୋଗାଇ ଦେବା ପାଇଁ ଅନୁରୋଧ କରିଛନ୍ତି । ଏଥିସହ ଉଚିତ୍ ନ୍ୟାୟ ପ୍ରଦାନ କରିବାକୁ ନିବେଦନ କରିଛନ୍ତି । ଅନ୍ୟପକ୍ଷରେ ସେଲ୍ ପକ୍ଷରୁ କୁହାଯାଇଛି, ଅଭିଯୋଗର ତଦନ୍ତ ଆରମ୍ଭ ହୋଇଛି । ମଙ୍ଗଳବାର ଏ ସଂପର୍କରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କୁ ରିପୋର୍ଟ ପ୍ରଦାନ କରାଯିବ । ଏନେଇ କର୍ତ୍ତୃପକ୍ଷଙ୍କୁ ଯୋଗାଯୋଗ କରାଯାଇଥିଲେ ହେଁ କୌଣସି ଉତ୍ତର ମିଳିନାହିଁ ।
