ନୂଆଦିଲ୍ଲୀ: ପାଇଲଟଙ୍କ ଘୋର ଅଭାବ ଦେଖାଦେଇଥିବା ବେଳେ ଅଡ଼ୁଆରେ ଭିସ୍ତାରା ଏୟାରଲାଇନ୍ସ । ଆଜି ସକାଳେ ପୁଣି ୩୮ ବିମାନ ଉଡ଼ାଣ ବାତିଲ କରିଛି କମ୍ପାନି । ସେପଟେ ଯେପର୍ଯ୍ୟନ୍ତ ପାଇଲଟଙ୍କ ସଂଖ୍ୟା ପୂରଣ ନ ହୋଇଛି, ସେ ପର୍ଯ୍ୟନ୍ତ କେବଳ ସୀମିତ ବିମାନ ଚଳାଚଳ କରିବ ବୋଲି କମ୍ପାନି ପକ୍ଷରୁ କୁହାଯାଇଛି ।  ଏହି ସବୁ ବିମାନ ମଧ୍ୟରୁ ୧୫ଟି ମୁମ୍ବାଇରୁ ଉଡ଼ାଣ ଭରିବାକୁ ଥିବା ବେଳେ ପ୍ରାୟ ୧୨ଟି ବିମାନ ରାଜଧାନୀ ଦିଲ୍ଲୀରୁ ଉଡ଼ାଣ ଭରିବାର ଥିଲା । ଏହା ସହ ୧୧ଟି ବିମାନ ବେଙ୍ଗାଲୁରୁ ବିମାନ ବନ୍ଦରରୁ ଯାତ୍ରୀଙ୍କୁ ନେଇ ଯାଇଥାନ୍ତା । ହେଲେ ଏସବୁ ବିମାନ ବାତିଲ କରିଛି କମ୍ପାନି । 

ଗତକାଲି ୫୦ଟି ବିମାନ ଉଡ଼ାଣ ବାତିଲ କରିଥିଲା ଭିସ୍ତାରା । ଏହା ବ୍ୟତୀତ ୧୬୦ଟି ବିମାନ ଉଡ଼ାଣ ବିଳମ୍ବ ହୋଇଥିଲା । ଏପରିକି ଯାତ୍ରୀମାନେ ଏୟାରଲାଇନକୁ ସଂପର୍କ କରିବାକୁ ବିଫଳ ହୋଇଥିବା ବେଳେ ଘଣ୍ଟା ଘଣ୍ଟା ଧରି ଅପେକ୍ଷା କରିବାକୁ ବାଧ୍ୟ ହୋଇଥିଲେ । ଭିସ୍ତାରା ଏୟାରଲାଇନ୍ସର ମୁଖପାତ୍ର କହିଛନ୍ତି ଯେ, ଗତ କିଛି ଦିନ ମଧ୍ୟରେ କ୍ରୁ ମେମ୍ବରଙ୍କ ସଂଖ୍ୟା କମ୍ ଥିବା କାରଣରୁ ଭିସ୍ତାରା ଏୟାରଲାଇନ୍ସ ବିମାନ ବାତିଲ ଏବଂ ଉଡ଼ାଣ ବିଳମ୍ବ ହେଉଛି । ଆମର ଯାତ୍ରୀମାନେ ଅସୁବିଧାର ସମ୍ମୁଖୀନ ହେଉଥିବା କଥା ଆମେ ସ୍ୱୀକାର କରୁଛୁ, ଏଥିପାଇଁ ଆମେ ଚିନ୍ତିତ । 

 ପରିସ୍ଥିତିକୁ ସ୍ୱାଭାବିକ କରିବା ପାଇଁ ନିରନ୍ତର ଉଦ୍ୟମ କରାଯାଉଛି। ଖୁବ୍ ଶୀଘ୍ର କ୍ରୁ ମେମ୍ବର ନିଯୁକ୍ତ କରାଯିବ । ଯେଉଁମାନେ ଟିକେଟ୍ କରିଥିଲେ ସେମାନଙ୍କୁ ରିଫଣ୍ଡ ହୋଇଯିବ ବୋଲି ଭିସ୍ତାରା ମୁଖପାତ୍ର କହିଛନ୍ତି । ସେପଟେ ବିମାନ ବିଳମ୍ବ ଏବଂ ବାତିଲ ହେବାକୁ ନେଇ ଭିସ୍ତାରା ଯାତ୍ରୀମାନେ ସୋଶାଲ ମିଡିଆ ପୋଷ୍ଟ ମାଧ୍ୟମରେ ଅସନ୍ତୋଷ ପ୍ରକାଶ କରିଥିଲେ । ଗତ କିଛି ଦିନ ମଧ୍ୟରେ ବିମାନ ୫ ଘଣ୍ଟାରୁ ଅଧିକ ବିଳମ୍ବ ହେଉଥିବା ଅଭିଯୋଗ କରିଥିଲେ । ବିମାନ ବାତିଲ ହୋଇଥିଲେ ମଧ୍ୟ ଯାତ୍ରୀମାନଙ୍କୁ ପୂର୍ଣ୍ଣ ଟଙ୍କା ଫେରସ୍ତ କରାଯାଇନଥିବା ଅଭିଯୋଗ କରିଛନ୍ତି । ଏସବୁ ଭିତରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଏବେ ଭିସ୍ତାରା ଏୟାର ଲାଇନ୍ସର ଅସୁବିଧା ସଂପର୍କରେ ସମ୍ପୂର୍ଣ୍ଣ ତଥ୍ୟ ମାଗିଥିବା ଜଣାପଡ଼ିଛି । ବିମାନ ବାତିଲ ଏବଂ ବିଳମ୍ବିତ ଉଡ଼ାଣ ସଂପର୍କରେ ସବିଶେଷ ବିବରଣୀ ମାଗିଛି ମନ୍ତ୍ରଣାଳୟ ।