ଭୁବନେଶ୍ୱର,୧୩/୦୯: ପୁଣି  ବଡ଼ ବର୍ଷା ଆସୁଛି । ଶୁକ୍ରବାର ଠାରୁ ବଢ଼ିବ ବର୍ଷା । ୧୬  ଯାଏ ପ୍ରବଳ ବର୍ଷା ହୋଇପାରେ । ୧୩ ତାରିଖରେ ଉତ୍ତର ଓଡ଼ିଶା ଓ ଏହା  ପାଶ୍ୱର୍ବର୍ତ୍ତୀ ଜିଲ୍ଲାରେ ଅଧିକ ବର୍ଷା  ସମ୍ଭାବନା ଅଛି । ଦକ୍ଷିଣ ଓଡ଼ିଶାର  କିଛି ଜାଗାରେ ବି ବର୍ଷା ହେବ । ୧୪ରୁ  ୧୬ ଯାଏ ପଶ୍ଚିମ ଓଡ଼ିଶାରେ ପ୍ରବଳ  ବର୍ଷା ହୋଇପାରେ । ଛତିଶଗଡ଼ରେ  ବି ଲଗାଣ ବର୍ଷା ଆଶଙ୍କା ଅଛି ।  ସମ୍ଭାବ୍ୟ ଲଘୁଚାପରୁ ଅବପାତ ସୃଷ୍ଟି ହେବା ସମ୍ଭାବନା ଥିବାରୁ ଏଭଳି ବର୍ଷା  ହୋଇପାରେ । ଯଦି ଏମିତି ହୁଏ,  ତେବେ ମହାନଦୀ ଫୁଲିପାରେ । 

ଦକ୍ଷିଣ ପୂର୍ବ ବାଂଲାଦେଶ  ଉପରେ ଏକ ଘୂର୍ଣ୍ଣିବଳୟ ଅଛି। ଏହା ଘନୀଭୂତ ହୋଇ ଶୁକ୍ରବାର  ବେଳକୁ ଉପକୂଳ ବାଂଲାଦେଶ ଓ  ପାଶ୍ୱର୍ବର୍ତ୍ତୀ ଉତ୍ତର ବଙ୍ଗୋପସାଗରରେ  ଲଘୁଚାପ ରୂପ ନେଇପାରେ । ଅଧିକ  ଘନୀଭୂତ ହୋଇ ପରବର୍ତ୍ତୀ ୪୮  ଘଣ୍ଟାରେ ଅବପାତରେ ପରିଣତ ହେବା ସହ ପଶ୍ଚିମ-ଉତ୍ତର ପଶ୍ଚିମ  ଦିଗରେ ପଶ୍ଚିମବଙ୍ଗ ଉପକୂଳ ଏବଂ  ଉତ୍ତର-ପଶ୍ଚିମ ବଙ୍ଗୋପସାଗର  ଆଡ଼କୁ ଆସିବ । ଏହା ପ୍ରଭାବରେ ଶୁକ୍ରବାରଠାରୁ ରାଜ୍ୟରେ ବର୍ଷା ବଢ଼ିବ ।  

ସୋଆ ଜଳବାୟୁ ଓ ପରିବେଶ  କେନ୍ଦ୍ର ନିର୍ଦ୍ଦେଶକ ଡକ୍ଟର ଶରତ ଚନ୍ଦ୍ର  ସାହୁଙ୍କ କହିବାନୁସାରେ, ସମ୍ଭାବ୍ୟ  ଅବପାତ ପ୍ରଭାବରେ ୧୬ ଯାଏ ବର୍ଷା  ଲାଗି ରହିବ । ଶୁକ୍ରବାରଠାରୁ ଉତ୍ତର  ଓଡ଼ିଶାରେ ବଢ଼ିବ । ୧୪ରୁ ୧୬ ଯାଏ  ପଶ୍ଚିମ ଓଡ଼ିଶା ଏବଂ ଛତିଶଗଡ଼ରେ  ଅଧିକ ବର୍ଷିବ ।  

ପାଣିପାଗ ବିଭାଗ ଆକଳନ କରିଛି, ଶୁକ୍ରବାର ରାଜ୍ୟର ଅଧିକାଂଶ  ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ଅଛି। କଳାହାଣ୍ଡିରେ ପ୍ରବଳରୁ ପ୍ରବଳତର  ବର୍ଷା ସମ୍ଭାବନା ଥିବାରୁ ଅରେଞ୍ଜ  ୱାର୍ଣ୍ଣିଂ ଜାରି ହୋଇଛି । ନବରଙ୍ଗପୁର,  କୋରାପୁଟ, ମାଲକାନଗିରି, ମୟୂରଭଞ୍ଜ, କେନ୍ଦୁଝର, ସୁନ୍ଦରଗଡ଼,  ବାଲେଶ୍ୱର, ଭଦ୍ରକ, ଯାଜପୁର,  କେନ୍ଦ୍ରାପଡ଼ା, କଟକ, ଜଗତସିଂହପୁର,  ରାୟଗଡ଼ା ଓ ଗଜପତିରେ ପ୍ରବଳ  ବର୍ଷା ଆଶଙ୍କା ନେଇ ୟେଲୋ ୱାର୍ଣ୍ଣିଂ  ଜାରି କରାଯାଇଛି । କେତେକ  ଜିଲ୍ଲାରେ ବଜ୍ରପାତ ଆଶଙ୍କା ଅଛି ।  ୧୪ ତାରିଖରେ ଉତ୍ତର ଓଡ଼ିଶାରେ  ପ୍ରବଳ ବର୍ଷା ହୋଇପାରେ । ଉତ୍ତରର  ଅଧିକାଂଶ ଓ ଦକ୍ଷିଣର ଅନେକ  ସ୍ଥାନରେ ବର୍ଷା ସମ୍ଭାବନା ଅଛି ।  

ମୟୂରଭଞ୍ଜ, କେନ୍ଦୁଝର,  ସୁନ୍ଦରଗଡ଼ରେ ପ୍ରବଳରୁ ପ୍ରବଳତର  (୭୦ ମିମିରୁ ୨୦୦ ମିମି) ବର୍ଷା  ହୋଇପାରେ । ଝାରସୁଗୁଡ଼ା,  ସମ୍ବଲପୁର, ଦେବଗଡ଼, କୋରାପୁଟ,  ନବରଙ୍ଗପୁର, ଯାଜପୁର, ବରଗଡ଼,  ରାୟଗଡ଼ା, କଳାହାଣ୍ଡି, ବାଲେଶ୍ୱର,  ଭଦ୍ରକରେ ପ୍ରବଳ ବର୍ଷା ଆଶଙ୍କା ଅଛି ।  ୧୫ରେ ବି ପ୍ରବଳ ବର୍ଷା ହୋଇପାରେ ।