ଭୁବନେଶ୍ୱର,୦୯/୦୮: ଆସନ୍ତା ୫ ଦିନ ରାଜ୍ୟରେ ବର୍ଷା କମିଯିବ । କାଁଭାଁ ବର୍ଷା ହୋଇପାରେ । ଆସନ୍ତା ସପ୍ତାହ ଯାଏ ବଙ୍ଗୋପସାଗରରେ କୌଣସି  ସିଷ୍ଟମ ସୃଷ୍ଟି ହେବାର ସମ୍ଭାବନା ନାହିଁ । ବରିଷ୍ଠ ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ ଏହା କହିଛନ୍ତି। ଆସନ୍ତା ଦୁଇ ସପ୍ତାହ ଯାଏ ରାଜ୍ୟରେ  ବିଶେଷ ବର୍ଷା ନାହିଁ । ମୌସୁମୀ ଟ୍ରଫ୍‌ ସକ୍ରିୟ ରହିବନି । ଏଥିପାଇଁ ଅଧିକ ବର୍ଷା ନାହିଁ । ଅଳ୍ପ କିଛି ସ୍ଥାନରେ କମ୍‌ ବର୍ଷା ହୋଇପାରେ ବୋଲି ଭାରତୀୟ ପାଣିପାଗ ବିଭାଗ (ଆଇଏମଡି) ବିସ୍ତାରିତ ଆକଳନ କରି କହିଛି। 

ଗୁରୁବାର ସନ୍ଧ୍ୟାରେ ଉତ୍ତରପ୍ରଦେଶ ଉପରେ ଲଘୁଚାପ କ୍ଷେତ୍ର କେନ୍ଦ୍ରୀଭୂତ  ହୋଇଛି । ରାଜ୍ୟ ଉପରେ ଏହାର ବିଶେଷ ପ୍ରଭାବ ନାହିଁ । ଆସନ୍ତା ୫ ଦିନ  ଯାଏ ରାଜ୍ୟରେ ବର୍ଷା ସମ୍ଭାବନା କମ୍‌ । ଭଦ୍ରକରୁ ସୋନପୁର ସଂଯୋଗ କରୁଥିବା  ସରଳରେଖାର ଉତ୍ତରରେ ୪୦ରୁ ୪୫ ମିମି ବର୍ଷା ହୋଇପାରେ । ଏହାର  ଦକ୍ଷିଣରେ ୨୦ରୁ ୩୦ ମିମି ବର୍ଷା ସମ୍ଭାବନା ଅଛି । ଦକ୍ଷିଣ ଓଡ଼ିଶାର ବିକ୍ଷିପ୍ତ  ସ୍ଥାନରେ ବର୍ଷା ହୋଇପାରେ । କିଛି ସ୍ଥାନରେ ପାଗ ଶୁଖିଲା ରହିବ । 

ପ୍ରଫେସର ପଶୁପାଳକ ଆକଳନ କରି କହିଛନ୍ତି, ଆଗକୁ ମଧ୍ୟ ରାଜ୍ୟରେ  ବିଶେଷ ବର୍ଷା ସମ୍ଭାବନା ନାହିଁ । ଅଣଜଳସେଚିତ ଜମିରେ ପାଣି ସମସ୍ୟା ସୃଷ୍ଟି  କରିପାରେ । ଆଗକୁ ବର୍ଷା କମ୍‌ ହେବାର ଥିବାରୁ ଚାଷ ଜମିରେ ପାଣି ବାନ୍ଧି  ରଖନ୍ତୁ । ରୁଆ କାମ ଶୀଘ୍ର ଶେଷ କରନ୍ତୁ । ସଅଳ ରୁଆ ଧାନରେ ମୂଳସତା ରୋଗର  ସମ୍ଭାବନା ଅଛି । ଏଥିପାଇଁ ସତର୍କ ରହିବା ସହ ପଦକ୍ଷେପ ନିଅନ୍ତୁ । ମକାରେ  ଫୁଲ ଆସିବାକୁ ଥିଲେ ସାର ପ୍ରୟୋଗ କରନ୍ତୁ । ମୁଗ, ବିରି ଓ କୋଳଥ ବୁଣନ୍ତୁ । 

ସେପଟେ ପାଣିପାଗ ବିଭାଗର ପୂର୍ବାନୁମାନ କହୁଛି, ୯ ତାରିଖରେ ସୁନ୍ଦରଗଡ଼,  ଝାରସୁଗୁଡ଼ା, ବରଗଡ଼, ସମ୍ବଲପୁର ଓ କେନ୍ଦୁଝରରେ ଭାରୀ ବର୍ଷା ହୋଇପାରେ ।  କିଛି ସ୍ଥାନରେ ୭୦ରୁ ୧୦୦ ମିମି ଯାଏ ବର୍ଷା ସମ୍ଭାବନା ଅଛି । ୧୦, ୧୧ ଓ ୧୨  ତାରିଖରେ ବିଶେଷ ବର୍ଷା ନାହିଁ। କିଛି ସ୍ଥାନରେ ମଧ୍ୟମ ଧରଣର ବର୍ଷା ହୋଇପାରେ ।  ଗୁରୁବାର ନୟାଗଡ଼ରେ ସର୍ବାଧିକ ୪୯ମିମି ବର୍ଷା ହୋଇଛି । ଢେଙ୍କାନାଳରେ  ୪୫, ତାଳଚେରରେ ୩୫ ଓ ବାରିପଦାରେ ୩୦ମିମି ବର୍ଷା ରେକର୍ଡ ହୋଇଛି ।