ବେଙ୍ଗାଲୁରୁ: କୋଲକାତା ଏବଂ ବେଙ୍ଗାଲୁରୁ ମ୍ୟାଚ୍କୁ ନେଇ ଖେଳପ୍ରେମୀ ଉତ୍ସାହିତ ହୋଇପଡ଼ିନ୍ତି । କେକେଆରର ମେଣ୍ଟର ଗୌତମ ଗମ୍ଭୀର ଥିବା ବେଳେ ବେଙ୍ଗାଲୁରୁ ଟିମ୍ର ବରିଷ୍ଠ ଖେଳାଳିଙ୍କ ମଧ୍ୟରେ ବିରାଟ କୋହଲି ଅନ୍ୟତମ । ସେମାନଙ୍କ ମଧ୍ୟରେ ସବୁ କିଛି ଭଲ ନଥିବା ନେଇ ସମସ୍ତଙ୍କୁ ଜଣା ଅଛି । ଗତ ଆଇପିଏଲ ସିଜନରେ ଲକ୍ଷ୍ନୌ ସୁପର ଜ୍ୟାଣ୍ଟସ୍ର ମେଣ୍ଟର ଥିଲେ ଗମ୍ଭୀର । ଏହି ସମୟରେ ପଡ଼ିଆରେ ଗମ୍ଭୀର ଏବଂ କୋହଲି ସାମ୍ନାସାମ୍ନି ହୋଇଥିଲେ । ପଡ଼ିଆରେ ଦୁଇ ଜଣଙ୍କ ମଧ୍ୟରେ ଝଗଡ଼ା ହୋଇଥିଲା । ଏହା ପରେ ଦୁଇ ଜଣଙ୍କ ଉପରେ ଜରିମାନା ବି ଲାଗିଥିଲା ।
ଚଳିତ ଆଇପିଏଲରେ ଏହି ଦୁଇ ଜଣ ପୁଣି ଥରେ ସାମ୍ନାସାମ୍ନି ହେବା ପରେ ଏମାନଙ୍କର କେତେକ ଫଟୋ ଏବେ ସୋସିଆଲ ମିଡିଆରେ ଚର୍ଚ୍ଚା ସାଉଁଟିଛି । କେକେଆର ଦୁଇଟି ଫଟୋ ସୋସିଆଲ ମିଡିଆରେ ପୋଷ୍ଟ କରିଛି । ଏହା ସହ କେକେଆର ପକ୍ଷରୁ କ୍ୟାପ୍ସନ ଦିଆଯାଇଛି ଯେ, ‘କ୍ରିକେଟ ଫଟୋ ଯାହା ଜବରଦସ୍ତ ହିଟ୍ ହୋଇଛି ।’ ଗୋଟିଏ ଫଟୋରେ କୋହଲି, ଗମ୍ଭୀରଙ୍କ ଆଡ଼କୁ ଦେଖୁଥିବା ନଜରକୁ ଆସିଛି ।
Cricket images that hit hard 🥶 pic.twitter.com/QYf5LanzYQ
— KolkataKnightRiders (@KKRiders) March 29, 2024
ସେପଟେ ଆଜି ମ୍ୟାଚ୍ ଆରମ୍ଭ ହେବା ପୂର୍ବରୁ ଭାରତର ଦ୍ରୁତ ବୋଲର ବରୁଣ ଆରୋନ କୋହଲି ବନାମ ଗମ୍ଭୀର ଦ୍ବନ୍ଦ୍ବ ଆଡ଼କୁ ଇସାରା କରି କହିଥିଲେ ଯେ, ସୀମା ରେଖା ବାହାରେ ମ୍ୟାଚ୍ ଦେଖିବାକୁ ମୁଁ ଅପେକ୍ଷା କରିଛି । ଗୌତମ ଗମ୍ଭୀର ବେଙ୍ଗାଲୁରୁ ଡଗ ଆଉଟ୍ ପାଖରେ ବସିଥିବେ । ମୋତେ ଜଣାନାହିଁ ସେଠାରେ କଣ ହେବ । ଆମେ ଜାଣିଛୁ କୋହଲି ନିଜ ଭିତରର ଜ୍ବାଳାକୁ ଚାପି ରଖିବାକୁ ପସନ୍ଦ କରନ୍ତି । ସେ କେବଳ କୋଲକାତାର ଡଗ ଆଉଟକୁ ଦେଖିଦେଲେ ଜୋସରେ ଭରିଯିବେ । ତେବେ ଆଜିର ମ୍ୟାଚ୍ରେ ଆରସିବିକୁ କେକେଆର ପାଖରୁ ପରାଜୟ ବରଣ କରିବାକୁ ପଡ଼ିଛି । କୋହଲିଙ୍କ ଅପରାଜିତ ୮୩ ରନ୍ ବେକାର ଯାଇଥିବା ବେଳେ କେକେଆର ୭ ଓ୍ବିକେଟରେ ବିଜୟ ହାସଲ କରିଛି ।
