ନାଗପୁର: ‘ଭିକୋ ଟର୍ମେରିକ୍, ନହିଁ କସମେଟିକ୍’ । ଭିକୋ ଲାବୋରେଟୋରିଜ୍ର ପ୍ରଡକ୍ଟକୁ ନେଇ ଟିଭି ବିଜ୍ଞାପନରେ ଏଭଳି କିଛି ଜିଙ୍ଗଲ୍ ଆପଣ ଶୁଣିଥିବେ । ଆଉ ଏହା ପଛର ମୃଖ୍ୟ ନାୟକ ଯଶଓ୍ବନ୍ତ କେଶବ ପେଣ୍ଢରକର । କିନ୍ତୁ ଆଜି ପେଣ୍ଢରକର ନିରବୀ ଯାଇଛନ୍ତି । ଭିକୋ ଲାବୋରେଟୋରିଜ୍ର ଅଧ୍ୟକ୍ଷ ପେଣ୍ଢରକର ୮୫ ବର୍ଷ ବୟସରେ ଇହଲୀଳା ସମ୍ବରଣ କରିଛନ୍ତି ।
ଭିକୋ ଆୟୁର୍ବେଦିକର ଦ୍ବିତୀୟ ପର୍ଯ୍ୟାୟ ତିଆରି କରିଥିବା, ବିଜ୍ଞାପନ ସାହାଯ୍ୟରେ ଭିକୋ ଉତ୍ପାଦକୁ ଘରେ ଘରେ ପହଞ୍ଚାଇଥିବା ଯଶଓ୍ବନ୍ତ ପେଣ୍ଢରକର ବୟାସାଧିକ ଜନିତ ସମସ୍ୟାରେ ପୀଡ଼ିତ ଥିଲେ । ନାଗପୁରର ସିଭିଲ ଲାଇନ୍ସ୍ଥିତ ନିଜ ବାସଭବନରେ ହିଁ ସେ ନିଜର ଶେଷ ନିଶ୍ବାସ ତ୍ୟାଗ କରିଛନ୍ତି । ଯଶଓ୍ବନ୍ତ ପେଣ୍ଢରକର ଆଇନ୍ରେ ସ୍ନାତକ ପାସ କରିଥିବା ବେଳେ ଆୟୁର୍ବେଦିକରେ ରୁଚି ରଖିଥିଲେ । ଏଲଏଲବି ଡିଗ୍ରି ହାସଲ କରିବା ପରେ ସେ ଭିକୋ ଲାବୋରେଟୋରିଜ୍ରେ କାମ କରିଥିଲେ ।
ଏହି ସମୟରେ ଭାରତରେ ଉତ୍ପାଦନକୁ ନେଇ ବହୁ କାନୁନ ଥିଲା । ଆଉ ଖାକି ବାବୁଙ୍କ ରାଜ ସମୟରେ ଭିକୋ ଏକ୍ସସାଇଜ୍ ଡିପାର୍ଟମେଣ୍ଟ ପାଖରେ ୩୦ ବର୍ଷର ଆଇନଗତ ଲଢ଼େଇ କରିଥିଲା । ସେତେବେଳେ ପେଣ୍ଢରକରଙ୍କ ଏଲଏଲବି ଡିଗ୍ରି କାମରେ ଆସିଥିଲା । ଦୀର୍ଘ ଲଢ଼େଇ ପରେ ୧୯୭୮ରେ ବିଜୟ ପାଇଥିଲା ଭିକୋ । ଯଦିଓ ଭିକୋର ଶୁଭାରମ୍ଭ ମୁମ୍ବାଇରେ ହୋଇଥିଲା କିନ୍ତୁ ଏହାର ସଂପର୍କ ନାଗପୁର ସହ ଖୁବ ନିବିଡ଼ । ଆଜି ବି ଏହାର ଏକ ଫ୍ୟାକ୍ଟ୍ରି ନାଗପୁରରେ ଅଛି ।
ପେଣ୍ଢରକରଙ୍କ ନେତୃତ୍ବରେ ଭିକୋର ଆୟୁର୍ବେଦିକ ପ୍ରଡକ୍ଟ ଲୋକପ୍ରିୟ ହେଲା ତାହା ନୁହେଁ ବରଂ ମାର୍କେଟରେ ନିଜର ସ୍ବତନ୍ତ୍ର ସ୍ଥାନ ପାଇଛି। ହିମାଳୟା ଏବଂ ଡାବର ଭଳି ବ୍ରାଣ୍ଡକୁ କଡ଼ା ଟକ୍କର ଦେଇଥିଲା । ଏପରିକି ଅନ୍ତର୍ଜାତୀୟ ବଜାରରେ ଭିକୋ ନିଜର ସ୍ଥାନ ତିଆରି କରିଥିଲା । ପେଣ୍ଢରକରଙ୍କ ପୁତୁରା ଦେବେଶ ତାଙ୍କ ସଂପର୍କରେ କୁଅନ୍ତି ଯେ, ଯଶଓ୍ବନ୍ତ ପେଣ୍ଢରକର ପରିବାର ସଦସ୍ୟଙ୍କ ତୁଳନାରେ ସବୁଠାରୁ ଅଧିକ ମସଲାଯୁକ୍ତ ଖାଦ୍ୟ ଖାଉଥିଲେ । ତେବେ ଭିକୋ ଲାବୋରେଟୋରିଜ୍ର ଅଧ୍ୟକ୍ଷ ଯଶଓ୍ବନ୍ତ କେଶବ ପେଣ୍ଢରକରଙ୍କ ନିଧନକୁ ନେଇ ଦେଶରେ ଶୋକର ଛାୟା ଖେଳିଯାଇଛି ।