ମାଲକାନଗିରି/ମାଥିଲି - ମାଲକାନଗିରି ଜିଲ୍ଲା ମାଥିଲି ଥାନାର କର୍ମଚାରୀମାନେ ଛତିଶଗଡ଼ ସୀମାନ୍ତ ମୁଣ୍ଡାଗୁଡା ଫାଣ୍ଡି  ନିକଟରେ ପାଟ୍ରୋଲିଂ କରୁଥିବା ବେଳେ ଜଣେ ଯୁବକଙ୍କୁ ଗିରଫ କରିଛନ୍ତି। ଉକ୍ତ ଯୁବକ ଜଣକ ସନ୍ଦେହ ଜନକ ଅବସ୍ଥାରେ ବୁଲୁ ଥିବାର ଦେଖି ତାକୁ ସନ୍ଦେହ କରି ପୋଲିସ କର୍ମୀମାନେ ଯୁବକକୁ ଅଟକାଇ ଯାଞ୍ଚ କରିଥିଲେ। 

ଯାଞ୍ଚ ବେଳେ ଯୁବକ ଜଣଙ୍କ ଧରିଥିବା ବ୍ୟାଗରେ ଗଞ୍ଜେଇ ଥିବା ପୋଲିସ ଜାଣିବାକୁ ପାଇଥିଲେ। ଯୁବକ ଜଣଙ୍କ ଗଞ୍ଜେଇକୁ ପଡୋଶୀ ଛତିଶଗଡ଼ ରାଜ୍ୟକୁ ଚାଲାଣ ପାଇଁ ନେଉ ଥିବାର ଜଣାପଡିଛି। ଯୁବକଙ୍କ ଠାରୁ ଗଞ୍ଜେଇ ଜବତ କରି ପୋଲିସ ଗିରଫ କରିଥିଲା। ଗିରଫ ଯୁବକଙ୍କ ଘର ମାଥିଲି ଥାନା ଅନ୍ତର୍ଗତ ସିନ୍ଦାବେଡା ଗ୍ରାମରେ। ତାଙ୍କ ନାଁ ପ୍ରଶାନ୍ତ ନାୟକ ଥିବା ଜଣା ପଡିଛି।

ଜବତ ଗଞ୍ଜେଇକୁ ଓଜନ କରିବାରୁ ତାହା ୧୨ କେଜି ୨୦୦ ଗ୍ରାମ ହୋଇଥିଲା। ଯାହାର ଆନୁମାନିକ ମୂଲ୍ୟ ୬୦ ରୁ ୭୦ ହଜାର ଟଙ୍କା ହେବ ବୋଲି ପୋଲିସ କହିଛି। ଗଞ୍ଜେଇ ଜବତ ପରେ ଯୁବକକୁ ଗିରଫ କରି ପୋଲିସ ଆଜି କୋର୍ଟ ଚାଲାଣ କରିଛି।