ନବରଙ୍ଗପୁର, ୨୭।୧୧: ନବରଙ୍ଗପୁର ସହର ଶିଶୁ ଉଦ୍ୟାନ ନିକଟ ଏକ ଷ୍ଟଲ୍ ବାରଣ୍ଡାରେ ୨ ମହିଳାଙ୍କ ମୃତଦେହକୁ ଉଦ୍ଧାର କରିଛି ପୁଲିସ୍ । ଏହି ୨ ମହିଳାଙ୍କ ପ୍ରକୃତ ପରିଚୟ ଏଯାଏ ମିଳିପାରିନାହିଁ । ଜଣଙ୍କର ବୟସ ୬୦ ହୋଇଥିବା ବେଳେ ଅନ୍ୟ ଜଣଙ୍କୁ ୫୦ ବର୍ଷ ବୋଲି ଅନୁମାନ କରାଯାଉଛି ‌। ଏହି ୨ ମହିଳା ଭିକ୍ଷାବୃତ୍ତି କରି ଚଳୁଥିଲେ । ସଞ୍ଜ ହେଲେ ଦୋକାନ ବାରଣ୍ଡାରେ ଖୋଲା ଆକାଶ ତଳେ ଖୋଲା ମେଲାରେ ରାତି କାଟୁଥିଲେ । 

ମୃତଦେହ ନିକଟରେ ପିନ୍ଧିବା ଲୁଗାପଟା ଓ ଚଦରଗୁଡ଼ିକ ସହ ଭିକ୍ଷାମୁଣାଗୁଡ଼ିକ ମଧ୍ୟ ପଡ଼ିରହିଛି । ରାତିରେ ଖୋଲାଆକାଶ ତଳେ ଶୋଇଥିବା ବେଳେ ସକାଳେ ଦୁହେଁ ଶେଜରୁ ଉଠିନଥିଲେ । ପୁଲିସ ଘଟଣାସ୍ଥଳରେ ପହଞ୍ଚି ଉଭୟଙ୍କ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇ ତଦନ୍ତ ଆରମ୍ଭ କରିଛି । ଏନେଇ ତଦନ୍ତକାରୀ ଅଧିକାରୀ ଶୁଭେନ୍ଦୁ ବେହେରାଙ୍କୁ ଯୋଗାଯୋଗ କରାଯିବା ପରେ ମୃତ୍ୟୁର କାରଣ ଅସ୍ପଷ୍ଟ ରହିଥିବା ବେଳେ ଉଭୟ ମହିଳାଙ୍କ ପ୍ରକୃତ ପରିଚୟ ମିଳିନଥିବା ସେ କହିଛନ୍ତି । ଅନ୍ୟପକ୍ଷେ ଏକକାଳୀନ ଦୁଇ ଜଣଙ୍କ ମୃତ୍ୟୁକୁ ନେଇ ସନ୍ଦେହ ସୃଷ୍ଟି ହୋଇଛି ।