ପୁରୀ,୦୮/୧୨ ଆସୁଛି ନୂଆବର୍ଷ । ଶ୍ରୀମନ୍ଦିରକୁ ଠାକୁର ଦର୍ଶନ ନିମନ୍ତେ ଶ୍ରଦ୍ଧାଳୁଙ୍କ ଭିଡ଼ ବଢ଼ିବ । ଏହା ସାଙ୍ଗକୁ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଲୋକାର୍ପଣ ହେବାକୁ ଯାଉଛି । ପର୍ଯ୍ୟଟନ ଋତୁ ମଧ୍ୟ ଆସି ଯାଇଛି । ଶ୍ରଦ୍ଧାଳୁଙ୍କ ଭିଡ଼ ଜମିବା ଆଶଙ୍କା ଥିବାରୁ ଶ୍ରୀମନ୍ଦିରରେ ମହାପ୍ରସାଦ ଦର ନିର୍ଦ୍ଧାରଣ କରିବା ଓ ଆନନ୍ଦ ବଜାରରେ ମହାପ୍ରସାଦ ବିକ୍ରିକୁ ଏକ ଶୃଙ୍ଖଳିତ ସ୍ଥିତିକୁ ଆଣିବା ଆବଶ୍ୟକତା ହୋଇପଡ଼ିଛି । ଶ୍ରଦ୍ଧାଳୁମାନେ ଯେପରି ଏକ ନିର୍ଦ୍ଧାରିତ ଦାମ୍ ଦେଇ ପେଟପୂରା ମହାପ୍ରସାଦ ଖାଇପାରିବେ ଓ ପରିବାର ଲୋକଙ୍କ ନିମନ୍ତେ ନେଇ ପାରିବେ ତାହା ଆବଶ୍ୟକ ହୋଇପଡ଼ିଛି । ଏନେଇ ବାରମ୍ବାର ଶ୍ରଦ୍ଧାଳୁମାନେ ପ୍ରଶାସନ ନିକଟରେ ଦାବି କରି ଆସୁଛନ୍ତି । ଏପରିସ୍ଥିତିରେ ଆସନ୍ତା ୧୧ ତାରିଖରେ ଆନନ୍ଦ ବଜାର ଶୃଙ୍ଖଳା କମିଟି ବୈଠକ ବସିବାକୁ ସ୍ଥିର ହୋଇଥିବା ଜଣାପଡ଼ିଛି ।
ଅବଢ଼ା ଦର ନିର୍ଦ୍ଧାରଣ ନେଇ ସୁଆର ମହାସୁଆର ନିଯୋଗ ମଧ୍ୟ ରାଜିଥିବା ଏହାର ମୁଖିଆମାନେ ଗଣମାଧ୍ୟମରେ ପ୍ରକାଶ କରିଛନ୍ତି । ଅନ୍ନ, ଡାଲି, ବେସର, ମହୁର ପ୍ରଭୃତି ଶଙ୍ଖୁଡ଼ି ମହାପ୍ରସାଦ କୁଡ଼ିଆ ଦର କ’ଣ ରହିବା ଉଚିତ୍ ଶ୍ରୀମନ୍ଦିର ପ୍ରଶାସନକୁ ପ୍ରସ୍ତାବ ଦିଆଯାଇଛି । ତେବେ ଶ୍ରୀମନ୍ଦିର ପ୍ରଶାସନ ଏହି ପ୍ରସ୍ତାବ ନେଇ ଏପର୍ଯ୍ୟନ୍ତ କୌଣସି ଆଲୋଚନା କରିନି । ଆନନ୍ଦ ବଜାରରେ ଶୃଙ୍ଖଳା ଆଣିବା ନିମନ୍ତେ ସୁପ୍ରିମ୍କୋର୍ଟଙ୍କ ନିର୍ଦ୍ଦେଶ ରହିଛି । ତେବେ ନିର୍ଦ୍ଦେଶକୁ ବହୁ ବର୍ଷ ବିତିଥିଲେ ହେଁ ଏହାକୁ ଧ୍ୟାନ ଦିଆଯାଉନି । ଫଳରେ ଶ୍ରଦ୍ଧାଳୁମାନେ ସୁଲଭ ମୂଲ୍ୟରେ ମହାପ୍ରସାଦ ପାଇପାରୁନାହାନ୍ତି । ବିଭିନ୍ନ ପର୍ବପର୍ବାଣି ବେଳେ ମହାପ୍ରସାଦର ଅହେତୁକ ମୂଲ୍ୟ ବଢ଼ିବା ଶ୍ରଦ୍ଧାଳୁଙ୍କ ଅସନ୍ତୋଷର କାରଣ ହେଉଛି ।