ଭୁବନେଶ୍ୱର,୧୩।୯: ରାଜଧାନୀରେ ସେକ୍ସ ଆଳରେ ଲକ୍ଷ ଲକ୍ଷ ଟଙ୍କା ଲୁଟୁଥିବା ଲେଡି ଡନ୍ ଇରାନୀ ପାତ୍ର ଗ୍ୟାଙ୍ଗ୍ର ପର୍ଦ୍ଦାଫାସ୍ କରିଛି କମିଶନରେଟ୍ ପୁଲିସ । ଜଣେ ଡାକ୍ତରଙ୍କୁ ଚିକିତ୍ସା ବାହାନାରେ ଡ଼କାଇ ଅପହରଣ କରିବା ଓ ତାଙ୍କୁ ହନିଟ୍ରାପ୍ରେ ଫସାଇ ୧୦ ଲକ୍ଷ ଟଙ୍କା ଲୁଟି ନେଇଥିବା ଅଭିଯୋଗରେ ତମାଣ୍ଡୋ ଥାନା ପୁଲିସ ଇରାନୀ ପାତ୍ର (୨୭)ଙ୍କ ସମେତ ୪ ଜଣଙ୍କୁ ଗିରଫ କରିଛି । ସେମାନେ ହେଲେ ତମାଣ୍ଡୋ ଥାନା ନାରଗୋଦା ଗ୍ରାମର ଇରାନୀଙ୍କ ସମେତ ତାଙ୍କ ସ୍ୱାମୀ ବାପି ଓରଫ ନିଶିକାନ୍ତ ପାତ୍ର(୩୩), ତମାଣ୍ଡୋ ସିଜିପୁଟର ଗଣେଶ ଓରଫ ମନୋରଞ୍ଜନ ପ୍ରଧାନ(୩୦) ଓ ସିଜିପୁଟ ଗ୍ରାମର ଗିରିଜା ଓରଫ ଶକ୍ତିକାନ୍ତ ହରିଚନ୍ଦନ(୩୬) । ପୁଲିସ ସେମାନଙ୍କଠାରୁ ୩୦ ହଜାର ଟଙ୍କା, ୯ ଲକ୍ଷ ଟଙ୍କାର ବ୍ୟାଙ୍କ୍ ଚେକ୍, ଏକ ଛୁରୀ ଓ ୨ଟି ଦାମୀ ମୋବାଇଲ ଜବତ କରିଛି । ଆଜି ୪ ଜଣଙ୍କୁ କୋର୍ଟ ଚାଲାଣ କରାଯାଇଥିଲା । ଜାମିନ ନାମଞ୍ଜୁର ହେବାରୁ ସମସ୍ତଙ୍କୁ ଜେଲ୍ ହାଜତକୁ ପଠାଇ ଦିଆଯାଇଛି । ଲେଡି ଡନ୍ ଇରାନୀ ଧରାପଡ଼ିବା ପରେ ତାଙ୍କ ନାମରେ ଅଭିଯୋଗର ଫର୍ଦ୍ଦ ବଢ଼ିବାରେ ଲାଗିଛି ।
ଇରାନୀ ଗ୍ୟାଙ୍ଗ୍ ଏପରି ସେକ୍ସ ଆଳରେ କେତେ ଲୋକଙ୍କୁ କେତେ ଲକ୍ଷ ଟଙ୍କା ଲୁଟିଛନ୍ତି ସେନେଇ ପୁଲିସ ଅଧିକ ତଦନ୍ତ ଜାରି ରଖିଛି । କେମିତି ଡାକ୍ତରଙ୍କୁ ଫସାଇଥିଲେ ଜୋନ୍-୩ ଏସିପି ପି.କେ ରାଉତ ମଙ୍ଗଳବାର ଏକ ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି କି, ଭୁବନେଶ୍ୱରରେ ରହୁଥିବା ଜଣେ ମେଡିକାଲ ଅଫିସର ଯାଜପୁର ମଧୁବନ ସିଏଚ୍ସିରେ ଥିବା ବେଳେ ତାଙ୍କର ଇରାନୀଙ୍କ ସହ ସାକ୍ଷାତ ହୋଇଥିଲା । ଜଣେ ରୋଗୀ ହିସାବରେ ଡାକ୍ତର ଇରାନୀଙ୍କୁ ଚିକିତ୍ସା କରିଥିଲେ । ଇରାନୀ ସେବେଠାରୁ ଉକ୍ତ ଡାକ୍ତରଙ୍କ ସଂସ୍ପର୍ଶରେ ଆସିବା ସହ ତାଙ୍କ ମୋବାଇଲ ନମ୍ବର ରଖିଥିଲେ । ମଝିରେ ମଝିରେ ତାଙ୍କ ସହ ମୋବାଇଲରେ ଯୋଗାଯୋଗ କରନ୍ତି ଓ ଭୁବନେଶ୍ୱର ଯାଇ ସମ୍ପୃକ୍ତ ଡାକ୍ତରଙ୍କଠାରୁ ସାମ୍ପୁଲ ମେଡିସିନ ଆଣି ଆସନ୍ତି । ଗତ ୮ ତାରିଖ ରାତିରେ ଇରାନୀ ତାଙ୍କୁ ଫୋନ୍ କରି ବାପାଙ୍କ ଦେହ ଖରାପ ଅଛି, ତେଣୁ ତୁରନ୍ତ ଆସି ନାରଗୋଦାସ୍ଥିତ ଭଡ଼ାଘରେ ପହଞ୍ଚି ଚିକିତ୍ସା କରିବାକୁ ଅନୁରୋଧ କରିଥିଲେ । କାମରେ ବ୍ୟସ୍ତ ଥାଇ ମଧ୍ୟ ରାତି ୧୧ଟାରେ ଡାକ୍ତର ପଚାରିପଚାରି ଆସି ଇରାନୀ ଦେଇଥିବା ଠିକଣା ନାରଗୋଦାସ୍ଥିତ ସିଟି ହୋମ୍ସ ଡୁପ୍ଲେକ୍ସ ନଂ-୬୧ରେ ପହଞ୍ଚିଥିଲେ । ଘରେ ପଶିବା ମାତ୍ରେ ଇରାନୀ ତାଙ୍କୁ କୁଣ୍ଢାଇ ଧରିବା ସହ ପାଟି କରିଥିଲେ ।
ପୂର୍ବ ଯୋଜନା ମୁତାବକ ବାପି, ଗଣେଶ ଓ ଗିରିଜା ଘର ଭିତରେ ପଶି କବାଟ ବନ୍ଦ କରି ଦେଇଥିଲେ । ଡାକ୍ତରଙ୍କୁ ଛୁରୀ ଦେଖାଇ ଭୟଭୀତ କରାଇବା ସହ ଗୋଟିଏ ରୁମ୍ରେ ପୁରାଇ ବନ୍ଦୀ କରି ଦେଇଥିଲେ । ତାଙ୍କ କାର୍ ଚାବି, ମୋବାଇଲ ଓ ସୁନା ବ୍ରେସଲେଟ୍ ଛଡ଼ାଇ ନେଇଥିଲେ । ଇରାନୀ ଡାକ୍ତରଙ୍କୁ ଅସଦାଚରଣର ଭୟ ଦେଖାଇଥିଲେ । ପୁଲିସରେ ଦେଇ ତୁମକୁ ବରବାଦ କରିଦେବି ବୋଲି ଧମକ ଦେଇଥିଲେ । ଏଥିସହ ତାଙ୍କ ମୁଣ୍ଡ ଜାମିନ ରଖି ୨୫ ଲକ୍ଷ ଟଙ୍କା ଦେବାକୁ ଦାବି କରିଥିଲେ । ଏହା ଭିତରେ ବାପି, ଗଣେଶ ଓ ଗିରିଜା ତାଙ୍କୁ ଲାଠିରେ ନିସ୍ତୁକ ମାଡ଼ ମାରିଥିଲେ । ଅନ୍ୟ ଉପାୟ ନ ପାଇ ସମ୍ପୃକ୍ତ ଡାକ୍ତର ୧୦ ଲକ୍ଷ ଟଙ୍କା ଦେବାକୁ ରାଜି ହୋଇଥିଲେ । ଡାକ୍ତର ତୁରନ୍ତ ଫୋନ୍ ପେ’ରେ ଇରାନୀଙ୍କ ଆକାଉଣ୍ଟକୁ ୧ ଲକ୍ଷ ଟଙ୍କା ଟ୍ରାନ୍ସଫର କରିବା ପାଇଁ ପାସ୍ୱାର୍ଡ ଦେଇଦେଇଥିଲେ । ଅଭିଯୁକ୍ତମାନେ ପାସ୍ୱାର୍ଡ ନେଇ ଇରାନୀଙ୍କ ଆକାଉଣ୍ଟ୍କୁ ୧ ଲକ୍ଷ ଟଙ୍କା ଟ୍ରାନ୍ସଫର କରି ନେଇଥିଲେ । ଅବଶିଷ୍ଟ ୯ ଲକ୍ଷ ଟଙ୍କା ସେ ଇରାନୀଙ୍କ ନାମରେ ଚେକ୍ ଦେବା ପାଇଁ କହିଥିଲେ ଓ ସାଙ୍ଗରେ ଘରକୁ ଗଲେ ଦେବି ବୋଲି କହିଥିଲେ । ତେଣୁ ବାପି, ଗଣେଶ ଓ ଗିରିଜା ଡାକ୍ତରଙ୍କୁ କାର୍ରେ ନେଇ ତାଙ୍କ ଇନ୍ଫୋସିଟି ଥାନା ଅଞ୍ଚଳରେ ଥିବା ଘରକୁ ଯାଇଥିଲେ । ଡାକ୍ତର ସେମାନଙ୍କୁ ୯ ଲକ୍ଷ ଟଙ୍କାର ଚେକ୍ ଦେଇଥିଲେ । ପରେ ସେମାନେ ଡାକ୍ତରଙ୍କୁ ଧରି ପୁଣି ନାରଗୋଦାସ୍ଥିତ ସିଟି ହୋମ୍ସକୁ ଆସିଥିଲେ ।
ତା’ପରେ ସେମାନେ ଡାକ୍ତରଙ୍କ କାର୍ ଚାବି, ମୋବାଇଲ ଓ ବ୍ରେସ୍ଲେଟ୍ ଫେରାଇ ଦେଇଥିଲେ । ଧମକ ଦେଇଥିଲେ କି, କାହାକୁ କହିଲେ କିମ୍ବା ପୁଲିସରେ ଦେଲେ ତୁମ ନାମରେ ଥାନାରେ ବଳାତ୍କାର ଉଦ୍ୟମ ଅଭିଯୋଗ କରିବୁ । ଲୋକଲଜ୍ଜା ଭୟରେ ଡାକ୍ତର କାହାକୁ କିଛି କହି ନ ଥିଲେ । ଶେଷରେ ସାହସ ଜୁଟାଇ ଗତକାଲି ଆସି ତମାଣ୍ଡୋ ଥାନାରେ ଅଭିଯୋଗ କରିଥିଲେ । ପୁଲିସ ଏକ ମାମଲା ରୁଜୁ କରି ଗତକାଲି ରାତାରାତି ଇରାନୀଙ୍କ ସମେତ ବାପି, ଗଣେଶ ଓ ଗିରିଜାଙ୍କୁ ଉଠାଇ ଆଣିଥିଲା । ସେମାନଙ୍କଠାରୁ ୩୦ ହଜାର ଟଙ୍କା, ୯ ଲକ୍ଷ ଟଙ୍କାର ଚେକ୍, ଛୁରୀ ଓ ୨ଟି ମୋବାଇଲ ଫୋନ୍ ଜବତ କରିଥିଲା ।
