ଭୁବନେଶ୍ୱର,୦୯/୦୬: ରବିବାର ଜ୍ୟେଷ୍ଠ ମାସ ଶୁକ୍ଳ ଚତୁର୍ଥୀ ଅବସରରେ ମହାପ୍ରଭୁ ଶ୍ରୀଲିଙ୍ଗରାଜଙ୍କ ବିବାହର ଆଦ୍ୟ ପର୍ବ ମଙ୍ଗଳକୃତ୍ୟ ଅନୁଷ୍ଠିତ ହେବ । ଏହି ଦେବ ବିବାହ ଉତ୍ସବ ନିମନ୍ତେ ମନ୍ଦିର ପ୍ରଶାସନ ଓ ଶୀତଳଷଷ୍ଠୀ କମିଟି ଦ୍ୱାରା ବ୍ୟାପକ ବ୍ୟବସ୍ଥା କରାଯାଇଛି।
ମଙ୍ଗଳକୃତ୍ୟର ସମସ୍ତ ନୀତି ରବିବାର ସନ୍ଧ୍ୟାଧୂପ ପରେ ଆରମ୍ଭ ହେବ । ୩୫ଟି କୁଡୁଆରେ ଦେବଦେବୀଙ୍କ ଉଦ୍ଦେଶ୍ୟରେ ଖେଚୁଡି ଭୋଗ ଲାଗି ହେବ। ଅଷ୍ଟଚଣ୍ଡୀଙ୍କୁ ନିମନ୍ତ୍ରଣ ପାଇଁ ଶୋଭାଯାତ୍ରାରେ ଘଣ୍ଟ ଓ ମଶାଲ ସହ ପୂଜାପଣ୍ଡା,ମହାସୁଆର,ପତ୍ରୀ,ବଡୁ ଓ ଅନ୍ୟାନ୍ୟ ସେବକ ଯିବେ । ସୋମବାର ପଞ୍ଚମୀ ତିଥିରେ ଦେବ ବିବାହ ପର୍ବ ଅନୁଷ୍ଠିତ ହେବ । ନିର୍ଦ୍ଧାରିତ ନୀତି ନିର୍ଘଣ୍ଟ ଅନୁଯାୟୀ ବିବାହ ନିମନ୍ତେ ସୋମବାର ରାତି ସାଢ଼େ ୯ଟାରୁ ସାଢ଼େ ୧୦ଟା ମଧ୍ୟରେ ବରଯାତ୍ରୀ ମାନେ ଭୋଜିଭାତରେ ଆପ୍ୟାୟିତ ହୋଇ ଗୌରୀ ମନ୍ଦିର ଅଭିମୁଖେ ରାତି ୧୧ଟାରେ ବାଜା ରୋଷଣୀ ଧରି ଶ୍ରୀଜିଉଙ୍କ ସହିତ ଯିବେ । ଏଥର ଶୋଭାଯାତ୍ରାରେ ବାଣ ଏବଂ ଡିଜେ ବ୍ୟବହାର ଉପରେ କଟକଣା ରହିଛି। ଭୋର ୩ଟା ସୁଦ୍ଧା ହସ୍ତଗଣ୍ଠି ପଡ଼ି ବିବାହ ନୀତି ସମାପନ ହେବ । ଏହାପରେ ଦେବ ଦମ୍ପତି ଦିନ ତମାମ କେଦାରଗୌରୀ ପୀଠରେ ଶ୍ରଦ୍ଧାଳୁଙ୍କୁ ଦର୍ଶନ ଦେବେ ।
ମଙ୍ଗଳବାର ରାତି ୧୦ଟାରେ ମନ୍ଦିର ଅଭିମୁଖ ପ୍ରତ୍ୟାବର୍ତ୍ତନ କରିବେ । ବିଦାୟ ବେଳେ ଶ୍ୱଶୁର ଘର ତରଫରୁ ଶ୍ରୀଲିଙ୍ଗରାଜଙ୍କୁ ଇନ୍ଦ୍ର ହାତୀ ଉପହାର ସ୍ୱରୂପ ପ୍ରଦାନ କରାଯିବ ବୋଲି ବରିଷ୍ଠ ସେବାୟତ ମିହିର ମହାପାତ୍ର ଓ ଲୁଲୁ ମହାପାତ୍ର କହିଛନ୍ତି । ଶୀତଳ ଷଷ୍ଠୀ ଯାତ୍ରାରେ ଲଉଡ଼ି ନୃତ୍ୟ,ପଶୁ ପକ୍ଷୀ ବେଶ ନୃତ୍ୟ ଏବଂ ଅନେକ ପାରମ୍ପରିକ ବାଜା ଓ ନୃତ୍ୟ ପରିବେଷଣ କରାଯିବ ବୋଲି ଶୀତଳ ଷଷ୍ଠୀ କମିଟିର ସମ୍ପାଦକ ପୃଥ୍ୱୀକାନ୍ତ ମହାପାତ୍ର ଏବଂ ସୁରେଶ କୁମାର ରାଉତରାୟ କହିଛନ୍ତି । ଯାତ୍ରାକୁ ଅଧିକ ଶୃଙ୍ଖଳିତ କରିବା ଲାଗି ପୋଲିସ ପ୍ରଶାସନ ଦ୍ୱାରା ସମସ୍ତ ବ୍ୟବସ୍ଥା ହୋଇଛି । ନିଶାଡିଙ୍କ ଉପରେ କଡ଼ା ନଜର ରଖାଯିବ । ଆବଶ୍ୟକ ସ୍ଥଳେ ବ୍ରେଥ ଆନାଲାଇଜର ଦ୍ୱାରା ପରୀକ୍ଷା କରାଯାଇ ଦଣ୍ଡିତ କରାଯିବ ବୋଲି ଶ୍ରୀଲିଙ୍ଗରାଜ ଥାନା ଅଧିକାରୀ ପୂର୍ଣ୍ଣଚନ୍ଦ୍ର ପ୍ରଧାନ ଓ ବ୍ରାହ୍ମଣ ନିଯୋଗ ସମ୍ପାଦକ ବିରଞ୍ଚି ନାରାୟଣ ପତି କହିଛନ୍ତି ।
୨ ଦିନ ଲାଗି ରହିବ ଭୋଜିଭାତ
ସୋମବାର ଓ ମଙ୍ଗଳବାର ସନ୍ଧ୍ୟାରେ ହେବ ଭୋଜିଭାତ । ସୋମବାର ମନ୍ଦିର ପ୍ରଶାସନ ତରଫରୁ ବିବାହ ଉତ୍ସବରେ ୨୦୦ ଜଣ ବରଯାତ୍ରୀଙ୍କ ନିମନ୍ତେ ପ୍ରସାଦର ବ୍ୟବସ୍ଥା ହୋଇଛି । ସନ୍ଧ୍ୟାରେ ଶ୍ରୀଜିଉଙ୍କ ମନ୍ଦିର ସମ୍ମୁଖରେ ପ୍ରାୟ ୨୦୦୦ ଶ୍ରଦ୍ଧାଳୁଙ୍କ ନିମନ୍ତେ ସେବାୟତ ମାନଙ୍କ ଦ୍ୱାରା ଅନ୍ୟ ଏକ ଭୋଜି ଦିଆଯିବ । ସେହିପରି ମଙ୍ଗଳବାର ଶୀତଳଷଷ୍ଠୀ ଅବସରରେ ଗୌରୀଙ୍କ ପୀଠରେ ପ୍ରାୟ ୧୦,୦୦୦ ଶ୍ରଦ୍ଧାଳୁଙ୍କ ନିମନ୍ତେ ପ୍ରସାଦ ସେବନର ବ୍ୟବସ୍ଥା ହୋଇଛି ।
ସାମିଲ ହେବେନି ଶ୍ରୀକପିଳେଶ୍ୱର
ପରମ୍ପରା ମୁତାବକ ମହାପ୍ରଭୁ ଶ୍ରୀଲିଙ୍ଗରାଜଙ୍କ ବିବାହ ଉତ୍ସବରେ ଦୁଇ ଦିନ ଯାକ ଶ୍ରୀକପିଳେଶ୍ୱର ଉପସ୍ଥିତ ରହିବା ପରମ୍ପରା ରହିଛି । କିନ୍ତୁ ପ୍ରାୟ ୯ ବର୍ଷ ହେଲାଣି ଏହା ବନ୍ଦ ପଡିଛି । ତଥାପି ମନ୍ଦିର ପ୍ରଶାସନ ଏବେବି ପ୍ରତିବର୍ଷ ନୀତି ନିର୍ଘଣ୍ଟରେ ଶ୍ରୀକପିଳେଶ୍ୱରଙ୍କ ବିଜେ ନିମନ୍ତେ ସମୟ ସଂରକ୍ଷିତ ରଖୁଛନ୍ତି । କିନ୍ତୁ ପ୍ରଶାସନ,ଦେବୋତ୍ତର ବିଭାଗ ଓ ଉଚ୍ଚ ନ୍ୟାୟାଳୟଙ୍କ ଚରମ ଅବହେଳାରୁ ଏହି ମହାନ ପରମ୍ପରା ରକ୍ଷା ହେଉନାହିଁ । ତେଣୁ ଏଥର ମଧ୍ୟ ଶ୍ରୀକପିଳେଶ୍ୱର ଏହି ଦେବବିବାହ ଉତ୍ସବରେ ସାମିଲ ନହେବାର ଆଶଙ୍କା ଉପୁଜିଛି ।