ମାଲକାନଗିରି, ୧୯/୯ : ସାଧାରଣତଃ ଚୋରମାନେ ଧରା ପଡିଯିବା ଭୟରେ ଚୋରି ସାମଗ୍ରୀ ଗୁଡିକୁ ଲୁଚା ଛପାରେ କମ ମୂଲ୍ୟରେ ବିକ୍ରୀ କରିଦେଇ ଥାନ୍ତି। ହେଲେ ଏମିତି ଏକ ଚୋର ଯିଏ ଚୋରି କରିଥିବା ସୁନା ଗହଣାକୁ ଲୁଚା ଛପାରେ ବିକ୍ରୀ ନ କରି ଖୁଲମ ଖୁଲା ଭାବେ ବ୍ୟାଙ୍କ ଗୁଡିକରେ ସୁନା ବନ୍ଧକ ରଖି ଲକ୍ଷାଧିକ ଟଙ୍କା ଆଣିଥିବାର ଜଣା ପଡିଛି। ଏବେ ପୁଲିସ ଆଖିରେ ଚୋରର ଚତୁରତା ଧରା ପଡିଯାଇଛି । ସୁନା ସହିତ ଚୋରକୁ ଗିରଫ କରିଛି ପୁଲିସ। ଏମିତି ଘଟଣା ଘଟିଛି ମାଲକାନଗିରି ଜିଲ୍ଲା ସଦର ମହାକୁମାରେ। 

ମାଲକାନଗିରି ଥାନା ସ୍ଥିତ ପରଜାଗୁଡା ଗ୍ରାମର ଅଜୟ କୁମାର ବିଶ୍ୱାସ ଗତ ଜାନୁଆରୀ ମାସ ୧ତାରିଖରେ ପରିବାର ସହିତ ଏମଭି ୭୯ ଗ୍ରାମ ରେ ରହୁଥିବା ବନ୍ଧୁଙ୍କ ଘରକୁ ବୁଲିବାକୁ ଯାଇଥିଲେ। ସେ ୨ତାରିଖ ରେ ଘରକୁ ଆସି ଦେଖିଲେ ଯେ ତାଙ୍କ ଗେଟ ଓ କବାଟ ତାଲା ଭଙ୍ଗା ଯାଇଛି। ଘର ଭିତରେ ଥିବା ଆଲମିରା ଭଙ୍ଗା ଯାଇ ସୁନାଗହଣା ଓ ନଗଦ ୬୦ହଜାର ଟଙ୍କା ଚୋରି ହୋଇଯାଇଛି। ସେ ସଙ୍ଗେ ସଙ୍ଗେ ମାଲକାନଗିରି ଆଦର୍ଶ ଥାନାରେ ଏ ସମ୍ପର୍କରେ ଏକ ଏତଲା ଦେଇଥିଲେ। ମାଲକାନଗିରି ଥାନା ପକ୍ଷରୁ ଏ ସମ୍ପର୍କରେ ଏକ ମାମଲା ରୁଜୁ କରା ଯାଇ ତଦନ୍ତ ଆରମ୍ଭ ହୋଇଥିଲା।  ବୁଧବାର ବିଶ୍ବସ୍ଥ ସୂତ୍ରରୁ ପୁଲିସ ଜାଣିବାକୁ ପାଇଥିଲା  ଯେ ଏମଭି ୧୧ ଗ୍ରାମର ଜଣେ ଯୁବକ ଦୁଇଟି ବ୍ୟାଙ୍କରେ କିଛି ସୁନା ଗହରା ବନ୍ଧକ ରଖି ଟଙ୍କା ନେଇଛି। ପୁଲିସ ଏହାର ତଦନ୍ତ କରି ଏମଭି୧୧ ଗ୍ରାମ ର ସଙ୍କର ମଜୁମଦାର (୩୧)ଙ୍କୁ ଗିରଫ କରି ଥାନା କୁ ଆଣି ପଚରା ଉଚରା କରିଥିଲା।  ଅଜୟ ଙ୍କ ଘରୁ ଚୋରି କରି ମାଲକାନଗିରି ଡିସିବି ବ୍ୟାଙ୍କ ଓ ଉତ୍କଳଗ୍ରାମ୍ୟ ବ୍ୟାଙ୍କ ରେ ସୁନାଗହଣା ବନ୍ଧକ ରଖି ଟଙ୍କା ଆଣିଥିବାର ସ୍ୱୀକାର କରିଥିଲା।  ପୁଲିସ ଦୁଇଟି ବ୍ୟାଙ୍କ ରୁ ୧୭ଗ୍ରାମ ସୁନା ଅଳଙ୍କାର ସହିତ ଶଙ୍କର ନିକଟରୁ ସୁନାମୁଦି ଓ ବ୍ରେସ ଲେଟ ଜବତ କରିଛି। ସଙ୍କରଙ୍କୁ ଚୋରି ଅଭିଯୋଗ ରେ ମାଲକାନଗିରି ଥାନା ପୁଲିସ କୋର୍ଟ ଚାଲାଣ କରିଛି।