ମୁମ୍ବାଇ: ‘12th Fail’ ଚଳଚ୍ଚିତ୍ରର ମୁଖ୍ୟ ଅଭିନେତା ବିକ୍ରାନ୍ତ ମେସି ବାପା ହୋଇଛନ୍ତି । ଚଳଚ୍ଚିତ୍ରର ବଡ଼ ସଫଳତା ପରେ ଏବେ ମେସି ଶିଶୁପୁତ୍ରର ବାପା ହେବାର ସୌଭାଗ୍ୟ ଅର୍ଜନ କରିଛନ୍ତି । ନିଜ ଫିଲ୍ମର ସଫଳତା ପାଇଁ ଖୁସି ଥିବା ବିକ୍ରାନ୍ତଙ୍କୁ ପୁଣି ମିଳିଛି ଖୁସି । ବିବାହାର ଦୁଇ ବର୍ଷ ପରେ ବାପା ହୋଇଛନ୍ତି ବିକ୍ରାନ୍ତ । ତାଙ୍କ ପତ୍ନୀ ଶୀତଲ ଠାକୁର ଜଣେ ଶିଶୁପୁତ୍ରକୁ ଜନ୍ମ ଦେଇଛନ୍ତି । ବିକ୍ରାନ୍ତ ଏବଂ ଶୀତଲ ବାପା-ମା ହୋଇଥିବାର ଖୁସି ସୋସିଆଲ ମିଡିଆରେ ଜାହିର କରିଛନ୍ତି ।
ଅଭିନେତା ବିକ୍ରାନ୍ତ ଇନଷ୍ଟାଗ୍ରାମରେ ଏକ ପୋଷ୍ଟର ସେୟାର କରିଛନ୍ତି । ଏହି ପୋଷ୍ଟରରେ ତାରିଖ ଲେଖା ରହିଛି । ଏହା ସହ ଦମ୍ପତିଙ୍କ ଏକ ସୁନ୍ଦର ଶିଶୁପୁତ୍ର ଜନ୍ମ ନେଇଥିବା ନେଇ ମଧ୍ୟ ତଥ୍ୟ ଦିଆଯାଇଛି । ବିକ୍ରାନ୍ତଙ୍କ ପାଖରୁ ଏହି ଖବର ମିଳିଯିବା ପରେ ପ୍ରଶଂସକଙ୍କ ମହଲରେ ଖୁସି କହିଲେ ନସରେ । ଫ୍ୟାନ୍ସ ସେଲିବ୍ରିଟି ଦମ୍ପତିଙ୍କୁ ଶୁଭେଚ୍ଛା ଜଣାଉଛନ୍ତି । ବଲିଉଡର ବହୁ ଅଭିନେତା-ଅଭିନେତ୍ରୀ ବିକ୍ରାନ୍ତ ଏବଂ ଶୀତଲଙ୍କୁ ଅଭିନନ୍ଦନ ଜଣାଇଥିବା ଦେଖିବାକୁ ମିଳିଛି ।
ବିକ୍ରାନ୍ତ ମେସି ୧୪ ଫେବୃଆରୀ ୨୦୨୨ରେ ଶୀତଲ ଠାକୁରଙ୍କୁ ବିବାହ କରିଥିଲେ । ସେଲିବ୍ରିଟି ଦମ୍ପତିଙ୍କ ଏହି ବିବାହ ପାହାଡୀ ରୀତିନୀତିରେ ସଂପନ୍ନ ହୋଇଥିଲା । ବିକ୍ରାନ୍ତ ନିଜର ବିବାହାକୁ ଗୋପନୀୟ ରଖିବାକୁ ଖୁବ ଚେଷ୍ଟା କରିଥିଲେ ସୁଦ୍ଧା ଫଟୋ-ଭିଡିଓ ଭାଇରାଲ ହୋଇଥିଲା । ଫେବୃଆରୀ ୧୪ରେ ଦମ୍ପତିଙ୍କ ବିବାହକୁ ଦୁଇ ବର୍ଷ ପୂରିବାକୁ ଯାଉଛି । ଆଉ ଏହି ପ୍ରେମ ସପ୍ତାହାରେ ବିକ୍ରାନ୍ତ ଏବଂ ଶୀତଲ ଶିଶୁପୁତ୍ରକୁ ସ୍ବାଗତ କରିଛନ୍ତି ।
