ନୂଆଦିଲ୍ଲୀ ୦୩/୦୨: ବିରଳ ସାମଗ୍ରୀଗୁଡ଼ିକର ନିଲାମ ବିଷୟରେ ଆପଣ ଜାଣନ୍ତି । କିନ୍ତୁ କେବେ ଶତାଧିକ ବର୍ଷ ପୁରୁଣା ଫଳ କିମ୍ବା ପରିବାର ନିଲାମ ବିଷୟରେ ଶୁଣିଛନ୍ତି ?  ନିକଟରେ ୨୮୫ ବର୍ଷ ପୁରୁଣା ଲେମ୍ବୁର ନିଲାମ ହୋଇଛି । ହଁ, ବିଶ୍ୱାସ ନ ହେଲେ  ବି ଏହା ସତ । ଊନବିଂଶ ଶତାବ୍ଦୀର ଏକ ଛୋଟ ଆଲମାରୀର ଡ୍ରୟର୍‌ରୁ ମିଳିଥିବା  ଏହି ଶୁଖିଲା ଲେମ୍ବୁର ଚଉଡ଼ା ପ୍ରାୟ ୨ ଇଞ୍ଚ । ତା’ ଉପର ଚୋପା ସମ୍ପୂର୍ଣ୍ଣ ରୂପେ  ଧୂସର ହୋଇଯାଇଛି । ଲେମ୍ବୁ ଉପରେ ଲିଖିତ ବାର୍ତ୍ତାରୁ ଜଣାପଡୁଛି, ଏଇଟି  ୧୭୩୯ ମସିହାର । 

ଲେମ୍ବୁରେ ଉଲ୍ଲେଖ ହୋଇଛି ‘୧୭୩୯ ମସିହା, ନଭେମ୍ବର  ୪ ତାରିଖରେ ପି  ଲୁ ଫ୍ରାନ୍‌ଚିନି  ନାମକ ବ୍ୟକ୍ତି  ଏହାକୁ ମିସ୍‌  ଇ ବାକ୍ସଟରଙ୍କୁ  ପ୍ରଦାନ କରିଥିଲେ ।’ ଏହାକୁ ଭାରତରୁ ବ୍ରିଟେନକୁ ଉପହାର  ସ୍ୱରୂପ ଅଣାଯାଇଥିବା ଅନୁମାନ କରାଯାଉଛି । ଏହାକୁ ପାଇଥିବା  ପରିବାର ବ୍ରିଟେନର ଶ୍ରପ୍‌ଶାୟାର ସ୍ଥିତ ବ୍ରେଟେଲ୍ସ ନିଲାମକର୍ତ୍ତାଙ୍କ  ପାଖରେ ପହଞ୍ଚିଲେ । ଜଣେ ବିଶେଷଜ୍ଞ ଉକ୍ତ ଆଲମାରୀର  ଫଟୋ ଉଠାଇବା ସମୟରେ ତା’ର ଡ୍ରୟର୍‌ରୁ ଏହି ଲେମ୍ବୁକୁ  ପାଇଥିଲେ । ମଜାଦାର ଅନୁଭୂତି ହାସଲ ଲାଗି ପ୍ରାୟ ୩ ଶତାବ୍ଦୀ  ପୁରୁଣା ଏହି ଲେମ୍ବୁକୁ ନିଲାମ କରିବାକୁ ନିଲାମ ଗୃହ ନିଷ୍ପତ୍ତି  ନେଇଥିବା ଏହାର ମାଲିକ ଡେଭିଡ୍‌ ବ୍ରେଟେଲ୍‌ କହିଛନ୍ତି । ଲେମ୍ବୁର  ନିଲାମ ଲାଗି ପ୍ରଥମ ବୋଲି ୪୨୦୦ ଟଙ୍କାରୁ ଆରମ୍ଭ ହେଲା ।  ଶେଷରେ ୧.୫ ଲକ୍ଷ ଟଙ୍କାରେ ଏହା ନିଲାମ ହେଲା । ତେବେ  ମଜା କଥା ହେଉଛି, ଯେଉଁ ଆଲମାରୀରେ ଲେମ୍ବୁ ଥିଲା,  ତାହା ମାତ୍ର ୩୨୦୦ ଟଙ୍କାରେ ବିକ୍ରି ହେଲା।