ତୁରିନ,୨୦/୧୧: ଚଳିତ  ଏଟିପି ଫାଇନାଲ୍ସର ଫାଇନାଲ୍‌ ଲାଇନ୍‌ ଅପ୍‌ ଚୂଡ଼ାନ୍ତ ହୋଇଛି । ବିଶ୍ୱର ଏକ ନମ୍ବର ଖେଳାଳି ନୋଭାକ୍‌ ଜୋକୋଭିକ୍‌  ଓ ଇଟାଲୀର ଜାନିକ୍‌ ସିନରଙ୍କ ମଧ୍ୟରେ  ଟାଇଟଲ୍‌ ପାଇଁ ଲଢ଼େଇ ହେବ ।  ରବିବାର ଦ୍ୱିତୀୟ ସେମି ଫାଇନାଲ୍‌ରେ  ଜୋକୋଭିକ୍‌ ସିଧାସଳଖ ୬-୩,  ୬-୨ ସେଟ୍‌ରେ ବିଶ୍ୱର ୨ନଂ ଖେଳାଳି  ସ୍ପେନର କାର୍ଲୋସ୍ର ଅଲ୍‌କାରାଜଙ୍କୁ ପରାସ୍ତ କରିଥିଲେ । ଏହି ମ୍ୟାଚ୍‌  ଜିତିବା ପାଇଁ ତାଙ୍କୁ ୧ଘଣ୍ଟା ୩୦  ମିନିଟ୍‌ ଲାଗିଥିଲା । ଛଅ ଛଅ ଥର ଚାମ୍ପିଅନ୍‌ ଜୋକୋଭିକ୍‌ ନବମ ଥର  ଫାଇନାଲ୍‌ରେ ପ୍ରବେଶ କରିଛନ୍ତି ।  

ପୂର୍ବରୁ ଅନ୍ୟ ଏକ ସେମିରେ ସିନର  ୨ଘଣ୍ଟା ୨୫ମିନିଟ୍‌ର ସଂଘର୍ଷ ପରେ  ୬-୩, ୬-୭ (୪-୭), ୬-୧  ସେଟ୍‌ରେ ରୁଷିଆ ତାରକା ଡାନିଲ୍‌  ମେଡଭେଡେଭ୍‌ଙ୍କୁ ପରାସ୍ତ କରିଥିଲେ । ସର୍ବିୟା ତାରକା ଜୋକୋଭିକ୍‌  ପୂର୍ବରୁ ୨୦୦୮ରେ ପ୍ରଥମ ଥର ଏଟିପି  ଫାଇନାଲ୍ସ ଚାମ୍ପିଅନ୍‌ ହୋଇଥିଲେ ।  ଏହାପରେ ସେ କ୍ରମାନ୍ୱୟରେ ୪ଥର  (୨୦୧୨, ୨୦୧୩, ୨୦୧୪, ୨୦୧୫)  ଚାମ୍ପିଅନ୍‌ ହୋଇଥିବାବେଳେ ଗତ  ୨୦୨୨ ସଂସ୍କରଣରେ ଟ୍ରଫି ହାସଲ  କରିଥିଲେ । ଫାଇନାଲ୍‌ରେ ସେ ସିନରଙ୍କୁ ହରାଇ ସ୍ୱିଜରଲାଣ୍ଡର ପ୍ରସିଦ୍ଧ ଖେଳାଳି ରୋଜର ଫେଡେରରଙ୍କ  ରେକର୍ଡ଼ ଭଙ୍ଗ କରିବା ଲକ୍ଷ୍ୟରେ  ରହିଛନ୍ତି । ଫେଡେରର ୬ଥର ଟାଇଟଲ୍‌ ହାତେଇବାରେ ସଫଳ  ହୋଇଥିଲେ ।