ଭୁବନେଶ୍ୱର,୨୧/୧୧: ଶୀତ ଅଧିବେଶନ ପାଇଁ ସୋମବାର ବିଜେପି ବିଧାୟକ ଦଳ ବୈଠକ ସରିଥିବା ବେଳେ ମଙ୍ଗଳବାର ସକାଳେ ଶଙ୍ଖ ଭବନରେ ବିଜେଡି ବିଧାୟକ ଦଳ ବୈଠକ ଅନୁଷ୍ଠିତ ହେବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ  ବୈଠକରେ କେନ୍ଦ୍ର ବିରୋଧୀ ପ୍ରସଙ୍ଗ ଉଠାଇ  ବିରୋଧୀଙ୍କୁ କିଭଳି ମୁକାବିଲା କରାଯିବ, ସେ ନେଇ  ରଣନୀତି ପ୍ରସ୍ତୁତ କରିବ ବିଜେଡି । ବିଶେଷକରି ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ମାନ୍ୟତା, ମହିଳା ବିଲ୍‌ ଲାଗୁରେ  ବିଳମ୍ବ, ରାଜ୍ୟରେ ଚାଲିଥିବା ବିଭିନ୍ନ ଜାତୀୟ ରାଜପଥ  କାମ ଓ ରେଳ ପ୍ରକଳ୍ପ କାର୍ଯ୍ୟରେ ବିଳମ୍ବ, ବିଭିନ୍ନ  ବିଭାଗର ବକେୟା ଅର୍ଥ ପ୍ରଦାନରେ ବିଳମ୍ବ ଆଦି  ପ୍ରସଙ୍ଗରେ ବିଜେଡି ଘେରିବ ବୋଲି ଜଣାପଡ଼ିଛି । 

ସେହିପରି କଂଗ୍ରେସ ବିଧାୟକ ଦଳ ବୈଠକ  ମଙ୍ଗଳବାର ୧୧ଟାରେ ବସିବ । ପୂର୍ବତନ ବାଚସ୍ପତି  ମହେଶ୍ୱର ମହାନ୍ତିଙ୍କ ପରଲୋକ ପାଇଁ ଶୋକ  ପ୍ରସ୍ତାବ ପରେ ଗୃହ ମୁଲତବୀ କରାଯିବ । ତା’  ପରେ କଂଗ୍ରେସ ବିଧାୟକ ଦଳ ବୈଠକ ହେବ ।  ବୈଠକରେ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ଜନବିରୋଧୀ ନୀତିଗୁଡ଼ିକ ବାବଦରେ ଆଲୋଚନା  କରାଯିବ ବୋଲି ସୂଚନା ମିଳିଛି।