ନୂଆଦିଲ୍ଲୀ,୦୪/୦୨: ଗତ ୪ ବର୍ଷରେ ଅଯୋଧ୍ୟାରେ ପ୍ରପର୍ଟି ଦର ପ୍ରାୟ ୪ ଗୁଣା ବୃଦ୍ଧି ପାଇଛି । ଏହା ସଂପୃକ୍ତ ସହରର ଅର୍ଥନୈତିକ ଅଭିବୃଦ୍ଧିର ଏକ ପ୍ରମୁଖ ମାପକ ଭାବେ ବିଚାର କରାଯାଇପାରେ । ସାଧାରଣତଃ କୃଷି ଅର୍ଥନୀତି ଭାବେ ଜଣା ଅଯୋଧ୍ୟାରେ ରିୟଲ ଇଷ୍ଟେଟ୍ ଡିଲ୍ ସଂଖ୍ୟା ଦ୍ରୁତ ବେଗରେ ବଢ଼ିଚାଲିଛି । ଷ୍ଟାମ୍ପ ଏବଂ ପଞ୍ଜୀକରଣ ବିଭାଗ ତଥ୍ୟ ଅନୁସାରେ, ସମୟ ସହିତ ପ୍ରପର୍ଟି ସେଲ୍ସ ଡିଡ୍ ସଂଖ୍ୟା ବୃହତ୍ ମାତ୍ରାରେ ବୃଦ୍ଧି ପାଇଛି । ଗତ ୪ ବର୍ଷରେ ରିୟଲ୍ ଇଷ୍ଟେଟ୍ ଡିଲ୍ ସଂଖ୍ୟା ୪୦% ବୃଦ୍ଧି ପାଇଥିବାବେଳେ ଦର ୪୦୦% ବୃଦ୍ଧି ପାଇଥିବା ଜଣାପଡ଼ିଛି ।
୨୦୨୦-୨୧ ଆର୍ଥିକବର୍ଷରେ ଅଯୋଧ୍ୟାରେ ୧୮,୩୨୯ ସଂଖ୍ୟକ ପ୍ରପର୍ଟି ସେଲ୍ ଡିଡ୍ ରେକର୍ଡ କରାଯାଇଥିଲା । ଆଲୋଚ୍ୟ ସମୟରେ ବିଭାଗ ଷ୍ଟାମ୍ପ ଡ୍ୟୁଟି ଫି’ ଆକାରରେ ୧୧୫ କୋଟି ଟଙ୍କା ଆଦାୟ କରିଥିଲା । ୨୦୨୦ ଅଗଷ୍ଟରେ ରାମ ମନ୍ଦିର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା । ଏହା ପରେ ସହର ବାହାରୁ ଲୋକମାନେ ଅଯୋଧ୍ୟା ଆଡ଼କୁ ଟାଣି ହୋଇଥିଲେ ।
୨୦୨୧-୨୨ରେ କୃଷି, ଅଣ-କୃଷି ଏବଂ ବାଣିଜ୍ୟିକ ପ୍ରପର୍ଟିଗୁଡ଼ିକର ରିୟଲ ଇଷ୍ଟେଟ୍ କାରବାର ୨୦,୩୨୧କୁ ବଢ଼ିଥିଲା । ଆଲୋଚ୍ୟ ସମୟରେ ଷ୍ଟାମ୍ପ ଡ୍ୟୁଟି ଆକାରରେ ୧୪୯ କୋଟି ଟଙ୍କା ଆଦାୟ ହୋଇଥିଲା । ୨୦୨୨-୨୩ରେ ୨୨,୧୮୩ ସଂଖ୍ୟକ ସେଲ୍ ଡିଡ୍ ଜାରି ହୋଇଥିବାବେଳେ ଷ୍ଟାମ୍ପ ଡ୍ୟୁଟି ଆକାରରେ ୧୩୮ କୋଟି ଟଙ୍କା ଆଦାୟ ହୋଇଥିଲା ।
ତେବେ ଚଳିତ ଆର୍ଥିକବର୍ଷର ଏପ୍ରିଲ ୧ରୁ ଡିସେମ୍ବର ୩୧ ମଧ୍ୟରେ ୧୮,୮୮୭ ସଂଖ୍ୟକ ପ୍ରପର୍ଟି ଟ୍ରାଞ୍ଜାକ୍ସନ ହୋଇଛି ଏବଂ ଆର୍ଥିକବର୍ଷ ଶେଷ ସୁଦ୍ଧା ଏହା ୨୫,୦୦୦ରୁ ୨୬,୫୦୦ ଛୁଇଁବା ନେଇ ଅନୁମାନ ରହିଛି । ତିନୋଟି ତ୍ରୟମାସରେ ଷ୍ଟାମ୍ପ ଏବଂ ପଞ୍ଜୀକରଣ ବିଭାଗ ପକ୍ଷରୁ ୧୩୮.୧୬ କୋଟି ଟଙ୍କାର ରାଜସ୍ୱ ଆଦାୟ ହୋଇଛି । ତେବେ ଆର୍ଥିକବର୍ଷ ଶେଷ ସୁଦ୍ଧା ଏହା ୧୯୫ କୋଟି ପର୍ଯ୍ୟନ୍ତ ଯାଇପାରେ ବୋଲି ଅନୁମାନ ରହିଛି ।
