ବରଗଡ଼,୧୭/୦୨: ବରଗଡ଼ବାସୀଙ୍କ ବହୁଦିନର ସ୍ୱପ୍ନ ପୂରଣ ହେବାକୁ ଯାଉଛି । ସହରବାସୀଙ୍କ ଦାବିକୁ ରାଜ୍ୟ ସରକାର ସମ୍ମାନ ଜଣାଇ ପୁରୁଣା ଡିଏଚ୍ଏଚ୍କୁ ଅର୍ବାନ୍ ଡାକ୍ତରଖାନାରେ ରୁପାନ୍ତରିତ କରିଛନ୍ତି । ଏହାକୁ ଶନିବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଭାସୀ ମାଧ୍ୟମରେ ଉଦ୍ଘାଟନ କରିବେ ।
ଲୋକଙ୍କ ଦାବି ଅନୁଯାୟୀ ଯେଭଳି ଡାକ୍ତରଖାନାର କାୟା ପରିବର୍ତ୍ତନ କରାଗଲା ସେହିପରି ସବୁ ସମୟରେ ଉପଯୁକ୍ତ ଡାକ୍ତର, କର୍ମଚାରୀ, ଯନ୍ତ୍ରପାତି ସାଙ୍ଗକୁ ଉତ୍ତମ ଚିକିତ୍ସା ସେବା ଯୋଗାଇ ଦେବାକୁ ଏହି ଅବସରରେ ସହରବାସୀ ସରକାରଙ୍କୁ ଗୁହାରି କରିଛନ୍ତି । ଏହି ଡାକ୍ତରଖାନା ଉଦ୍ଘାଟନ ପରେ ଖାଲି ପଦବି ମଧ୍ୟ ସରକାର ଶୀଘ୍ର ପୂରଣ କରିବେ ବୋଲି ଲୋକେ ଆଶାବ୍ୟକ୍ତ କରିଛନ୍ତି । ସହର ଭିତରେ ଥିବା ଜିଲ୍ଲା ମୁଖ୍ୟ ଚିକିତ୍ସାଳୟ(ଡିଏଚ୍ଏଚ୍) ୨୦୨୦ରେ ଖେଦାପାଲିକୁ ସ୍ଥାନାନ୍ତରିତ ହେବା ପରେ ବରଗଡ଼ବାସୀଙ୍କ ଦାବି ଓ ଆନ୍ଦୋଳନ ପରେ ସରକାର ପୁରୁଣା ଡିଏଚ୍ଏଚ୍କୁ ଅର୍ବାନ ସିଏଚ୍ସି ଭାବେ ଘୋଷଣା କରିଥିଲେ । ବିଧାୟକ ଦେବେଶ ଆଚାର୍ଯ୍ୟଙ୍କ ଅନୁରୋଧକ୍ରମେ ମୋ ହସ୍ପପିଟାଲ ଯୋଜନାରେ ଏହାକୁ ସାମିଲ କରାଯାଇ ୫ଟି ଅଧିନରେ ପ୍ରାୟ ୩ କୋଟି ଟଙ୍କା ବ୍ୟୟରେ ଏହାର ରୂପାନ୍ତରଣ କରାଯାଇଥିଲା ।