କୋକସରା,୧୦/୯ : ସ୍ୱଳ୍ପ ବୃଷ୍ଟିପାତ କାରଣରୁ ଚଳିତ ବର୍ଷ କଳାହାଣ୍ଡି ଜିଲ୍ଲା କୋକସରା ବ୍ଲକର ୨୨ଟି ପଞ୍ଚାୟତରେ ସମ୍ଭାବ୍ୟ ମରୁଡ଼ି ପରିସ୍ଥିତି ଉପୁଜିଛି । ବ୍ଲକକୁ ମରୁଡ଼ି ସମ୍ପୂର୍ଣ୍ଣ ଘୋଷଣା ସହ ଚାଷ କ୍ଷୟକ୍ଷତି ଆକଳନ କରି ଇନପୁଟ ସବସିଡ଼ି, କୃଷିଋଣ ଛାଡ଼ ଓ ଶସ୍ୟ ବୀମା ପ୍ରଦାନ ପାଇଁ ସଚେତନ କୃଷକ ମଞ୍ଚ ପକ୍ଷରୁ ରାଜ୍ୟ ସରକାରଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରାଯାଇଥିବାବେଳେ ବ୍ଲକ ଅଧ୍ୟକ୍ଷା ଜିଲ୍ଲା ପ୍ରଶାସନକୁ ମରୁଡ଼ି ଘୋଷଣା ପାଇଁ ଚିଠି ଲେଖିଛନ୍ତି । ଅନେକ ପଞ୍ଚାୟତରେ ଚାଷୀ ବୁଣା, ରୁଆ ଧାନରେ ଗାଈଗୋରୁ ଛାଡ଼ି ସାରିଲେଣି। ଅନେକ ସ୍ଥାନରେ ପକାଇଥିବା ଧାନ ତଳି ମଧ୍ୟ ରୋଇ ପାରି ନାହାଁନ୍ତି ଚାଷୀ । 

ଗମ୍ଭାରୀଗୁଡ଼ା ପଞ୍ଚାୟତ ବଙ୍ଗୋମୁଣ୍ଡା ଗାଁର ଚାଷୀମାନେ ବର୍ଷା ପାଇଁ ଇନ୍ଦ୍ର ଦେବତା ଓ ଗ୍ରାମ ଦେବାଦେବୀଙ୍କ ନିକଟରେ ପୂଜାର୍ଚ୍ଚନା କରି ଶରଣାପନ୍ନ ହେଉଥିବା ଦେଖିବାକୁ ମିଳିଛି । ବଙ୍ଗୋମୁଣ୍ଡା ଗ୍ରାମର ଗୌନ୍ତିଆ ଡବଲ ମାଝୀ, ଗ୍ରାମ୍ୟ ପୁଜକ ହର ପ୍ରସାଦ ପୁଝାରି, ଗାଁ ଗଣ୍ଡା ପୁରୁଷୋତ୍ତମ ନାଏକ ଓ ଚାଷୀମାନେ ଗାଁରେ ଏକ ବୈଠକ କରି ବର୍ଷା ପାଇଁ ଗ୍ରାମ ଦେବାଦେବୀଙ୍କୁ ସନ୍ତୁଷ୍ଟ କଲେ ହିଁ ବର୍ଷାର ଆଗମନ ହେବ ବୋଲି ଶନିବାର ସନ୍ଧ୍ୟାଠାରୁ ଗାଁ ମୁଣ୍ଡରେ ଥିବା ଦେବୀ ପୀଠରେ ପୂଜାର୍ଚ୍ଚନା ଆରମ୍ଭ କରିଛନ୍ତି । ଗ୍ରାମର ଦେବାଦେବୀ ଆସି ଗାଁର ମାଟି ଘର ନିକଟରେ ଏକତ୍ରିତ ହୋଇଥିଲେ । ସେମାନଙ୍କୁ ଗ୍ରାମ୍ୟ ପୁଜାରୀ ସ୍ୱାଗତ କରି ପୂଜାର୍ଚ୍ଚନା କରିବା ପରେ ଦେବାଦେବୀଙ୍କ ଶିରାମାନଙ୍କୁ କାଳିସି ଲାଗି ହୋଇଥିଲା। ଗ୍ରାମବାସୀଙ୍କ ଅଗାଢ଼ ବିଶ୍ୱାସ ଯେ ବର୍ଷାର ଦେବତା ଗ୍ରାମ ଦେବାଦେବୀଙ୍କ କୋପ ଦୃଷ୍ଟି କାରଣରୁ ବର୍ଷା ହେଉନାହିଁ । ସେମାନଙ୍କୁ ପୂଜାର୍ଚ୍ଚନା କରି ସନ୍ତୁଷ୍ଟ କଲେ ବର୍ଷା ହେବ ବୋଲି ବିଶ୍ୱାସ ରଖି ପୂଜାର୍ଚ୍ଚନା କରାଯାଉଛି । ଶନିବାରଠାରୁ ପୂଜା ଆରମ୍ଭ ହୋଇଥିବାବେଳେ ରବିବାର ମଧ୍ୟାହ୍ନରେ ସତକୁ ସତ ବର୍ଷା ହୋଇଯାଇଛି । ଏହି ପୂଜାର୍ଚ୍ଚନା ମଙ୍ଗଳବାର ପର୍ଯ୍ୟନ୍ତ ଚାଲିବା ନେଇ କମିଟି ପକ୍ଷରୁ କୁହାଯାଇଛି । ବଙ୍ଗୋମୁଣ୍ଡା ଗ୍ରାମ୍ୟ ଦେବାଦେବୀଙ୍କ ଶିରା ମଧୁସୂଦନ ବାଗ, ନାଥ ପୁଝାରି, ବିଶ୍ୱମ୍ବର ଦଳପତି, ଜଗନ୍ନାଥ ଦଳପତି, ସହଦେବ ପୁଝାରି ଗ୍ରାମବାସୀ ଦେବରାଜ ଦଳପତି, ଦୁର୍ଯୋଧନ ପୁଝାରି, ଘାସିରାମ ପୁଝାରି, ଝଯାଙ୍ଗ ଦଳପତି, ଦିବାକର ମାଝୀ ପ୍ରମୁଖ ଏଥିରେ ସହଯୋଗ କରୁଛନ୍ତି ।