ନୂଆଦିଲ୍ଲୀ,୦୭/୧୨: ଟେଷ୍ଟ କ୍ରିକେଟ୍ରେ ସର୍ବବୃହତ୍ ବ୍ୟକ୍ତିଗତ ଇନିଂସ ରେକର୍ଡ ୱେଷ୍ଟ ଇଣ୍ଡିଜ୍ର କିମ୍ବଦନ୍ତୀ ବ୍ୟାଟର ବ୍ରାଏନ ଲାରାଙ୍କ ନାମରେ ରହିଛି । ୨୦୦୪ ମସିହାରେ ସେ ଇଂଲଣ୍ଡ ବିପକ୍ଷ ଟେଷ୍ଟରେ ୪୦୦ରନ୍ର ମାରାଥନ ଇନିଂସ ଖେଳିଥିଲେ । ଇତି ମଧ୍ୟରେ ୧୯ ବର୍ଷ ବିତି ଯାଇଛି । ତାଙ୍କ ରେକର୍ଡ ଏବେବି ଅତୁଟ ରହିଛି । ଆଗାମୀ ଦିନରେ ଭାରତର ଶୁଭମନ ଗିଲ୍ ତାଙ୍କ ରେକର୍ଡ ଭାଙ୍ଗି ପାରିବେ ବୋଲି ଲାରା ମତବ୍ୟକ୍ତ କରିଛନ୍ତି ।
ଲାରା କହିଛନ୍ତି, ମୋ ୪୦୦ ରନ୍ର ଇନିଂସ ରେକର୍ଡ ଭାଙ୍ଗିବା ଭଳି ଦକ୍ଷତା ଗିଲଙ୍କ ନିକଟରେ ରହିଛି । କେବଳ ଟେଷ୍ଟ ରେକର୍ଡ ନୁହେଁ, ମୋ ନାମରେ ରହିଥିବା ଅପରାଜିତ ୫୦୧ ରନ୍ର ପ୍ରଥମ ଶ୍ରେଣୀ ରେକର୍ଡ ମଧ୍ୟ ଗିଲ୍ ଭଙ୍ଗ କରିପାରିବେ । ନୂଆ ପିଢି କ୍ରିକେଟ ଖେଳାଳିଙ୍କ ମଧ୍ୟରେ ଗିଲ୍ ସବୁଠୁ ଦକ୍ଷ ବ୍ୟାଟର ବୋଲି ମୁଁ ଅନୁଭବ କରୁଛି । ଆଗାମୀ ଦିନରେ ସେ ଅନ୍ତର୍ଜାତୀୟ କ୍ରିକେଟ୍ରେ ରାଜୁତି କରିବେ । ଅନ୍ତର୍ଜାତୀୟ କ୍ରିକେଟ୍ରେ ଅନେକ ରେକର୍ଡ ଭାଙ୍ଗିବେ ଗିଲ୍ । ଭବିଷ୍ୟତରେ ସେ କାଉଣ୍ଟି କ୍ରିକେଟ୍ ଖେଳିଲେ ମୋ ପ୍ରଥମ ଶ୍ରେଣୀ ବ୍ୟାଟିଂ ରେକର୍ଡ ମଧ୍ୟ ଭାଙ୍ଗିପାରିବେ ।
ସୂଚନାଯୋଗ୍ୟ, ୨୦୦୪ରେ ସେଣ୍ଟ ଜନ୍ସ (ଆଣ୍ଟିଗୁଆ)ଗ୍ରାଉଣ୍ଡରେ ଅନୁଷ୍ଠିତ ଉକ୍ତ ଟେଷ୍ଟରେ ଲାରା ୫୮୨ଟି ବଲ୍ର ସାମ୍ନା କରି ଅପରାଜିତ ୪୦୦ ରନ୍ ସଂଗ୍ରହ କରିଥିଲେ । ଏହି ଇନିଂସରେ ସେ ୪୩ଟି ଚୌକା ଓ ୪ଟି ଛକା ମାରିଥିଲେ । ୱେଷ୍ଟ ଇଣ୍ଡିଜ୍ ୫/୭୫୧ ରନ୍ କରି ପାଳି ଘୋଷଣା କରିଥିଲା । ଅବଶ୍ୟ ଏହି ମ୍ୟାଚ୍ଟି ଡ୍ର’ ରହିଥିଲା । ସେହିପରି ୧୯୯୪ରେ ସେ ୱାରୱିକସାୟାର ପକ୍ଷରୁ ଏକ କାଉଣ୍ଟି ମୁକାବିଲାରେ ଡରହାମ ବିପକ୍ଷରେ ଅପରାଜିତ ୫୦୧ ରନ୍ର ଇନିଂସ ଖେଳିଥିଲେ ।
