କଟକ,୦୩/୦୨: ମାଟ୍ରିକ ପରୀକ୍ଷା ଫେବ୍ରୁଆରୀ ୨୦ରୁ ଆରମ୍ଭ ହେବ । ଏହାର ପରିଚାଳନା ପାଇଁ ସେଣ୍ଟର ସୁପରିଟେଣ୍ଡେଣ୍ଟ୍ ମାନଙ୍କ ଲାଗି ମାଧ୍ୟମିକ ଶିକ୍ଷା ପରିଷଦ (ବୋର୍ଡ) ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଛି । ପରୀକ୍ଷା ପରିଚାଳନାରେ କୌଣସି ପ୍ରକାର ତ୍ରୁଟିକୁ ବରଦାସ୍ତ କରାଯିବ ନାହିଁ । ସେଥିପାଇଁ ନିର୍ଦ୍ଦେଶନାମାରେ ସ୍ପଷ୍ଟ ଭାବେ ସବୁ କିଛି ଉଲ୍ଲେଖ କରାଯାଇଛି ।
ବୋର୍ଡ ସଭାପତି ଶ୍ରୀକାନ୍ତ ତରାଇଙ୍କ ଦ୍ୱାରା ଜାରି ନିର୍ଦ୍ଦେଶ ମୁତାବକ, ପରୀକ୍ଷା ହଲ୍ରେ ମୋବାଇଲ୍ ବ୍ୟବହାର ସମ୍ପୂର୍ଣ୍ଣ ନିଷେଧ କରାଯାଇଛି । କେବଳ ସେଣ୍ଟର ସୁପରିଟେଣ୍ଡେଣ୍ଟ୍ ହିଁ ମୋବାଇଲ୍ ରଖିପାରିବେ ଏବଂ ଜରୁରିକାଳୀନ ସ୍ଥିତିରେ ବ୍ୟବହାର କରିପାରିବେ । ପର୍ଯ୍ୟବେକ୍ଷକଙ୍କ ଉପସ୍ଥିତିରେ କେବଳ ସେଣ୍ଟର ସୁପରିଟେଣ୍ଡେଣ୍ଟ୍ କିମ୍ବା ଡେପୁଟି ସେଣ୍ଟର ସୁପରିଟେଣ୍ଡେଣ୍ଟ୍ ନୋଡାଲ୍ ସେଣ୍ଟରରୁ ପ୍ରଶ୍ନପତ୍ର ପ୍ୟାକେଟ୍ ଗ୍ରହଣ କରିବେ । ପରୀକ୍ଷାକେନ୍ଦ୍ରର ପରୀକ୍ଷାର୍ଥୀଙ୍କ ଅନୁପାତ ଅନୁସାରେ ପ୍ରଶ୍ନପତ୍ର ଯେଭଳି ଗ୍ରହଣ କରାଯିବ ସେଥିପ୍ରତି ଦୃଷ୍ଟି ଦେବାକୁ କୁହାଯାଇଛି ।
ଷ୍ଟ୍ରଙ୍ଗ୍ରୁମ୍ରେ ପ୍ରଶ୍ନପତ୍ର ରଖିବା ସମୟରେ ସତର୍କ ରହିବାକୁ ନିର୍ଦ୍ଦେଶରେ ଉଲ୍ଲେଖ କରାଯାଇଛି । ଯଦି ପ୍ରଶ୍ନପତ୍ର କମ୍, ଅଧିକ କିମ୍ବା ଭୁଲ୍ ଥାଏ ତୁରନ୍ତ ସେ ସମ୍ପର୍କରେ ସିକ୍ରେଟ୍ ସେଲ୍ ଡେପୁଟି ସେକ୍ରେଟାରୀ ଦେବାନନ୍ଦ ନାୟକଙ୍କୁ ତୁରନ୍ତ ସୂଚନା ଦିଆଯିବ । ଯଦି ପ୍ରଶ୍ନପତ୍ରର ଅତିରିକ୍ତ ପ୍ୟାକେଟ୍ ଆସେ ତେବେ ତୁରନ୍ତ ତାକୁ ସେଣ୍ଟର ସୁପରିଟେଣ୍ଡେଣ୍ଟ ସୁରକ୍ଷିତ ରଖିବେ ଏବଂ ନୋଡାଲ୍ ସେଣ୍ଟରରେ ଥିବା ଡେସ୍ପାଚ୍ ଟିମ୍ ନିକଟରେ ଦାଖଲ କରିବେ । ପ୍ରତ୍ୟେକ ପ୍ରଶ୍ନପତ୍ର ପ୍ୟାକେଟ୍ ଖୋଲିବା ପୂର୍ବରୁ ଦୁଇ ଜଣ ପରୀକ୍ଷାର୍ଥୀଙ୍କ ଦସ୍ତଖତ ନେବା ବାଧ୍ୟତାମୂଳକ । ସମୟ ପୂର୍ବରୁ ପ୍ରଶ୍ନପତ୍ର ପ୍ୟାକେଟ୍ ଖୋଲିବାକୁ ଦଣ୍ଡନୀୟ ଅପରାଧ ଭାବେ ଗ୍ରହଣ କରାଯିବ । ପ୍ରଶ୍ନପତ୍ର ଷ୍ଟ୍ରଙ୍ଗରୁମ୍ରେ ରଖିବା ପୂର୍ବରୁ ସେଣ୍ଟର ସୁପରିଟେଣ୍ଡେଣ୍ଟ୍ ଏ ସମ୍ପର୍କରେ ସ୍ଥାନୀୟ ଥାନାକୁ ଖବର ଦେବେ ।
ପରୀକ୍ଷା ସମ୍ପର୍କୀତ ସମସ୍ତ ସୂଚନା ବୋର୍ଡକୁ ଜଣାଇବା ଲାଗି ଚଳିତବର୍ଷ ଅନ୍ଲାଇନ୍ ବ୍ୟବସ୍ଥା କରାଯାଇଛି । ଏକ ନିର୍ଦ୍ଦିଷ୍ଟ ସଫ୍ଟୱେର୍ ମାଧ୍ୟମରେ ସେଣ୍ଟର ସୁପରିଟେଣ୍ଡେଣ୍ଟ୍ ମାନେ ଏଥିରେ ରିପୋର୍ଟ କରିବେ । ପ୍ରତ୍ୟେକ ଦିନ ପରୀକ୍ଷା ଶେଷ ହେବା ପରେ ଅପରାହ୍ନ ୨ଟା ସୁଦ୍ଧା ଏହି ରିପୋର୍ଟ କରିବାକୁ ହେବ । ଏଥିରେ ସେଣ୍ଟର ନାମ, ସେଲ୍ ନମ୍ବର, ଜିଲ୍ଲା, ସେଣ୍ଟର କୋଡ୍, ପରୀକ୍ଷାର୍ଥୀଙ୍କ ସଂଖ୍ୟା, ଅନୁପସ୍ଥିତ ପରୀକ୍ଷାର୍ଥୀଙ୍କ ସଂଖ୍ୟା, କପି ଧରପଗଡ଼ ସମେତ ବିଭିନ୍ନ ତଥ୍ୟ ଅପ୍ଲୋଡ୍ କରିବେ ବୋଲି ନିର୍ଦ୍ଦେଶନାମାରେ ଉଲ୍ଲେଖ କରାଯାଇଛି ।
ସୂଚନାଯୋଗ୍ୟ, ବୋର୍ଡ ପରିଚାଳନାରେ ମାଟ୍ରିକ୍ ପରୀକ୍ଷା ଫେବ୍ରୁଆରୀ ୨୦ରୁ ଆରମ୍ଭ ହୋଇ ମାର୍ଚ୍ଚ ୪ତାରିଖରେ ଶେଷ ହେବ । ଚଳିତବର୍ଷ ୫ଲକ୍ଷ ୫୧ହଜାର ୬୧୧ ଜଣ ଛାତ୍ରଛାତ୍ରୀ ପରୀକ୍ଷା ଦେବେ।
