ପ୍ରମୂଖ ଖବର
  • ଆସୁଛି ଲଘୁଚାପ: ରବିବାରଠାରୁ ରାଜ୍ୟରେ ପ୍ରବଳ ବର୍ଷା, ୧୫ରୁ ୨୧ ଯାଏଁ ଉପକୂଳ ଏବଂ ଦକ୍ଷିଣ ଓଡ଼ିଶାରେ ବର୍ଷିବ
  • ||

ପନ୍ନୁ ବିରୁଦ୍ଧରେ ମାମଲା ରୁଜୁ କଲା NIA, ଭିଡିଓ ମାଧ୍ୟମରେ ଧମକ ଦେଇଥିଲା ଖଲିସ୍ତାନୀ ଆତଙ୍କବାଦୀ

Image Courtesy: swarajyamag

ନୂଆଦିଲ୍ଲୀ: ଖଲିସ୍ତାନୀ ଆତଙ୍କବାଦୀ ଗୁରପତଓ୍ବନ୍ତ ସିଂହ ପନ୍ନୁ ବିରୁଦ୍ଧରେ ମାମଲା ରୁଜୁ କଲା ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ) । ନଭେମ୍ବର ୧୯ରେ ଭାରତ-ଅଷ୍ଟ୍ରେଲିଆ ଫାଇନାଲ୍‌ ମୁକାବିଲା ଦିନ ବିମାନ ଯାତ୍ରୀ ଏବଂ ଏୟାର ଇଣ୍ଡିଆକୁ ଧମକ ଦେଇଥିଲା ପନ୍ନୁ । ପନ୍ନୁ ବିରୁଦ୍ଧରେ ୧୨୦ ବି, ୧୫୩ ଏ ଏବଂ ୫୦୬ ଆଇପିସି ଆଧାରରେ ମାମଲା ରୁଜୁ ହୋଇଛି । ଏହା ପୂର୍ବରୁ ଏୟାର ଇଣ୍ଡିଆ ବିମାନକୁ ବୋମା ଲଗାଇ ଉଡ଼ାଇ ଦେବା ନେଇ ପନ୍ନୁର ଧମକକୁ ନିନ୍ଦା କରିଥିଲା କାନାଡା । 

 ଗୁରପତଓ୍ବନ୍ତ ସିଂହ ପନ୍ନୁ ଭାରତ ସରକାରଙ୍କୁ ମଧ୍ୟ ଧମକ ଦେବାକୁ ପଛାଇ ନଥିଲା । ଗୁଜୁରାଟର ନରେନ୍ଦ୍ର ମୋଦୀ ଷ୍ଟାଡିୟମରେ ବିଶ୍ବକପ ଫାଇନାଲ ମ୍ୟାଚ୍‌ ନଭେମ୍ବର ୧୯ରେ ଅନୁଷ୍ଠିତ ହୋଇଥିଲା । ଏହି ଦିନ ବଡ଼ ଧରଣର ଆକ୍ରମଣ ନେଇ ଧମକ ଦେଇଥିଲା ଆତଙ୍କବାଦୀ ପନ୍ନୁ । ଏହା ପରେ କାନାଡା ସରକାର ପନ୍ନୁର ଏହି ଧମକପୂର୍ଣ୍ଣ ମେସେଜ୍‌କୁ ଦୃଢ଼ ନିନ୍ଦା କରିବା ସହ ଏହା ଉପରେ ସୁରକ୍ଷା ଏଜେନ୍ସି ତଦନ୍ତ କରୁଛି ବୋଲି କହିଥିଲେ ।

 ନଭେମ୍ବର ୪ରେ ପନ୍ନୁ ଏକ ଭିଡିଓ ଜାରି କରି ଶିଖମାନଙ୍କୁ ଅକ୍ଟୋବର ୧୯ ଏବଂ ତା ପରେ ଏୟାର ଇଣ୍ଡିଆରେ ଯାତ୍ରା ନକରିବାକୁ କହିଥିଲା । ଯଦି ସେମାନେ ଯାତ୍ରା କରନ୍ତି ତେବେ ସେମାନଙ୍କ ଜୀବନ ପ୍ରତି ବିପଦ ରହିଛି ବୋଲି ସେ ଧମକ ଦେଇଥିଲା । ଏପରିକି ବିଶ୍ବରେ ଏୟାର ଇଣ୍ଡିଆ ଉଡ଼ାଣ କରିପାରିବ ନାହିଁ ବୋଲି ପନ୍ନ କହିଥିଲା । ପନ୍ନୁର ଏଭଳି ଧମକପୂର୍ଣ୍ଣ ସନ୍ଦେଶ ପରେ କାନାଡାରେ ହାଇଆଲର୍ଟ ଜାରି ହୋଇଥିଲା । ଏହା ବ୍ୟତୀତ ଭାରତ ସମେତ ବିଭନ୍ନ ଦେଶରେ ମଧ୍ୟ ହଇଚଇ ସୃଷ୍ଟି ହୋଇଥିଲା । 

 ଅନ୍ୟପଟେ ଦିଲ୍ଲୀର ଇନ୍ଦିରା ଗାନ୍ଧୀ ଏୟାରପୋର୍ଟକୁ ନଭେମ୍ବର ୧୯ରେ ବନ୍ଦ କରିବାକୁ ଧମକ ଦେଇଥିଲା  ଗୁରପତଓ୍ବନ୍ତ ସିଂହ ପନ୍ନୁ । ତେବେ ପନ୍ନୁର ଏହି ବାର୍ତ୍ତା ମିଥ୍ୟା ଥିବା ବେଳେ ବିଶେଷ କରି ଶିଖ ସଂପ୍ରଦାୟଙ୍କ ମଧ୍ୟରେ ହିଂସା ପ୍ରସାର କଲାଭଳି ବୋଲି ଏନଆଇଏ ପକ୍ଷରୁ କୁହାଯାଇଛି । ଅନ୍ୟପକ୍ଷରେ ଜୁଲାଇ ୧୦ରେ ଏସଏଫଜେକୁ ବେଆଇନ୍‌ ବୋଲି ଘୋଷଣା କରିଥିଲେ ଭାରତ ସରକାର । ଏହା ସହ ୧ ଜୁଲାଇ ୨୦୨୦ରେ ଗୁରପତଓ୍ବନ୍ତ ସିଂହ ପନ୍ନୁକୁ ଆତଙ୍କବାଦୀ ବୋଲି ଘୋଷଣା କରିଥିଲେ ସରକାର । ତେବେ ୨୦୧୯ରେ ପ୍ରଥମ ମାମଲା ରୁଜୁ ହେଉ ହେଉ ଗୁରପତଓ୍ବନ୍ତ ସିଂହ ପନ୍ନୁ ଉପରେ ନଜର ରଖିଆସିଥିଲା ଏନଆଇଏ ।

 

News7 Is Now On WhatsApp Join And Get Latest News Updates Delivered To You Via WhatsApp

Rath Yatra

Copyright © 2024 - Summa Real Media Private Limited. All Rights Reserved.