ନୂଆଦିଲ୍ଲୀ ୩୦/୧୧: ଲମ୍ବା ଓ ଘନ କେଶ ପ୍ରାୟ ମହିଳାଙ୍କର ସ୍ୱପ୍ନ ହୋଇଥାଏ । କିନ୍ତୁ ଆଜିକାଲି ଅଧିକାଂଶ ମହିଳାଙ୍କର ପ୍ରମୁଖ ସମସ୍ୟା ହୋଇପଡିଛି କେଶ ଝଡିବା । ଏହାକୁ ରୋକିବା ପାଇଁ କିଏ କେତେ ଉପାୟ କରିଚାଲିଛି । କିନ୍ତୁ କେଶ ଝଡିବାର ପ୍ରମୁଖ କାରଣ ପୋଷକ ତତ୍ତ୍ୱର ଅଭାବ । ଏଥିପାଇଁ ଡାଏଟ୍ରେ ଆବଶ୍ୟକ ପୋଷକ ତତ୍ତ୍ୱକୁ ସାମିଲ କରିବା ଆବଶ୍ୟକ । ଚାଲନ୍ତୁ ଡାଏଟିସିଆନ୍ଙ୍କଠାରୁ ଏମିତି ଏକ ସୁପ୍ ବିଷୟରେ ଜାଣିବା, ଯାହା କେଶ ଝଡାକୁ ରୋକିପାରିବ ।
ବିଟ୍ ଆଇରନ୍, ଭିଟାମିନ୍-ବି୬, ମ୍ୟାଗ୍ନେସିୟମ୍ ବ୍ୟତୀତ ଆହୁରି ଅନେକ ପ୍ରକାରର ପୋଷକ ତତ୍ତ୍ୱରେ ଭରା । ତେଣୁ ବିଟ୍ ଖାଇବା ଦ୍ୱାରା ମଧ୍ୟ କେଶ ଝଡିବା ସମସ୍ୟାକୁ କମ୍ କରାଯାଇପାରିବ । ଏହାର ସୁପ୍ ମଧ୍ୟ ପିଇପାରିବେ ।
ସାମଗ୍ରୀ: ଗୋଟିଏ ଗାଜର, ଗୋଟିଏ ବିଟ୍, ଅଧା ଇଞ୍ଚର ଅଦା, ଚିମୁଟାଏ ଗୋଲମରିଚ ଗୁଣ୍ଡ,ଏକ ଚାମଚ କଖାରୁ ମଞ୍ଜି,ଏକ ଚାମଚ ସୂର୍ଯ୍ୟମୂଖୀ ମଞ୍ଜି, ୫ଟି ଭିଜା ଆଲମଣ୍ଡ ।
ପ୍ରେସର କୁକର୍ରେ ଏକ ଗ୍ଲାସ୍ ପାଣି ଦେଇ ପରିବା ସହ ଅଦାକୁ ପକାଇ ଦିଅନ୍ତୁ । ୨ଟି ସିଟି ଆସିବା ପରେ ଏହାକୁ ବନ୍ଦ କରି ଥଣ୍ଡା କରିଦିଅନ୍ତୁ । ଏବେ ଏହାକୁ ଗ୍ରାଇଣ୍ଡର୍ରେ ପେଶି ନିଅନ୍ତୁ । ଏବେ ଏହି ମିଶ୍ରଣରେ ସାମାନ୍ୟ ଲୁଣ ଓ ଗୋଲମରିଚ ଗୁଣ୍ଡ ପକାନ୍ତୁ । ଏକ ପାତ୍ରକୁ ବାହାର କରି ତା’ ଉପରେ ଆଲମଣ୍ଡ ଓ ବିଭିନ୍ନ ମଞ୍ଜି ପକାଇ ଗରମ ଗରମ ପରଷି ଦିଅନ୍ତୁ । ଏହାକୁ ପିଇବା ଦ୍ୱାରା କିଛି ଦିନ ପରେ କେଶ ଝଡିବା କମିଥାଏ ।