ବେଙ୍ଗାଲୁରୁ ୦୯/୦୨: ପାଣିପାଗ ସମ୍ବନ୍ଧୀୟ ତଥ୍ୟ ଓ ବିପର୍ଯ୍ୟୟ ଚେତାବନୀ ଦେବା ପାଇଁ ଆସନ୍ତା ୧୭ ତାରିଖ ସନ୍ଧ୍ୟା ୫.୩୦ରେ ଶ୍ରୀହରିକୋଟାରୁ ଏକ ସାଟେଲାଇଟ୍ ଲଞ୍ଚ୍ କରିବ ଇସ୍ରୋ । ‘ଇନ୍ସାଟ୍-୩ଡିଏସ୍’ ଉପଗ୍ରହକୁ ଜିୟୋସିଙ୍କ୍ରୋନସ୍ ସାଟେଲାଇଟ୍ ଲଞ୍ଚ୍ ଭେଇକଲ୍ ଏଫ୍-୧୪ (ଜିଏସ୍ଏଲ୍ଭି ଏଫ୍ -୧୪)ରେ ଲଞ୍ଚ୍ କରାଯିବ ।
ଗତ ଗୁରୁବାର ସୋସିଆଲ ମିଡିଆ ସାଇଟ୍ ‘ଏକ୍ସ’ରେ ଇସ୍ରୋ ଏହି ସୂଚନା ଦେଇଛି । ଆର୍ଥ ସାଇନ୍ସ ମନ୍ତ୍ରାଳୟ ଏହି ପ୍ରୋଜେକ୍ଟ ପାଇଁ ପାଣ୍ଠି ଯୋଗାଇଛି । ଇସ୍ରୋର ୧୬ତମ ମିଶନ୍ରେ ପାଣିପାଗ ପୂର୍ବାନୁମାନ ନିମନ୍ତେ ଇନ୍ସାଟ୍-୩ଡିଏସ୍କୁ ଜିୟୋସିଙ୍କ୍ରୋନସ୍ ଟ୍ରାନ୍ସଫର ଅର୍ବିଟ୍ (ଜିଟିଓ)ରେ ମୁତୟନ କରାଯିବ । ପରେ କକ୍ଷ ବଢ଼ାଇବାର ପ୍ରକ୍ରିୟାକୁ ଏହା ସୁନିଶ୍ଚିତ କରିବ । ଉନ୍ନତ ପାଣିପାଗ ଭବିଷ୍ୟବାଣୀ ଓ ବିପର୍ଯ୍ୟୟ ଚେତାବନୀ ନିମନ୍ତେ ଭୂପୃଷ୍ଠ ଓ ମହାସାଗର ଉପରେ ନଜର ରଖିବା ପାଇଁ ଏହି ସାଟେଲାଇଟ୍କୁ ଡିଜାଇନ୍ କରାଯାଇଛି । ବର୍ତ୍ତମାନ ସଂଚାଳିତ ଇନ୍ସାଟ୍-୩ଡି ଓ ଇନ୍ସାଟ୍-୩ଡିଆର୍ ଉପଗ୍ରହ ସହିତ ପାଣିପାଗ ସେବାକୁ ଏହା ବଢ଼ାଇବ ।
ଇସ୍ରୋ ଅନୁସାରେ, ମିଶନ୍ର ପ୍ରାଥମିକ ଉଦ୍ଦେଶ୍ୟ ପୃଥିବୀ ପୃଷ୍ଠ ଉପରେ ନଜର ରଖିବା, ପାଣିପାଗ ସମ୍ପର୍କିତ ଗୁରୁତ୍ୱପୂର୍ଣ୍ଣ ଘଟଣାକ୍ରମ ବିଷୟରେ ସୂଚନା ଦେବା ଏବଂ ସମୁଦ୍ର ଅବଲୋକନ ସହିତ ବାୟୁମଣ୍ଡଳର ବିଭିନ୍ନ ପାଣିପାଗ ସମ୍ବନ୍ଧୀୟ ମାନଦଣ୍ଡଗୁଡ଼ିକର ତଥ୍ୟ ପ୍ରଦାନ କରିବା । ତଥ୍ୟ ସଂଗ୍ରହ ପ୍ଲାଟ୍ଫର୍ମରୁ ତଥ୍ୟ ପ୍ରସାର କ୍ଷମତା ଓ ସାଟେଲାଇଟ୍ ସହାୟତାରେ ଉଦ୍ଧାର ସେବା ମଧ୍ୟ ଏହା ପ୍ରଦାନ କରିବ ।
