ନୂଆଦିଲ୍ଲୀ,୧୨/୦୨: ଆଗାମୀ କିଛି ବର୍ଷରେ ଦେଶର ୩୦୦ ବିଲିୟନ ଡଲାରର ରପ୍ତାନି ଲକ୍ଷ୍ୟ ହାସଲ କରିବାକୁ ସକ୍ଷମ ହେବ । ଏହି ଅବଧିରେ ଦେଶ ୧୦୦ ବିଲିୟନ ଡଲାର ରପ୍ତାନି କରୁଥିବ ବୋଲି କେନ୍ଦ୍ର ଇଲେକଟ୍ରୋନିକ୍ସ, ରେଳ ଏବଂ ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ।
ନୂଆଦିଲ୍ଲୀରେ ଅନୁଷ୍ଠିତ ଗ୍ଲୋବାଲ ବିଜ୍ନେସ ସମିଟକୁ ସମ୍ବୋଧିତ କରି ଶ୍ରୀ ବୈଷ୍ଣବ କହିଛନ୍ତି, ଏବେ ଦେଶର ବିନିର୍ମାଣ କ୍ଷେତ୍ର ଦ୍ରୁତ ହାରରେ ଅଭିବୃଦ୍ଧି କରୁଛି । ଯନ୍ତ୍ରାଂଶ ଉତ୍ପାଦନକାରୀ ଏବେ ଭାରତ ମୁହାଁ । ଦେଶରେ ବିଭିନ୍ନ ଇଲେକଟ୍ରୋନିକ୍ସ ଓ ସେମିକଣ୍ଡକ୍ଟର ଡିଜାଇନ ଆରମ୍ଭ ହୋଇଛି । ଖୁବ୍ କମ୍ ସମୟ ମଧ୍ୟରେ ବିଶ୍ୱ ଭାଲ୍ୟୁ ଚେନ୍ରେ ଭାରତ ଏକ ଭରଷାଯୋଗ୍ୟ ପାର୍ଟନର ଭାବେ ଉଭା ହୋଇଛି ।
ସ୍ମାର୍ଟଫୋନ ଯନ୍ତ୍ରାଂଶ ଆମଦାନି କ୍ଷେତ୍ରରେ କେନ୍ଦ୍ର ସରକାର ଆଶ୍ୱସ୍ତି ପ୍ରଦାନ କରିଛନ୍ତି । ଯାହା ସ୍ମାର୍ଟଫୋନ ନିର୍ମାତାକୁ ବେଶ ସହାୟକ ହୋଇଛି । ଚୀନ, ଭିଏତନାମ ଭଳି ଦେଶ ସହ ପ୍ରତିଯୋଗିତା କରିବାକୁ ଏହା କମ୍ପାନିଙ୍କୁ ବଳ ଦେଉଛି । ମୋବାଇଲ ଫୋନରେ ଉତ୍ପାଦନ ସଂଯୁକ୍ତ ପ୍ରୋତ୍ସାହନ (ପିଏଲ୍ଆଇ) ଯୋଜନା ବେଶ ସଫଳ ହୋଇଛି । ସେ ପୁଣି କହିଛନ୍ତି, ପିଏଲ୍ଆଇକୁ ଆଇଟି ଏବଂ ହାର୍ଡୱେର କ୍ଷେତ୍ରରେ ସରକାର ଲାଗୁ କରିବେ । ଏହା ଯୋଗାଣ ଶୃଙ୍ଖଳା ଦୃଢ଼ୀକରଣ ଏବଂ ନୂଆ ନିବେଶ ଟାଣିବ । ୨୦୧୪-୧୫ରେ ଦେଶ ୧୫୬୬ କୋଟିର ମୋବାଇଲ ରପ୍ତାନି କରିଥିଲା । ଯାହା ୨୦୨୨-୨୩ରେ ୯୦ ହଜାର କୋଟିକୁ ବଢ଼ିଛି । ଏ କ୍ଷେତ୍ରରେ ୫୬୦୦ ଧ ଅଭିବୃଦ୍ଧି । ମେକ୍ ଇନ୍ ଇଣ୍ଡିଆ ଯନ୍ତ୍ରାଂଶ ବ୍ୟବହାର କରାଯାଇ ରେକର୍ଡ ୧୬ ମାସରେ ୫ ଜିକୁ ଲାଗୁ କରାଯାଇଛି । ଭାରତ ବିକଶିତ କରିଥିବା ଟେକ୍ନୋଲୋଜି ମାନ ବିଶ୍ୱ ସ୍ତରୀୟ ।
ସମାଜର ଯେକୌଣସି ବର୍ଗର ବ୍ୟକ୍ତି ବିଶେଷ ଟେକ୍ନୋଲୋଜି ବ୍ୟବହାର ସୁବିଧା ପାଉଛନ୍ତି । ଭାରତ ସେମି କଣ୍ଡକ୍ଟର କ୍ଷେତ୍ରରେ ମଧ୍ୟ ଆଗକୁ ବେଶ ଭଲ ପ୍ରଦର୍ଶନ କରିବ । ମାଇକ୍ରନଠାରୁ ନୂଆ ନିବେଶ ପ୍ରସ୍ତାବ ପାଇବା ପରେ ୯୦ ଦିନରେ ପ୍ରକଳ୍ପ କାର୍ଯ୍ୟ ଆରମ୍ଭ ହୋଇଛି । ଗତ ବର୍ଷ ସେପ୍ଟେମ୍ବରରେ ଆମେରିକା ଭିତ୍ତିକ କମ୍ପାନି ଗୁଜରାଟରେ ସେମିକଣ୍ଡକ୍ଟର ୟୁନିଟ ସ୍ଥାପନ କାମ ଆରମ୍ଭ କରିଛି । ଏଥିରେ ୨୨ ହଜାର କୋଟି ଟଙ୍କା ନିବେଶ କରୁଛି କମ୍ପାନି ଶ୍ରୀ ବୈଷ୍ଣବ ଉଲ୍ଲେଖ କରିଛନ୍ତି ।
