ଭୁବନେଶ୍ୱର,୧୦/୦୨: ଚଳଚଞ୍ଚଳ ହୋଇଛି ଖଣ୍ଡଗିରି ଅଞ୍ଚଳ । ଆରମ୍ଭ ହେଲାଣି ଖଣ୍ଡଗିରି କୁମ୍ଭମେଳା ପ୍ରସ୍ତୁତି । ଜମି ଆସିଲାଣି ଗହଳିଚହଳି । ଆସନ୍ତା ୧୬ରୁ ମେଳା ଆରମ୍ଭ ହେବ । ଏହା ମାଘ ପୂର୍ଣ୍ଣିମା ଦିନ ଯଜ୍ଞ ପୂର୍ଣ୍ଣାହୂତି ହେବ । ଚଳିତଥର କଳି ଯୁଗର ୫ହଜାର ୧୨୪ବର୍ଷ ପାଳନ କରାଯିବ । ପ୍ରତିବର୍ଷ ଏହି ମେଳାରେ ଦେଶର ବିଭିନ୍ନ ସ୍ଥାନରୁ ହଜାର ହଜାର ସାଧୁସନ୍ଥ ଆସିଥାନ୍ତି । ହେଲେ ଏଠାରେ ସେମାନଙ୍କ ରହିବା, ଖାଇବା, ସ୍ନାନ ଓ ଶୌଚାଳୟ ନିତ୍ୟକର୍ମ ଲାଗି ବହୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଥାଏ । 

ଏଥିସହିତ ଖଣ୍ଡଗିରି ମେଳାକୁ ସରକାରୀ ମାନ୍ୟତା ଦେବା ପାଇଁ ବାରମ୍ବାର ସରକାରଙ୍କୁ ଜଣାଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଇନାହିଁ । ପଞ୍ଚଦେବ ଖଣ୍ଡଗିରି କୁମ୍ଭ ମେଳା ଆବାହକ ବିଶ୍ୱ ସନାତନ ବୈଦିକ ପରିଷଦ ଓଡ଼ିଶା ଶାଖା ଏଠାକାର ସମସ୍ୟା ସମାଧାନ କରିବା ସହିତ ଏହାକୁ ସରକାରୀ ମାନ୍ୟତା ଦେବାକୁ ଅନୁରୋଧ କରିଛି । ଏନେଇ ୫-ଟି ଅଧ୍ୟକ୍ଷକୁ ଦାବିପତ୍ର ପ୍ରଦାନ କରାଯାଇଛି । ଖଣ୍ଡଗିରି ମାଳାରେ ସାଧୁ ସନ୍ଥଙ୍କ ସମସ୍ୟା ଦେଖି ୨୦୨୦ ମସିହାରୁ ବିଶ୍ୱ ସନାତନ ବୈଦିକ ଧର୍ମ ପରିଷଦ ତରଫରୁ ଖାଦ୍ୟ, ଶୀତବସ୍ତ୍ର, ଅସ୍ଥାୟୀ ତମ୍ବୁ, ପାନୀୟ ଜଳ ଆଦିର ବ୍ୟବସ୍ଥା କରାଯାଉଛି ।