ଲଣ୍ଡନ୍,୧୩/୦୨: କେନିଆର ଯୁବ ମାରାଥନ ବିସ୍ମୟ କେଲଭିନ୍ କିପ୍ଟମ୍ ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ମୃତ୍ୟୁ ବରଣ କରିଛନ୍ତି । କିପଟମଙ୍କ ମାତ୍ର ୨୪ବର୍ଷ ହୋଇଥିଲା । ଆଗକୁ ଏକ ଲମ୍ବା କ୍ୟାରିୟର ରହିଥିଲା । ସୀମିତ ସମୟ ମଧ୍ୟରେ ସେ ସବୁ ପ୍ରସିଦ୍ଧ ମାରାଥନ ଧାବକଙ୍କୁ ପଛରେ ପକାଇ ଦେଇଥିଲେ । ତାଙ୍କୁ ମାରାଥନ ବିସ୍ମୟ ଭାବେ ଗଣନା କରାଯାଉଥିଲା ।
ରବିବାର ଦିନ ସେ କାର୍ ଚଳାଇ ଏଲଡୋରେଟ୍ରୁ କପ୍ତାଗତ ଅଭିମୁଖେ ଯାତ୍ରା କରୁଥିବା ସମୟରେ ସେ ଦୁର୍ଘଟଣାର ସାମ୍ନା କରିଥିଲେ। ତାଙ୍କ ସହ କୋଚ୍ ଜର୍ଭେସ ହାକିଜିମାନା ମଧ୍ୟ ଯାତ୍ରା କରୁଥିଲେ । କିପଟମଙ୍କ ଗାଡ଼ି ନିୟନ୍ତ୍ରଣ ହରାଇ ରାସ୍ତ କଡ଼ରେ ଥିବା ଏକ ଗଛରେ ଧକ୍କା ହୋଇଥିଲା । ଘଟଣା ସ୍ଥଳରେ ଉଭୟ ପ୍ରାଣ ହରାଇଛନ୍ତି । କିପଟମଙ୍କ ମୃତ୍ୟୁଖବର ସମଗ୍ର ଆଥ୍ଲେଟିକ୍ ପ୍ରେମୀଙ୍କୁ ସ୍ତବ୍ଧ କରିଦେଇଛି।
ଗତ ଅକ୍ଟୋବରରେ ଅନୁଷ୍ଠିତ ଚିକାଗୋ ମାରାଥନ୍ରେ କିପଟମ ବିଶ୍ୱ ରେକର୍ଡ ସ୍ଥାପନ କରିଥିଲେ । ୪୨.୨ କିଲୋ ମିଟର ଦୂରତାକୁ ସେ ମାତ୍ର ୨ଘଣ୍ଟା ୩୫ସେକେଣ୍ଡ ମଧ୍ୟରେ ଅତିକ୍ରମ କରି ଏଲିଉଡ କିପଚୋଗଙ୍କ ନାମରେ ରହିଥିବା ବିଶ୍ୱ ରେକର୍ଡ ଭଙ୍ଗ କରିଥିଲେ । ସିନିୟର ସ୍ତରରେ ଏହା ତାଙ୍କ କ୍ୟାରିୟର୍ର ମାତ୍ର ତୃତୀୟ ରେସ୍ ରହିଥିଲା ।
ଗତ ବର୍ଷ ଲଣ୍ଡନ ମାରାଥନରେ ମଧ୍ୟ ସେ ସ୍ୱର୍ଣ୍ଣ ପଦକ(୨ଘଣ୍ଟା ୦୧ମିନିଟ୍ ୨୫ସେକେଣ୍ଡ) ହାସଲ କରିଥିଲେ । ଚିଳତ ବର୍ଷ କିପଟମଙ୍କୁ ବିଶ୍ୱ ଆଥ୍ଲେଟିକ ମହାସଙ୍ଘ(ୱାର୍ଲ୍ଡ ଆଥ୍ଲେଟିକ୍ସ) ପକ୍ଷରୁ ବର୍ଷର ଶ୍ରେଷ୍ଠ ମାରାଥନ ଧାବକ ଭାବେ ପୁରସ୍କୃତ କରାଯାଇଥିଲା । ୨୦୨୨ରେ ଅନୁଷ୍ଠିତ ଭାଲେନ୍ସିଆ ମାରାଥନ ଜରିଆରେ କିପଟମ ସିନିୟର ପଦାର୍ପଣ କରିଥିଲେ । ନିର୍ଦ୍ଧାରିତ ଦୂରତାକୁ ସେ ୨ଘଣ୍ଟା ୦୧ମିନିଟ୍ ୫୩ ସେକେଣ୍ଡରେ ରେସ୍ ଶେଷ କରି ସମସ୍ତଙ୍କୁ ଚମତ୍କୃତ କରିଦେଇଥିଲେ । ମାରାଥନ ଇତିହାସରେ ଏହା ଚତୁର୍ଥ ଦ୍ରୁତତମ ରହିଥିଲା ।
ଚଳିତ ବର୍ଷ ସେ କୌଣସି ରେସ୍ରେ ଭାଗ ନେଇ ନଥିଲେ । ଆସନ୍ତା ଏପ୍ରିଲରେ ହେବାକୁ ଥିବା ରୋଟରଡାମ ମାରାଥନ ଯୋଗେ ୨ଘଣ୍ଟ ମଧ୍ୟରେ ରେସ ଶେଷ କରିବାକୁ ଲକ୍ଷ୍ୟ ରଖିଥିବା ନିକଟରେ କିପଟମ ପ୍ରକାଶ କରିଥିଲେ । ଏଥିପାଇଁ ସେ ପ୍ରସ୍ତୁତି ଚଳାଇଥିଲେ ।
