ମୁମ୍ବାଇ, ୧୦/୦୨: ବିଶିଷ୍ଟ ଅଭିନେତା ତଥା ବିଜେପି ନେତା ମିଥୁନ ଚକ୍ରବର୍ତ୍ତୀ ଅସୁସ୍ଥ ହୋଇ ପଡ଼ିଛନ୍ତି । ମିଥୁନ ଚକ୍ରବର୍ତ୍ତୀଙ୍କୁ କୋଲକାତାର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି । ଶନିବାର ସକାଳେ ଛାତିରେ ଯନ୍ତ୍ରଣା ଅନୁଭବ କରିଥିଲେ ମିଥୁନ ଦା ।

ଅଭିନେତା ମିଥୁନଙ୍କ ସହ ଜଡ଼ିତ ବିଶ୍ୱସ୍ତ ସୂତ୍ରରୁ ଜଣାପଡ଼ିଛି, ସକାଳେ ସେ ଅସୁସ୍ଥ ଅନୁଭବ କରିଥିଲେ । ଏହା ପରେ ତାଙ୍କୁ ମେଡିକାଲ୍ ନିଆ ଯାଇଥିଲା । ଏବେ ଘରୋଇ ହସ୍ପିଟାଲରେ ମିଥୁନଙ୍କ ଚିକିତ୍ସା ଚାଲିଛି । ନିକଟରେ ମିଥୁନ ଚକ୍ରବର୍ତ୍ତୀଙ୍କୁ ମିଳିଥିଲା ସମ୍ମାନଜନକ ପଦ୍ମ ଭୂଷଣ ପୁରସ୍କାର ।

ହସ୍ପିଟାଲରେ ଭର୍ତ୍ତି ହୋଇଥିବା ଅଭିନେତା ତଥା ରାଜନେତା ମିଥୁନ ଚକ୍ରବର୍ତ୍ତୀ ଏକ ଭିଡିଓ ବାର୍ତ୍ତା ଜାରି କରିଛନ୍ତି । ସେ କହିଛନ୍ତି, ମୁଁ ଗର୍ବିତ, ମୁଁ ଖୁସି ଯେ ମୋତେ ଏହି ସମ୍ମାନ ମିଳିଛି । ମୁଁ ସମସ୍ତଙ୍କୁ କୃତଜ୍ଞତା ଜଣାଉଛି । ମୁଁ ମୋ ପାଇଁ କେବେ କିଛି ମାଗି ନାହିଁ । ଏବେ କିଛି ନ ମାଗି ମିଳିଥିବା ଖୁସିକୁ ଅନୁଭବ କରୁଛି ।

୨୦୨୩ ଡିସେମ୍ବରେ ମିଥୁନଙ୍କୁ ବେଙ୍ଗାଲି ଫିଲ୍ମ କାବୁଲିୱାଲାରେ ଦେଖିବାକୁ ମିଳିଥିଲା । ଉକ୍ତ ଫିଲ୍ମର ନିର୍ଦ୍ଦେଶନା ଦେଇଥିଲେ ସୁମନ ଘୋଷ । ଏବେ ମେଡିକାଲରେ ମିଥୁନ ଚକ୍ରବର୍ତ୍ତୀ ଭର୍ତ୍ତି ହୋଇଥିବା ବେଳେ ତାଙ୍କର ଏମ୍ଆରଆଇ କରାଯାଇଛି । ଚିକିତ୍ସା ପାଇଁ ଗଠନ ହୋଇଛି ସ୍ୱତନ୍ତ୍ର ଟିମ୍ । ଡାକ୍ତରୀ ଦଳ ମିଥୁନଙ୍କ ସ୍ୱାସ୍ଥ୍ୟାବସ୍ଥା ଉପରେ ନଜର ରଖିଛନ୍ତି ।

କୁହାଯାଉଛି, ଶନିବାର ସକାଳେ ଆଗାମୀ ଫିଲ୍ମର ସୁଟିଂରେ ବ୍ୟସ୍ତ ଥିଲେ ମିଥୁନ ଚକ୍ରବର୍ତ୍ତୀ । ସୁଟିଂ ସମୟରେ ସେ ଅସୁସ୍ଥ ଅନୁଭବ କରିଥିଲେ । ଯାହା ପରେ ମିଥୁନଙ୍କୁ ତୁରନ୍ତ ହସ୍ପିଟାଲ୍ ନିଆ ଯାଇଥିଲା ।