ବେଙ୍ଗାଲୁରୁ: ଡେଭନ କନଓ୍ବେ, ରଚିନ ରବୀନ୍ଦ୍ର ଏବଂ ଡାରିଲ ମିଚେଲଙ୍କ ଦମଦାର ବ୍ୟାଟିଂ ବଳରେ ଶ୍ରୀଲଙ୍କା ପାଖରୁ ୫ ଓ୍ବିକେଟରେ ମ୍ୟାଚ୍ ଜିତିନେଇଛି ନ୍ୟୁଜିଲାଣ୍ଡ । ୨୩.୨ ଓଭରରେ ନ୍ୟୁଜିଲାଣ୍ଡ ୫ ଓ୍ବିକେଟ ହରାଇ ୧୭୨ ରନ୍ ହାସଲ କରିନେଇଛି । ଆଜିର ମ୍ୟାଚରେ ଡେଭନ୍ କନଓ୍ବେ ୪୫ ରନ୍ କରିଥିବା ବେଳେ ରଚିନ ରବୀନ୍ଦ୍ର ୪୨ ରନ୍ ଏବଂ ଡାରିଲ ମିଚେଲ ୪୩ରନ୍ ସଂଗ୍ରହ କରିଛନ୍ତି । ସେପଟେ ଶ୍ରୀଲଙ୍କା ଟିମ୍ର ଆଞ୍ଜିଲୋ ମାଥ୍ୟୁସ୍ ସର୍ବାଧିକ ୨ଟି ଓ୍ବିକେଟ ନେଇଛନ୍ତି । ମହିଶ ତୀକ୍ଷଣା ଗୋଟିଏ ଓ୍ବିକେଟ ନେଇଥିବା ବେଳେ ଦୁଶମନ୍ଥା ଚାମିରା ମଧ୍ୟ ଗୋଟିଏ ଓ୍ବିକେଟ ନେଇଛନ୍ତି । ତେବେ ମ୍ୟାଚ୍ ଜିତିବା ପରେ ନ୍ୟୁଜିଲାଣ୍ଡ ସେମିଫାଇନାଲରେ ପ୍ରବେଶ କରିବା ଏକପ୍ରକାର ସ୍ପଷ୍ଟ ହୋଯାଇଛି ।
ଆଜି ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା ନ୍ୟୁଜିଲାଣ୍ଡ । ଶ୍ରୀଲଙ୍କା ଆରମ୍ଭରୁ ବ୍ୟାଟିଂ ବିପର୍ଯ୍ୟୟର ସାମ୍ନା କରିଥିଲା । ଦଳୀୟ ସ୍କୋର ୩ ରନ ବେଳକୁ ପଥୁମ ନିଶଙ୍କା(୨) ଆଉଟ୍ ହୋଇଥିଲ । ଅଧିନାୟକ କୁଶଳ ମେଣ୍ଡିସ ମାତ୍ର ୬ ରନ୍ରେ ପାଭିଲିୟନ ଫେରିଥିଲେ । ଗୋଟିଏ ପଟେ କୁଶଲ ପେରେରା କ୍ରିଜରେ ଜମି ରହିଥିଲେ ସୁଦ୍ଧା ଅନ୍ୟ ବ୍ୟାଟର ତିଷ୍ଠି ପାରିନଥିଲେ । କୁଶଲ ପେରେରା(୫୧) ଓ ମହୀଶ ତୀକ୍ଷଣା(୩୯)ଙ୍କୁ ବାଦ ଦେଲେ ଅନ୍ୟ କୌଣସି ବ୍ୟାଟର ଭଲ ପ୍ରଦର୍ଶନ କରିପାରି ନଥିଲେ । ୪୬.୪ ଓଭରରେ ୧୭୧ ରନରେ ଅଲଆଉଟ୍ ହୋଇଥିଲା ଦଳ ।
ବୋଲିଂରେ ଟ୍ରେଣ୍ଟ ବୋଲ୍ଟ ସର୍ବାଧିକ ୩ଟି ଓ୍ଵିକେଟ୍ ନେଇଥିଲେ । ୧୦ ଓଭରରେ ୩୭ ରନ ଦେଇ ୩ଟି ଓ୍ଵିକେଟ୍ ନେଇଥିଲେ । ମିଚେଲ୍ ସାଣ୍ଟନର ୧୦ ଓଭରରେ ସବୁଠୁ କମ ୨୨ ରନ ଦେଇ ୨ଟି ଓ ଲକି ଫର୍ଗ୍ୟୁସନ ମଧ୍ୟ ୧୦ ଓଭରରେ ୩୫ ରନ ବ୍ୟୟ କରି ୨ଟି ଓ୍ଵିକେଟ୍ ନେବାରେ ସଫଳ ହୋଇଥିଲେ । ରଚିନ ରବୀନ୍ଦ୍ର ୭.୪ ଓଭରରେ ୨୨ ରନ ଦେଇ ୨ଟି ଓ୍ବିକେଟ ହାସଲ କରିଥିଲେ ।
