କେରଳ ୧୫/୧୧: କେରଳର କାସରଗୋଡ ସ୍ଥିତ ଶ୍ରୀ ଅନନ୍ତପଦ୍ମନାଭ ସ୍ୱାମୀ ମନ୍ଦିର ପୋଖରି ଏବେ ପୁଣି ଥରେ ଚର୍ଚ୍ଚାରେ । ଏହି ପୋଖରିରେ ରହୁଥିବା ଏବଂ ମନ୍ଦିର ପରିସରରେ ବିଚରଣ କରୁଥିବା ଏକମାତ୍ର ମାଈ କୁମ୍ଭୀର ବବିୟାର ମୃତ୍ୟୁକୁ ୧ ବର୍ଷରୁ ଅଧିକ ସମୟ ବିତିଗଲାଣି । ଏବେ ପୋଖରିରେ ଏକ ନୂଆ କୁମ୍ଭୀର ଦେଖିବାକୁ ମିଳିଛି । 

ବବିୟା କୁମ୍ଭୀର ସମ୍ପୂର୍ଣ୍ଣ ରୂପେ ଶାକାହାରୀ ଥିଲା ବୋଲି ମନ୍ଦିରକୁ ଆସୁଥିବା ଲୋକେ ଦାବି କରନ୍ତି । ପୋଖରୀରେ ନୂଆ କୁମ୍ଭୀରର ଆଗମନ ପରେ କିଛି ଲୋକ ଚମତ୍କାର ବୋଲି କହୁଛନ୍ତି, ଆଉ କିଛି ଏହାକୁ ମୃତ ବବିୟାର ନୂଆ ଅବତାର ବୋଲି କହୁଛନ୍ତି । ଜଣେ ମନ୍ଦିର ଅଧିକାରୀଙ୍କ ଅନୁସାରେ, ଏହା ଏକ ଗୁରୁତ୍ୱପୂର୍ଣ୍ଣ ଘଟଣା । କାରଣ ପୋଖରିରେ ସର୍ବଦା ଗୋଟିଏ କୁମ୍ଭୀର ବିଚରଣ କରେ । 

୨୦୨୦ ମସିହାରେ ବବିୟାର ମୃତ୍ୟୁ ପରେ ନିକଟରେ ୪ର୍ଥ କୁମ୍ଭୀର ଦେଖିବାକୁ ମିଳିଛି । ମନ୍ଦିର ୱେବ୍‌ସାଇଟ୍‌ ଅନୁସାରେ, ଗୋଟିଏ କୁମ୍ଭୀରର ମୃତ୍ୟୁ ପରେ ଆଉ ଏକ କୁମ୍ଭୀର ମନ୍ଦିର ପୋଖରିରେ ପ୍ରକଟ ହୁଏ । ଏପରି କାହିଁକି ହୁଏ, ଅଦ୍ୟାବଧି ଜଣାପଡ଼ି ନାହିଁ । ଗତ ୮ ତାରିଖରେ ପୋଖରିକୁ ଲାଗିଥିବା ଏକ ଗୁମ୍ପାରେ କିଛି ଶ୍ରଦ୍ଧାଳୁ କୁମ୍ଭୀରକୁ ଦେଖିବା ପରେ ଏହାର ସୂଚନା ମନ୍ଦିର ପ୍ରଶାସନକୁ ଦେଲେ । ମନ୍ଦିର ପ୍ରଶାସନ ଏବେ କୁମ୍ଭୀରର ଉପସ୍ଥିତିକୁ ସ୍ପଷ୍ଟ କରିଛି ।