ନୂଆଦିଲ୍ଲୀ, ୨୭।୨: ଜ୍ୱର ମାପିବା ଲାଗି ଆମେ ସାଧାରଣତଃ ଥର୍ମୋମିଟର ବ୍ୟବହାର କରିଥାଉ । ସମସ୍ତ କାର୍ଯ୍ୟକୁ ସୁବିଧା ଓ ସହଜ କରିବା ଲାଗି ବର୍ତ୍ତମାନ ନୂଆ ନୂଆ ଟେକ୍ନୋଲୋଜି ଆସୁଥିବାର ଦେଖାଯାଉଛି । ଠିକ୍ ସେହିପରି ଏବେ ଜ୍ୱର ମାପିବା ଲାଗି ଆଉ ଥର୍ମୋମିଟରର ଆବଶ୍ୟକତା ପଡ଼ିବ ନାହିଁ । କାରଣ ଖୁବ୍ ଶୀଘ୍ର ଲଞ୍ଚ ହେବାକୁ ଯାଉଛି ଏକ ଫୋନ୍, ଯାହା ସାହାଯ୍ୟରେ ଆପଣ ଜ୍ୱରର ମାପିପାରିବେ ଶରୀରର ତାପମାତ୍ରା । ଏହି ଫୋନର ନାଁ ପିକ୍ସେଲ ପ୍ରୋ ସ୍ମାର୍ଟଫୋନ । ଯାହା ମାନବ ଶରୀରର ତାପମାତ୍ରା ମାପିବାରେ ସାହାଯ୍ୟ କରିବ । ଏହି ସୁବିଧା ପ୍ରଦାନ କରିଛି ଗୁଗଲ । ଏହି ଫିଚର୍ସ କିପରି କାର୍ଯ୍ୟ କରେ ଏବଂ ଏହା କେଉଁ ପ୍ରକାରର ସୁବିଧା ଯୋଗାଏ ଆସନ୍ତୁ ଜାଣିବା ସେ ବିଷୟରେ ।
ତେବେ ଶରୀର ତାପମାତ୍ରା ମାପିଲା ଲାଗି ପିକ୍ସେଲ ପ୍ରୋ ସ୍ମାର୍ଟଫୋନ୍ରେ ଏକ ଆପ୍ ରହିଛି । ଯାହାର ନାଁ ଇନଫ୍ରାଡ୍ ସେନ୍ସର ଆପ୍ । ଏହି ଆପ୍ ସାହାଯ୍ୟରେ ତାପମାତ୍ରା ମାପ କମାଯାଇପାରେ । ଏଥିରେ ଥିବା ସେନ୍ସର ଏକ ବସ୍ତୁ କିମ୍ୱା ମାନବ ଶରୀରରୁ ନିର୍ଗତ ଇନଫ୍ରାଡ୍ ରେଡିଏସନ୍କୁ ଟ୍ରାକ୍ କରିଥାଏ । ଏହି ରେଡିଏସନ୍କୁ ଟ୍ରାକ୍ କରି ତାପମାତ୍ରା ମାପିଥାଏ । ଏହି ସେନ୍ସର ୩୯୨ ଡିଗ୍ରୀ ଫାରେନ୍ହାଇଟ୍ ରୁ -୪ ଡିଗ୍ରୀ ଫାରେନ୍ହାଇଟ୍ ତାପମାତ୍ରା ମାପ କରିପାରିବ । ତେବେ ପ୍ରଶ୍ନ ଆସୁଥିବ ତାପମାତ୍ରା ମାପିବା ପାଇଁ ଏହି ଫୋନ୍ଟିକୁ ବ୍ୟବହାର କରିବେ କେମିତି ? କହିରଖୁ କି, ଏହି ଫୋନ୍କୁ କପାଳରେ ରଖି ତାପମାତ୍ରା ସ୍କାନ୍ କରାଯାଇଥାଏ । ପରେ ଫୋନ୍ର ସ୍କ୍ରିନ୍ରେ ଶରୀରର ତାପମାତ୍ରା ଦର୍ଶାଏ ।
