ନୂଆଦିଲ୍ଲୀ,୦୫/୧୧: ଆଜି ବିଶ୍ୱକପ ୨୦୨୩ ରେ ଟିମ୍ ଇଣ୍ଡିଆ ଦକ୍ଷିଣ ଆଫ୍ରିକା ସହିତ ମୁହାଁମୁହିଁ ହୋଇଛି। ଏହି ମ୍ୟାଚ୍ ବର୍ତ୍ତମାନଠାରୁ କୋଲକାତାର ଇଡେନ୍ ଗାର୍ଡେନ୍ସରେ ଆରମ୍ଭ ହେବାକୁ ଯାଉଛି। ଏହି ମ୍ୟାଚ୍ରେ ଉଭୟ ଦଳ ପାଇଁ ଗୁରୁତ୍ବପୂର୍ଣ୍ଣ ଥିବା ବେଳେ, ଏନେଇ କ୍ରିକେଟ ପ୍ରେମୀ ମଧ୍ୟ ଉତ୍କଣ୍ଠାର ସହିତ ଅପେକ୍ଷା କରିଛନ୍ତି। କାରଣ ଏହି ଟୁର୍ଣ୍ଣାମେଣ୍ଟରେ ଉଭୟ ଦଳର ପ୍ରଦର୍ଶନ ଅତ୍ୟନ୍ତ ଭଲ ଏବଂ ଉଭୟ ସେମିଫାଇନାଲ ପାଇଁ ଟିକେଟ୍ ନିଶ୍ଚିତ କରିଛନ୍ତି।
ଭାରତ ଏବଂ ଦକ୍ଷିଣ ଆଫ୍ରିକା ଦଳ ମଧ୍ୟରେ ଏହା ୯୧ ତମ ଦିନିକିଆ ମ୍ୟାଚ୍ ହେବ। ପୂର୍ବ ୯୦ ମ୍ୟାଚ୍ରେ ଦକ୍ଷିଣ ଆଫ୍ରିକାର ପଲା ଭାରି ରହିଥିଲା। ଦକ୍ଷିଣ ଆଫ୍ରିକା ଦଳ ୫୦ ଟି ମ୍ୟାଚ୍ ଜିତିଥିବାବେଳେ ଟିମ୍ ଇଣ୍ଡିଆ ମାତ୍ର ୩୭ ଟି ମ୍ୟାଚ୍ ଜିତିଛି। ତିନୋଟି ମ୍ୟାଚ୍ର କୌଣସି ଫଳାଫଳ ବାହାରି ନଥିଲା। ତେବେ ଆସନ୍ତୁ ଜାଣିବା ଏହି ୯୦ ଟି ହେଡ୍ ଟୁ ହେଡ୍ ମ୍ୟାଚ୍ ରେ ଟପ୍ -୧୦ ରେକର୍ଡ ଗୁଡିକ କ’ଣ ରହିଛି...
ସର୍ବାଧିକ ସ୍କୋର: ସର୍ବାଧିକ ସ୍କୋର ଭାବେ ଦକ୍ଷିଣ ଆଫ୍ରିକା ଆଗରେ ରହିଛି। ୱାଙ୍ଖେଡେ ଠାରେ ୨୫ ଅକ୍ଟୋବର ୨୦୧୫ ରେ ହୋଇଥିବା ମ୍ୟାଚ୍ରେ ପ୍ରୋଟିସ୍ ଟିମ୍ ୪ ଟି ୱିକେଟ୍ ହରାଇ ଭାରତ ବିପକ୍ଷରେ ୪୩୮ ରନ୍ ସଂଗ୍ରହ କରିଥିଲା।
ସର୍ବନିମ୍ନ ସ୍କୋର: ଏହି ଲଜ୍ଜାଜନକ ରେକର୍ଡ ଟିମ୍ ଇଣ୍ଡିଆ ନାମରେ ରହିଛି। ୨୨ ନଭେମ୍ବର ୨୦୦୬ ରେ ଦକ୍ଷିଣ ଆଫ୍ରିକା ବିପକ୍ଷରେ ଡର୍ବାନ୍ ଦିନିକିଆରେ ଭାରତୀୟ ଦଳ ମାତ୍ର ୯୧ ରନ୍ କରି ଆଉଟ୍ ହୋଇଥିଲେ।
ସବୁଠାରୁ ବଡ଼ ବିଜୟ: ଅକ୍ଟୋବର ୨୦୧୫ ରେ ୱାଙ୍ଖେଡ଼େ ଷ୍ଟାଡିୟମରେ ଦିନିକିଆରେ ଦକ୍ଷିଣ ଆଫ୍ରିକା ଟିମ୍ ଇଣ୍ଡିଆକୁ ୨୧୪ ରନ୍ରେ ପରାସ୍ତ କରିଥିଲା।
ସବୁଠୁ ନିକଟତମ ବିଜୟ: ୨୧ ଫେବୃଆରୀ ୨୦୧୦ ରେ ଜୟପୁର ଦିନିକିଆରେ ଭାରତୀୟ ଦଳ ଗୋଟିଏ ରନ୍ରେ ଦକ୍ଷିଣ ଆଫ୍ରିକାକୁ ରୋମାଞ୍ଚକର ପରାଜୟ ଦେଇଥିଲା।
ସବୁଠୁ ଅଧିକ ରନ୍: ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର ଦକ୍ଷିଣ ଆଫ୍ରିକା ବିପକ୍ଷରେ ୨୦୦୧ ରନ୍ ସ୍କୋର କରିଛନ୍ତି। ସେ ହେଉଛନ୍ତି ଏକମାତ୍ର ବ୍ୟାଟ୍ସମ୍ୟାନ୍ ଯିଏକି ଭାରତ-ଦକ୍ଷିଣ ଆଫ୍ରିକା ଦିନିକିଆ ମ୍ୟାଚ୍ରେ ୨୦୦୦ ରନ୍ ଛୁଇଁଛନ୍ତି।
ଶ୍ରେଷ୍ଠ ଇନିଂସ: ଏଠାରେ ମଧ୍ୟ ସଚିନ୍ ଅଗ୍ରଣୀ ଅଛନ୍ତି। ଫେବୃଆରୀ ୨୦୧୦ ରେ ଅନୁଷ୍ଠିତ ଗ୍ୱାଲିଅର୍ ଦିନିକିଆରେ ସେ ଦକ୍ଷିଣ ଆଫ୍ରିକା ବିପକ୍ଷରେ ୧୪୭ ବଲ୍ରେ ୨୦୦ ରନ୍ର ଅପରାଜିତ ଇନିଂସ ଖେଳିଥିଲେ।
ଅଧିକାଂଶ ଶତକ: ଭାରତ-ଦକ୍ଷିଣ ଆଫ୍ରିକା ଦିନିିକିଆ ମ୍ୟାଚ୍ରେ ୬-୬ ଶତକ ହାସଲ କରି କ୍ୱିଣ୍ଟନ୍ ଡି କକ୍ ଏବଂ ଏବି ଡି ଭିଲିୟର୍ସ ଏହି କ୍ଷେତ୍ରରେ ୧ ନମ୍ବର ସ୍ଥାନରେ ଅଛନ୍ତି।
ଅଧିକାଂଶ ଛକା: ଏଠାରେ ଡି ଭିଲିୟର୍ସ ୪୧ ଟି ଛକା ସହିତ ଶୀର୍ଷରେ ରହିଛନ୍ତି। ସେ ଭାରତ ବିପକ୍ଷ ୩୨ ଟି ମ୍ୟାଚରେ ଏହି ୩୨ ଟି ଛକା ମାରିଛନ୍ତି।
ଅଧିକାଂଶ ୱିକେଟ୍: ପୂର୍ବତନ ଅଲରାଉଣ୍ଡର ଶାନ୍ ପୋଲକ୍ ଭାରତ ବିପକ୍ଷରେ ତାଙ୍କ ଖାତାରେ ୪୮ଟି ୱିକେଟ୍ ହାସଲ କରିଛନ୍ତି।
ଶ୍ରେଷ୍ଠ ବୋଲିଂ ଇନିଂସ: ସେପ୍ଟେମ୍ବର ୧୯୯୯ ରେ ନୈରୋବିରେ ଖେଳାଯାଇଥିବା ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚରେ ମାତ୍ର ୬ ରନ୍ ସଂଗ୍ରହ କରିଥିବା ବେଳେ ପୂର୍ବତନ ଭାରତୀୟ ସ୍ପିନର ସୁନୀଲ ଯୋଶୀ ୫ ୱିକେଟ୍ ନେଇଥିଲେ।
