ଫିରିଙ୍ଗିଆ, ୦୨/୦୨: ଘରକୁ ଖୁସି ଆସିଥିଲା । ସମସ୍ତେ ଖୁସି ଥିଲେ ପୁଅଟିଏ ହୋଇଛି ବୋଲି । ବାପା ସୁବାଷ ଦିଗାଲ ବି ଖୁସିରେ ଆତ୍ମହରା ହୋଇ ପଡ଼ିଥିଲେ । ହେଲେ ଦଇବ ବୋଧେ ସୁବାଷଙ୍କ ଖୁସିକୁ ଦେଖି ପାରି ନଥିଲା । ସ୍ତ୍ରୀ ମେଡିକାଲ୍ ବେଡରେ ପଡ଼ିଥିବା ବେଳେ ଛୁଆକୁ ପାଖରେ ଶୁଆଇ ଆଖି ବୁଜିଛନ୍ତି ସୁବାଷ । ଏଭଳି ଅଭାବନୀୟ ଘଟଣା ଘଟିଛି ଫୁଲବାଣୀ ଜିଲ୍ଲା ମୁଖ୍ଯ ଚିକିତ୍ସାଳୟରେ ।
ମୃତକ ଫିରିଙ୍ଗିଆ ଥାନା ପାଙ୍ଗାଉପରସାହି ପଞ୍ଚାୟତ ଡାମି ଗାଁର ସୁବାଷ ଦିଗାଲ । ପ୍ରସବ ପାଇଁ ସ୍ତ୍ରୀଙ୍କୁ ପ୍ରଥମେ ବାଲିଗୁଡ଼ା ଉପଖଣ୍ଡ ଡାକ୍ତରଖାନାରେ ଭର୍ତ୍ତି କରିଥିଲେ ସୁବାଷ । ସ୍ତ୍ରୀ ଏକ ପୁତ୍ର ସନ୍ତାନ ଜନ୍ମ ଦେଇଥିଲେ। ଜାନୁଆରୀ ୩୦ରେ ବାଲିଗୁଡ଼ା ମେଡିକାଲରେ ଅସୁସ୍ଥ ହୋଇ ପଡ଼ିଥିଲେ ପତ୍ନୀ । ଫଳରେ ଡାକ୍ତର ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଲୟଖୁ ସ୍ଥାନାନ୍ତରିତ କରିଥିଲେ ।
ସ୍ତ୍ରୀଙ୍କ ଦେହରେ ରକ୍ତ କମ୍ ଥିବା ଜଣା ପଡ଼ିବା ପରେ ରକ୍ତ ଦିଆ ଯାଇଥିଲା । ଗୁରୁବାର ରାତିରେ ସ୍ତ୍ରୀଙ୍କ ଚିକିତ୍ସା ଚାଲିଥିବା ବେଳେ ତଳେ ନବଜାତ ଶିଶୁକୁ ଧରି ଶୋଇଥିଲେ ସୁବାଷ । ତେବେ ଶୁକ୍ରବାର ସକାଳୁ ତାଙ୍କର ମୃତ୍ୟୁ ହୋଇଛି । ହୃଦଘାତରେ ସୁବାଷଙ୍କ ମୃତ୍ୟୁ ହୋଇଥିବା ଡାକ୍ତର ଅନୁମାନ କରୁଛନ୍ତି ।
ଫୁଲବାଣୀ ଟାଉନଥାନା ପୋଲିସ ମୃତଦେହ ଜବତ କରିବା ସହ ୦୫/୨୦୨୪ରେ ଏକ ଅପମୃତ୍ୟୁ ମାମଲା ରୁଜୁ କରି ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି । ମୃତଦେହ ବ୍ୟବଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣା ପଡ଼ିବ ବୋଲି କହିଛନ୍ତି ପୋଲିସ ଅଧିକାରୀ ବାଳକୃଷ୍ଣ ସ୍ୱାଇଁ ।