କୋଲକାତା: ୨୦୨୩ ବିଶ୍ବକପ୍ ଫାଇନାଲ ମୁକାବିଲା ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ହେବ । ଦକ୍ଷିଣ ଆଫ୍ରିକା ପାଖରୁ ବିଜୟ ହାସଲ କରି ଅଷ୍ଟ୍ରେଲିଆ ବିଶ୍ବକପ ଫାଇନାଲରେ ପ୍ରବେଶ କରିଛି । ବିଶ୍ବକପ୍ ଇତିହାସରେ ଅଷ୍ଟମ ଥର ଲାଗି ଫାଇନାଲରେ ଏଣ୍ଟ୍ରି ମାରିଛି ଅଷ୍ଟ୍ରେଲିଆ । ଆଜିର ମ୍ୟାଚ୍ରେ ୨୧୩ ରନ୍ର ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ଅଷ୍ଟ୍ରେଲିଆ ଟିମ୍ ୪୭.୨ ଓଭରରେ ୭ ଓ୍ବିକେଟ ହରାଇ ମ୍ୟାଚ୍ ଜିତିନେଇଛି । ଏବେ ଟାଇଟଲ୍ ମୁକାବିଲାରେ ମୁହାଁମୁହିଁ ହେବେ ଦୁଇ ଥରର ଚାମ୍ପିଅନ ଭାରତ ଓ ୫ ଥରର ଚାମ୍ପିଅନ ଅଷ୍ଟ୍ରେଲିଆ। ଫାଇନାଲ୍ ମୁକାବିଲା ନଭେମ୍ବର ୧୯ ତାରିଖ ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯିବ । ଅନ୍ୟପଟେ ପୁଣି ଚୋକର୍ସ ସାବ୍ୟସ୍ତ ହୋଇଛି ଦକ୍ଷିଣ ଆଫ୍ରିକା । ବିଶ୍ଵକପ୍ ଜିତିବାର ସ୍ଵପ୍ନ ପୁଣି ଥରେ ଧୂଲିସାତ ହୋଇଛି।
୨୧୩ ରନର ବିଜୟ ଲକ୍ଷ୍ୟ ପିଛା କରିଥିବା ଅଷ୍ଟ୍ରେଲିଆର ଦୁଇ ଓପନର ଡେଭିଡ୍ ଓ୍ଵାର୍ଣ୍ଣର ଓ ଟ୍ରେଭିସ୍ ହେଡ୍ ବିସ୍ଫୋରକ ବ୍ୟାଟିଂ କରି ଦମଦାର ଆରମ୍ଭ ଦେଇଥିଲେ । ଦୁଇ ବ୍ୟାଟର ମାତ୍ର ୬.୧ ଓଭରରେ ୬୦ ରନ ଯୋଡ଼ି ଦଳ ବିଜୟରେ ମୂଳଦୁଆ ପକାଇଥିଲେ । ତେବେ ଓପନିଂ ଯୋଡ଼ିକୁ ଭାଙ୍ଗି ଦକ୍ଷିଣ ଆଫ୍ରିକା ମ୍ୟାଚକୁ ପ୍ରତ୍ୟାବର୍ତ୍ତନ କରିବାକୁ ଚେଷ୍ଟା କରିଥିଲା । ଓ୍ଵାର୍ଣ୍ଣର ୧୮ ବଲରୁ ୪ ଚୌକା ଓ ୧ ଛକା ସହ ୨୯ ରନ କରି ଆଉଟ୍ ହୋଇଥିଲେ । ମିଚେଲ୍ ମାର୍ଶ ଖାତା ଖୋଲିବା ପୂର୍ବରୁ ପାଭିଲିୟନ ଫେରିଥିଲେ । ଟ୍ରେଭିସ୍ ହେଡ ଓ ଷ୍ଟିଭେନ ସ୍ମିଥ୍ ତୃତୀୟ ଓ୍ଵିକେଟ୍ ପାଇଁ ୪୫ ରନ ଯୋଡ଼ି ଦଳର ସ୍କୋରକୁ ୧୦୦ ପହଞ୍ଚାଇଥିଲେ।
ଟ୍ରେଭିସ୍ ଦ୍ରୁତ ବ୍ୟାଟିଂ କରି ୬୨ ରନ କରି ଆଉଟ୍ ହୋଇଥିଲେ। ମାର୍ନସ ଲାବୁସେନ(୧୮) ଓ ଗ୍ଲେନ ମ୍ୟାକ୍ସଓ୍ଵେଲ୍(୧) ଆଉଟ୍ ହେବାରୁ ମ୍ୟାଚ୍ ରୋମାଞ୍ଚକର ମୋଡ଼ ନେଇଥିଲା । ୧୩୭ ରନରେ ଅଷ୍ଟ୍ରେଲିଆ ଦଳ ୫ ଓ୍ଵିକେଟ୍ ହରାଇ କିଛି ସମୟ ଅଡ଼ୁଆରେ ପଡ଼ିଥିଲା । କ୍ରିଜରେ ଜମି ଥିବା ସ୍ମିଥ୍ ୩୦ ରନ କରି ଆଉଟ୍ ହୋଇଥିଲେ ବି ଜୋସ୍ ଇଙ୍ଗ୍ଲିସ ଦାୟିତ୍ଵପୂର୍ଣ୍ଣ ବ୍ୟାଟିଂ କରିଥିଲେ । ହେଲେ ସେ ୨୮ ରନ୍ରେ ଆଉଟ ହୋଇଥିଲେ । ଏହା ପରେ ପ୍ରତିଟି ରନ ପାଇଁ ଅଷ୍ଟ୍ରେଲିଆକୁ ସଂଘର୍ଷ କରିବାକୁ ପଡ଼ିଥିଲା। ମିଚେଲ୍ ଷ୍ଟାର୍କ(୧୬) ଓ ଅଧିନାୟକ ପାଟ୍ କମିନ୍ସ(୧୪) ଧୈର୍ଯ୍ୟପୂର୍ଣ୍ଣ ବ୍ୟାଟିଂ କରି ଅଷ୍ଟ୍ରେଲିଆକୁ ୪୭.୨ ଓଭରରେ ଜିତାଇଛନ୍ତି।
୨୦୨୩ ବିଶ୍ବକପର ଦ୍ବିତୀୟ ସେମି ଫାଇନାଲ ମ୍ୟାଚ୍ରେ ଦକ୍ଷିଣ ଆଫ୍ରିକା ବ୍ୟାଟିଂ ବିପର୍ଯ୍ୟୟର ସାମ୍ନା କରିଥିଲା । ୪୯.୪ ଓଭରରେ ଅଲଆଉଟ ହୋଇ ୨୧୨ ରନ୍ କରିବାରେ ସଫଳ ହୋଇଥିଲା ଦକ୍ଷିଣ ଆଫ୍ରିକା । ଆଜିର ମ୍ୟାଚ୍ରେ ଟସ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା ଦଳ । ହେଲେ ଆରମ୍ଭରୁ ଝୁଣ୍ଟିବା ସହ ମାତ୍ର ଏକ ରନ୍ରେ ଗୋଟିଏ ଓ୍ବିକେଟ ହରାଇଥିଲା ଦକ୍ଷିଣ ଆଫ୍ରକିା । ଅଧିନାୟକ ତେମ୍ବା ବାଭୁମା ଖାତା ନଖୋଲି ମିଚେଲ ଷ୍ଟାର୍କଙ୍କ ବଲରେ କ୍ୟାଚ୍ ଆଉଟ୍ ହୋଇ ପାଭିଲିୟନ ଫେରିଥିଲେ । ତାପରେ ୮ ରନ୍ରେ ଦଳକୁ ଲାଗିଥିଲା ବଡ଼ ଝଟକା । କ୍ବିଣ୍ଟନ ଡିକକ୍ କେବଳ ୩ ରନ୍ କରି ଆଉଟ ହୋଇଥିଲେ । ଆଜିର ମ୍ୟାଚ୍ରେ ଡେଭିଡ ମିଲର ୧୦୧ ରନ୍ କରି ଦଳକୁ ଏକ ସମ୍ମାନଜନକ ସ୍କୋର ପର୍ଯ୍ୟନ୍ତ ନେବାରେ ସାହାୟକ ହୋଇଥିଲା । ତାଙ୍କ ପରେ ହେନରିକ୍ କ୍ଲାସେନ୍ ୪୭ ରନ୍ କରିଥିଲେ । ସେପଟେ ଅଷ୍ଟ୍ରେଲିଆ ଟିମ୍ର ମିଚେଲ ଷ୍ଟାର୍କ ଏବଂ ପାଟ କୁମିନ୍ସ ଦକ୍ଷିଣ ଆଫ୍ରିକାକୁ ନିଜର ଘାତକ ବୋଲିଂ ଶିକାର କରିଥିଲେ । ଉଭୟ ୩ଟି ଲେଖାଏଁ ଓ୍ବିକେଟ ନେଇଥିବା ବେଳେ ଜୋସ ହାଜେଲଉଡ ଏବଂ ଟ୍ରେଭିସ ହେଡ ଦୁଇଟି ଲେଖାଏଁ ଓ୍ବିକେଟ ଅକ୍ତିଆର କରିଥିଲେ ।
ତେବେ ଆଜିର ମ୍ୟାଚରେ ଦକ୍ଷିଣ ଆଫ୍ରିକାକୁ ହରାଇ ଫାଇନାଲରେ ପହଞ୍ଚିଯାଇଛି ଅଷ୍ଟ୍ରେଲିଆ । ଆଉ ଏହା ସହ ବିଶ୍ବକପର ମହାମୁକାବିଲା ଭାରତ ଏବଂ ଅଷ୍ଟ୍ରେଲିଆ ମଧ୍ୟ ଖେଳାଯିବ । ଏହି ହାଇଭୋଲଟେଜ୍ ମ୍ୟାଚ୍ ନଭେମ୍ବର ୧୯ ତାରିଖରେ ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମ୍ରେ ଖେଳାଯିବ । ତେବେ ଅଷ୍ଟ୍ରେଲିଆ ଅଷ୍ଟମ ଥର ପାଇଁ ବିଶ୍ବକପ୍ ଫାଇନାଲରେ ପ୍ରବେଶ କରିଥିବା ବେଳେ ଏହି ଦଳ ପୂର୍ବରୁ ୫ଟି କପ୍ ହାସଲ କରିସାରିଛି । ସେପଟେ ନିରନ୍ତର ବିଜୟ ସହ ଫାଇନାଲକୁ ଯାଇଥିବା ଟିମ୍ ଇଣ୍ଡିଆ ଲାଗି ଅଷ୍ଟ୍ରେଲିଆ ଟିମ୍ ଚ୍ୟାଲେଞ୍ଜ ସୃଷ୍ଟି କରିପାରେ ବୋଲି ଚର୍ଚ୍ଚା ଆରମ୍ଭ ହୋଇଯାଇଛି ।
