କଲମ୍ବୋ,୦୯/୦୯: ଉଭୟ ବ୍ୟାଟିଂ ଏବଂ ବୋଲିଂରେ ଚମତ୍କାର ପ୍ରଦର୍ଶନ କରି ସୁପର-୪ର ଏକ ମୁକାବିଲାରେ ଘରୋଇ ଶ୍ରୀଲଙ୍କା ବାଂଲାଦେଶକୁ ୨୧ ରନରେ ହରାଇ ଚମତ୍କାର ବିଜୟ ହାସଲ କରିଛି। ଅନ୍ୟପଟେ ସୁପର-୪ରେ କ୍ରମାଗତ ଦ୍ଵିତୀୟ ପରାଜୟ ଭୋଗିଛି ବାଂଲାଦେଶ। ଫଳରେ ବାଂଲାଦେଶର ଫାଇନାଲ୍ରେ ପହଞ୍ଚିବା ମୁସ୍କିଲ ହୋଇ ପଡ଼ିଛି। ପ୍ରଥମେ ବ୍ୟାଟିଂ କରିଥିବା ଶ୍ରୀଲଙ୍କା ସମରବିକ୍ରମାଙ୍କ ଦମଦାର ୯୩ ରନ ସହ ଓ୍ଵିକେଟ୍ କିପର ବ୍ୟାଟର କୁଶଲ ମେଣ୍ଡିସଙ୍କ ୫୦ରନ ଓ ପଥୁନ ନିଶଙ୍କାଙ୍କ ୪୦ ରନ ବଳରେ ନିର୍ଦ୍ଧାରିତ ଓଭରରେ ୯ ଓ୍ଵିକେଟ୍ ହରାଇ ୨୫୭ ରନର ଚ୍ୟାଲେଞ୍ଜିଂ ସ୍କୋର କରିଥିଲା।
ଜବାବରେ ବାଂଲାଦେଶ ଟୋହିଡ ହ୍ରିଡୟଙ୍କ ସଂଘର୍ଷପୂର୍ଣ୍ଣ ୮୨ ରନର ଇନିଂସ ସତ୍ତ୍ଵେ ୪୮.୧ ଓଭରରେ ୨୩୬ ରନରେ ଅଲଆଉଟ୍ ହୋଇଛି। ଅନ୍ୟ ବ୍ୟାଟର କ୍ରିଜରେ ଅଧିକ ସମୟ ତିଷ୍ଠି ପାରି ନ ଥିଲେ। ଫଳରେ ବାଂଲାଦେଶ ୨୧ ରନରେ ପରାସ୍ତ ହୋଇଛି। ଅଧିନାୟକ ଦାସୁନ ଶନାକା ଉଭୟ ବ୍ୟାଟିଂ ଏବଂ ବୋଲିଂରେ ଅଲରାଉଣ୍ଡର ପ୍ରଦର୍ଶନ କରି ଶ୍ରୀଲଙ୍କା ବିଜୟରେ ଗୁରୁତ୍ଵପୂର୍ଣ୍ଣ ଭୂମିକା ଗ୍ରହଣ କରିଛନ୍ତି।