କଟକ,୦୩/୦୨: ପୁରୀ ଶ୍ରୀମନ୍ଦିର ପରିକ୍ରମା ପ୍ରକଳ୍ପର  ଉଦ୍‌ଘାଟନୀ ଉତ୍ସବକୁ ବିରୋଧ କରି ହୋଇଥିବା ମାମଲାକୁ ଶୁକ୍ରବାର ଆବେଦନକାରୀ ପ୍ରତ୍ୟାହାର କରି ନେଇଛନ୍ତି । ପୂର୍ବ ଶୁଣାଣିରେ ହାଇକୋର୍ଟ ଏହି ମାମଲାରେ  ଆବେଦନକାରୀଙ୍କ ବିଶ୍ୱାସନୀୟତାକୁ  ନେଇ ପ୍ରଶ୍ନ ଉଠାଇଥିଲେ । ତାଙ୍କର  ଆୟର ଉତ୍ସ କ’ଣ ବୋଲି ମଧ୍ୟ  ପ୍ରଶ୍ନ କରିଥିଲେ । 

ଏ ସଂକ୍ରାନ୍ତରେ  ଜବାବ ରଖିବା ଲାଗି ହାଇକୋର୍ଟ ଆବେଦନକାରୀଙ୍କୁ ନିର୍ଦ୍ଦେଶ  ଦେଇଥିଲେ । କିନ୍ତୁ ଆବେଦନକାରୀ  ଏହି ଜବାବ ଦାଖଲ କରିବା  ପରିବର୍ତ୍ତେ ମାମଲା ପ୍ରତ୍ୟାହାର  ପାଇଁ ଅନୁମତି ଲୋଡ଼ିଥିଲେ । ହାଇକୋର୍ଟ ଏଥିପାଇଁ ଅନୁମତି  ପ୍ରଦାନ କରିବା ସହ ମାମଲାର ଅନ୍ତ ଘଟାଇଛନ୍ତି । 

ଭାରତୀୟ  ବିକାଶ ପରିଷଦର ସଭାପତି  ସୁରେନ୍ଦ୍ର ପାଣିଗ୍ରାହୀଙ୍କ ପକ୍ଷରୁ  ଆଗତ ମାମଲାର ଶୁଣାଣି କରି  ହାଇକୋର୍ଟର କାର୍ଯ୍ୟକାରୀ ମୁଖ୍ୟ  ବିଚାରପତି ଜଷ୍ଟିସ୍‌ ବିଦ୍ୟୁତ୍‌ ରଞ୍ଜନ  ଷଡ଼ଙ୍ଗୀ ଏବଂ ଜଷ୍ଟିସ୍‌ ଏମ୍‌.ଏସ୍‌.  ରମଣଙ୍କୁ ନେଇ ଗଠିତ ଖଣ୍ଡପୀଠ  ଏହି ନିର୍ଦ୍ଦେଶ ଦେଇଛନ୍ତି ।