ଭୁବନେଶ୍ୱର,୦୬/୦୨: ସାଧାରଣ ନିର୍ବାଚନ ପାଇଁ ଚୂଡ଼ାନ୍ତ ଭୋଟର ତାଲିକା ଜାନୁଆରୀ ୫  ତାରିଖରେ ପ୍ରକାଶିତ ହୋଇଛି ।  ଏହାର ନକଲ ବୁଥସ୍ତରୀୟ ଅଧିକାରୀ  (ବିଏଲ୍‌ଓ) ଓ ସମସ୍ତ ଉପଜିଲ୍ଲାପାଳଙ୍କ  କାର୍ଯ୍ୟଳୟରେ ଉପଲବ୍ଧ । ମୁଖ୍ୟ  ନିର୍ବାଚନ ଅଧିକାରୀ (ସିଇଓ)ଙ୍କ ୱେବ୍‌ସାଇଟ୍‌ ceoodisha.nic.inରେ ଏହି ଚୂଡ଼ାନ୍ତ ଭୋଟର  ତାଲିକା ଦେଖିପାରିବେ । ଭୋଟର  ତାଲିକାରେ ନାମ ପଞ୍ଜୀକରଣ କାର୍ଯ୍ୟ ଏକ ନିରନ୍ତର ପ୍ରକ୍ରିୟା । ଚୂଡ଼ାନ୍ତ  ଭୋଟର ତାଲିକା ପ୍ରକାଶ ପରେ ବି ନାମ  ପଞ୍ଜୀକରଣ ଚାଲିଛି । 

ସିଇଓ ନିକୁଞ୍ଜ  କୁମାର ଧଳ ରାଜ୍ୟର ସବୁ ଭୋଟରଙ୍କୁ  ଅନୁରୋଧ କରିଛନ୍ତି ଯେ, ପ୍ରଥମେ ଚୂଡ଼ାନ୍ତ ଭୋଟର ତାଲିକାରେ ନିଜ  ନିଜର ନାମ ପରୀକ୍ଷା କରି ନିଅନ୍ତୁ । ଯଦି ଭୋଟର ତାଲିକାର କୌଣସି ବ୍ୟକ୍ତିର ନାମ ନାହିଁ,  ତୁରନ୍ତ ନୂଆ ଭୋଟର ଭାବେ ନାମ ପଞ୍ଜୀକରଣ ପାଇଁ ଫର୍ମ ନଂ-୬ ଓ ସ୍ଥାନାନ୍ତର ପାଇଁ ଫର୍ମ  ନଂ-୮ରେ ଆବେଦନ କରନ୍ତୁ । ଭୋଟରମାନେ ଅନ୍‌ଲାଇନ୍‌ ମାଧ୍ୟମରେ ଲଗ୍‌ ଇନ୍‌ କରି କିମ୍ବା  ଆପ୍‌ ଡାଉନ୍‌ଲୋଡ୍‌ କରି ଘରେ ବସି ଆବେଦନ  କରିପାରିବେ । ଏହାବାଦ୍‌ ସମ୍ପୃକ୍ତ ବୁଥ୍‌ସ୍ତରୀୟ  ଅଧିକାରୀ (ବିଏଲ୍‌ଓ)ଙ୍କ ସହ ଯୋଗାଯୋଗ କରି ନିର୍ଦ୍ଧାରିତ ଫର୍ମରେ ପଞ୍ଜୀକରଣ କରିପାରିବେ ।