ମୁମ୍ବାଇ ୦୯/୦୨: ଅପ୍‌କମିଙ୍ଗ ଫିଲ୍ମ ‘ଆର୍ଟିକଲ୍‌ ୩୭୦’ର ଟ୍ରେଲର୍‌ ଲଞ୍ଚ୍‌ ଅବସରରେ ଫ୍ୟାନ୍‌ଙ୍କୁ ଖୁସି ଖବର ଦେଇଛନ୍ତି ୟାମି ଗୌତମ । ବିବାହର ୩ ବର୍ଷ ପରେ ସେ ମା’ ହେବାକୁ ଯାଉଛନ୍ତି । ତାଙ୍କ ସ୍ୱାମୀ ତଥା ଫିଲ୍ମ ମେକର୍‌ ଆଦିତ୍ୟ ଧର୍‌ ଉକ୍ତ କାର୍ଯ୍ୟକ୍ରମରେ କହିଥିଲେ, ଏହି ଫିଲ୍ମ ଏକ ପାରିବାରିକ ମାମଲା । ଆମ ପାଇଁ ଏହା ବହୁତ ଖାସ୍‌ । ଫିଲ୍ମ ନିର୍ମାଣ ସମୟରେ ଏହି ଖୁସି ଖବର ଆମକୁ ମିଳିଲା । କାର୍ଯ୍ୟକ୍ରମରେ ୟାମିଙ୍କ ବେବି ବମ୍ପ୍‌ ଦେଖିବାକୁ ମିଳିଥିଲା । ସେ ଏବେ ୫ ମାସର ଗର୍ଭବତୀ ଅଛନ୍ତି । 

୨୦୨୧ ମସିହା, ଜୁନ୍‌ ୪ ତାରିଖରେ ୟାମି-ଆଦିତ୍ୟଙ୍କର ବିବାହ ହୋଇଥିଲା । ଫିଲ୍ମ ‘ଉରି- ଦ ସର୍ଜିକାଲ ଷ୍ଟ୍ରାଇକ୍‌’ର ସେଟ୍‌ରେ ଉଭୟଙ୍କ ପ୍ରେମ ସମ୍ପର୍କ ଆରମ୍ଭ ହୋଇଥିଲା । ଦୁଇ ବର୍ଷ ଡେଟିଂ ପରେ ଉଭୟ ବିବାହ ବନ୍ଧନରେ ବାନ୍ଧି ହୋଇଥିଲେ । କନ୍ନଡ଼ ଫିଲ୍ମ ‘ଉଲ୍ଲାସ-ଉତ୍ସାହ’ ଜରିଆରେ ୨୦୧୦ ମସିହାରେ ଫିଲ୍ମ ଦୁନିଆରେ ପ୍ରବେଶ କରିଥିଲେ ୟାମି । ଏହା ପରେ ୨୦୧୨ ମସିହାରେ ‘ଭିକି ଡୋନର୍‌’ ମାଧ୍ୟମରେ ସେ ବଲିଉଡ୍‌ରେ ଏଣ୍ଟ୍ରି କଲେ । ‘ଚୋର୍‌ ନିକଲ୍‌ କେ ଭାଗା’, ‘ଉରି’, ‘ଏ ଥର୍ସଡେ’, ‘ବାଲା’ ଓ ‘ଓଏମ୍‌ଜି-୨’ ଭଳି ଫିଲ୍ମରେ ସେ କାମ କରିଛନ୍ତି । ଖୁବ୍‌ଶୀଘ୍ର ପଲିଟିକାଲ୍‌ ଡ୍ରାମା ଫିଲ୍ମ ‘ଆର୍ଟିକଲ୍‌ ୩୭୦’ରେ ସେ ନଜର ଆସିବେ ।